Gwnz seiqgyaiq gij gyaez ceiq hungmbwk haenx couh dwg gij gyaez daxmeh. Gij gyaez daxmeh lumj rumzcin raeujrub, lumj daengngoenz ronghlwenq, de dwg geijlai cingh ha, youq gij gyaez daxmeh gujli baihlaj, gou ciemhciemh majhung maenh’ak.

Daxmeh gou mbouj sang mbouj daemq, lwgda gig hung, byaem dinj hoeng gig ndaem, bouxvunz unqswnh、ndeigyaez. Daj gou seng daengz seizneix daxmeh mbouj rox vih gou yousim geijlai.

Bi ndeu seizdoeng haemh ndeu, gou deng rumz liengz baenz bingh lo. Daxmeh soengq gou bae yihyen yawj bingh, byaij daengz byongh loh, sawqmwh baet raq rumzhung ndeu, daxmeh gaenjgip dawz geu buh hung baihrog de duet roengzdaeuj, cw ndang gou. Aenvih lau gou deng rumz baet lai, daxmeh byaij youq baihnaj dangj rumz, gou byaij youq baihlaeng, rumz baet mbouj daengz geijlai, caemhcaiq aemq geu buh daxmeh he, gou gamjdaengz gig raeuj, di hix mbouj gamjdaengz nit, hoeng, daxmeh deng rumz baet ndaej naj heu bak aeuj. Gou siengj dawz geu buh daxmeh hawj daxmeh daenj, daxmeh cij naeuz:“Mbouj youqgaenj, gou mbouj nit.” Daeujdaengz yihyen, yihswngh bang gou yawj bingh, hai fuk yw hawj gou caiq dwk cim le, doiq daxmeh naeuz gij bingh gou mbouj youqgaenj, mbouj geijlai nanz couh ndei lo. Dingq le gij vah yihswngh, aen naj daxmeh cij miz di riu.

Daxmeh mboujdanh gvensim ndangdaej gou, vanzlij gvensim gou yozsiz. Miz baez ndeu, yijvwnz gou ngamq gauj ndaej 80 faen, gou mbouj gamj gangj hawj daxmeh nyi, lau de ndaq gou, doeklaeng daxmeh rox le, mboujdanh mbouj ndaq gou, lij doiq gou naeuz:“Saetbaih cij rox hit, saetbaih mbouj youqgaenj, cijaeu ra ok yenzyinh, laebdaeb roengzrengz couh gojyij cwngzgungh.” Gangj sat daxmeh youh bang gou ra gij yenzyinh cingzcik doeklaeng, menhmenh gangj- gaij hawj gou, hawj gou rox gaij.

Daxmeh gyaez gou gangj hix gangj mbouj sat, sij hix sij mbouj liux, daxmeh, gou mbouj hawj mwngz saetmuengh, gou itdingh aeu cingzcik ndei daeuj bauqdap mwngz.

（指导老师：陆凤音）