Lauj Vangz dwg boux guenjroen ndeu. Hajcib bi nienzgeij miz samcib bi gunghlingz, cibhaj bi dangjlingz. Dingqgangj de dwg youq budui faenboiq daengz neix ne. Mboujguenj dwg gangj vah roxnaeuz dwg banh saeh, de cungj dwg bouxvunz saedsaeh ndeu.

Lauj Vangz vunz mbouj sang mbouj daemq, mbouj biz mbouj byom, fouqda gig miz saenz, aen naj de ndaemnding, fwngz de cocadcad, daj gijneix couh yawj ndaej rox de dwg bouxvunz sinhoj he.

Boux guenjroen couhdwg youq gwnz roen guhhong, ngoenzndit ngoenzfwn cungj aeu youq gwnz roen coih roen guhhong, sinhoj dangqmaz, ngaenz cienz youh ndaej noix. Vihneix gyoengq doengzsaeh lauj Vangz ciengzciengz damzbyoedbyoed. Lauj Vangz miz seiz nyaenx mbouj ndaej hix nam song coenz. Hoeng, gyoengqde roxnyinh hong swhgeij cungj aeu guh. Daedbied dwg lauj Vangz, de gangj noix guh lai, couh yienghneix, ndaw sim de dauqfanj onjgywdgywd.

Lauj Vangz miz doiq lwg he, boux sai boux mbwk. Gung doiq lwg neix doeg sat dayoz, ndaw ranz cungj hoj liux lo. Vihneix, mehyah youq ranz guh hong reihnaz haenx, ciengzciengz dawz gij cienzhong lauj Vangz daeuj okheiq、guhriu, ciengzseiz mbwnjbak dwk naeuz：“Di cienzhong mwngz neix mbouj gaeuq saek heuj bw !”

Nanzgvaiq mehyah mbwnjbak, gij souhaeuj ndawranz cujyau goenglauz dwg de, dwg de ndaemcou、ndaemdoeng ndaej daeuj haenx. Gij- neix lauj Vangz mbouj ndaej mbouj fug, moix baez gangj daengz ngaenzcienz, lauj Vangz youq dangqnaj mehyah cungj gangj vah mbouj miz rengz. Vih liux aeu naj ma, boux sai neix ciengz damzdingz dwk naeuz: “Soucou、soudoeng hix miz mbangj goenglauz gou ne!” Moix baez seizneix mehyah cungj mbouj oksing, aenvih lauj Vangz gangj ndaej doiq.

Danhvei liz ranz gyawj, lauj Vangz haet bae haemh dauq. Roengzban seiz- gan caeuq song ngoenz singhgiz seizgan, lauj Vangz caenhliengh bang mehyah guh hong reihnaz, couhcinj mbouj ndaej guh hong reihnaz, youq ranz guh hongranz, hix dwg miz goenglauz. Caiq gangj, mehyah hix mbouj yungzheih, moix ngoenz daengngoenz ngamq ok couh riuj dingj haeux he ok dou, daengngoenz doek bya cij dauqma, haeuj dou seiz daengx ndang hanh dumz liux. Lauj Vangz yawj youq ndaw da, in youq ndaw sim, de cijndei caenhliengh bae bang mehyah guh hong.

Mehyah yienznaeuz mbouj gangj okbak, hoeng, de sim rox dungx nyinh, gvan de dwg bouxvunz youh gaenx youh rox gvansim vunz ndeu.

Mehyah dwg bouxvunz naengz- ganq he, ndaw ranz rog ranz de cungj guenjleix ndaej miz gyaeuj miz rieng, ngaenzcienz hix dwg de guenj, lienz gij cienzhong lauj Vangz deng de yawj siuj haenx hix deng de gaemdawz, moix ndwen cij ce 300 maenz hawj lauj Vangz cit ien caeuq lingzyungh, ndaw daeh lauj Vangz ciengzciengz “hoengqbebbeb”, hoeng, de mbouj miz coenzvah lawz, de roxnyinh ndaw ranz yungh cienz lai. Gung doiq lwg doeg dayoz sat le, ndaw ranz ngaenzcienz seuq lumj raemx swiq nei, ciep roengzdaeuj youh yaek rom cienz guh ranz moq, laebdaeb nyaengq ndaw nyaengq rog. Lauj Vangz ciengz youq dangqnaj mehyah naeuz：“Ciuh- vunz neix mbouj miz ngoenz lawz ndaej yietnaiq.”

(caengz sat)

sawcuenh dinj