Gaenh bi daeuj, Duh’anh Yauzcuz Swciyen vwnzva ndawbiengz minzcuz gig hoengh, cug mbaek fazcanj hungcangq.

It dwg lajmbanj ginzcungsing vwnzyi donzdij aen dem aen okdaeuj. Dangqnaj, daengx yienh gungh miz minzcuz minzgenh yezyiz vwnzyi donzdij 86 aen, yenjyenz nem cizyenz 2322 vunz, ndawde segih yezyiz vwnzyidui 16 aen、yienh yezyiz vwnzyidui 6 aen, yenjyenz nem cizyenz 594 vunz; lajmbanj vwnzyidui 64 aen, yenjyenz nem cizyenz 1728 vunz.

Ngeih dwg minzcuz minzgenh vwnzva hozdung cwngzyau yienhda. Doenghgij vwnzyi donzdui ndaw- biengz minzcuz youz ginzcung saujsu minzcuz gag gyoebbaenz, gyoengqde aeu doenghgij foux、siengsingh、siujbinj daengj vwnzyi hingzsik gag bien gag yienj haenx senhconz vunzndei saehndei, bemx gij sibgvenq nyauq ndawbiengz, gienq vunz gaej saenq fangz, aeu gohyoz vwnzmingz, doidoengh sevei funghgi bienq ndei.

Sam dwg minzcuz minzgenh vwnzva donzdij doxgyau lai. Gij donzdij neix gingciengz cujciz gak yanghcin、segih、cunh mbanj doxcunz yienjok, caemhcaiq daengz Majsanh、Sanglinz、Vujmingz、Dava、Yizcouh daengj dieg henzgyawj bae doxgyau yienjok.

Seiq dwg cizgiz swnjcienz vwnzva minzcuz. Aen yienh neix Yaau Yangh Davang Cunh boux duiyouh ganbu heuhguh Cinz Cwngdangz, goeng neix gaenq ndaej 79 bi, laemxsim vatgud nem cingjleix vwnzva Yauzcuz dangdieg, cangcoz le buek conzdungj dijyuz nem vwnzyi cezmuz gig miz minzcuz daegsaek haenx. Gaenh bi daeuj, doenghgij vwnzyi cezmuz youz Cinz Cwngdangz bien haenx miz 5 aen ndaej guekgya gaep ciengjhangh, 9 aen ndaej swcigih gaep ciengjhangh, 17 aen ndaej si gaep ciengjhangh. Neix ndaej doenghboux minzsuz conhgyah mizmingz haenx heuhguh“bouxdaeuz dazyinx swnjcienz vwnzva minzcuz”.

(Luz Sinhgveiz Dangz Bingjfungh)