Gou youq siujyoz haj bi ndawde, miz haujlai baez “baez daih’it”, lumj baez daih’it yenjgyangj、baez daih’it gwih danci……Hoeng ceiq hawj gou nanzlumz haenx couh dwg baez daih- it aeu makyungz cauj gyaeqgaeq.

Gou youq ndaw ranz dwg boux “gunghcuj iq”，bohmeh couh lumj bouxhoiq gou nei. Daxmeh hix ciengzseiz naeuz gou gijmaz hong cungj mbouj guh, lumj gomiuz ndaw ranz nei, mbouj deng rumz ci fwn lwed. Gou dingq gij vah neix, ndaw sim miz cungj feihdauh gangj mbouj ok haenx. Yienghneix gou siengj guh di saeh hawj daxmeh yawjyawj.

Gou siengj cawj buenz byaek ndeu——makyungz cauj gyaeqgaeq. Gou daj ndaw binghsiengh gaem geij aen makyungz caeuq sam aen gyaeqgaeq. Gou youq henz vanj siujsim yubyub dwk dawz sam aen gyaeqgaeq gvaek byoengq dauj roengz ndaw vanj bae, caiq gyaux de.

Gou diemj feiz, dauj youz, caj youz ndat le, dawz gyaeqgaeq dauj roengz ndaw rek bae, dingqnyi“cila”sing ndeu，lumjnaeuz gyaeqgaeq ciengqgo nei. Seizneix gou raen gyaeqgaeq bongz hwnjdaeuj, lij miz di fugfauz, gou youh dawz makyungz dauj roengz ndaw rek bae, fanfuk cauj, gvaq yaephe, gou youh dauj buenq vanj raemx roengzbae, daih- iek youh gvaq le haj faencung, gou youh cuengq di gyu, yaephe couh cug lo, gou canj okdaeuj cuengq roengz ndaw buenz bae. Gou yawj ndaw buenz gij makyungz cauj gyaeqgaeq henjlwglwg neix, hawj gou myaiz cungj lae lo. Hoeng gou lij nyaenx dwk. Gou dawz buenz makyungz cauj gyaeqgaeq neix gaem daengz gwnz daiz bae caj bohmeh, hawj bohmeh doeksaet baez ndeu. Dahraix, bohmeh raen gwnz daiz miz buenz makyungz cauj gyaeqgaeq neix, naeuz：“Dahlwg majhung lo, mbouj dwg boux gunghcuj ndeu lo. ”Gou cimz gij lauzdung cwngzgoj gamjdaengz van raixcaix.

Daj baez neix hwnj, gou miz seizgan couh bang bohmeh cawj byaek、cawj ngaiz. Gou seizneix gaenq rox cawj geij yiengh byaek lo, mwngz naeuz gou miz bonjsaeh lwi？

（指导老师：磨志忠）