Hoeng wnggai yungh banhfap gijmaz daeuj gaijgez aen vwndiz neix ne? Lij dawz mbouj ok aen banhfap ndei daeuj. De doiq Se Dunghlaiz naeuz：“Raeuz wnggai ndeindei dingq gij eiqgienh seyenz caeuq gyoengq boux ganbu giekdaej mbat ndeu gonq.”

De youq gizde diucaz cib lai ngoenz, hai le haujlai baez hoih. Veiz Gozcingh gangj Vahcuengh Doenglanz yienznaeuz caeuq Vahcuengh Vuj- mingz doxca gig laux, hoeng haujlai giz vanzlij ndaej doxdoeng bw. De gingciengz aeu Vahcuengh cam eiqgienh vunzlai, aenvih de gangj Vahcuengh dangdieg mbouj lumj geijlai, ciengzseiz hawj vunz riuhaha. De unqswnh dak vunz, youh rox doengsug han gij vwndiz vunzlai daez ok haenx, seyenz cungj maij fanjyingj cingzgvang hawj de nyi. Gyanghaemh mwh yaek haihoih, coj miz gyoengq laeq lwgnyez humx youq henzndang de, haemq neix haemq haenx. Bouxgeq hix maij caeuq de yungh Vahcuengh gangjgoj. Gyoengqvunz cigsoh doiq de fanjyingj hongreihnaz roek cib diuz gvidingh fat roengzdaeuj le, swnghcanj、 gwndaenj cungj ndei lai lo, hoeng vunzlai doiq doengzcaez guhhong mbouj daiq hwnjheiq, gij swnghcanjdui fouq haenx nyinhnaeuz caiq baenzlawz haenqrengz guh hong hix lauz mbouj ndaej geijlai youz, gij swnghcanjdui hoj haenx nyinhnaeuz baenzlawz guh cungj youz dadui mbatndeu baen hawj, guh ok doxgaiq noix le hix gojyij ndaej daengz caez diuzboiq, seyenz doiq doengzcaez ok- hong mbouj nyienh okrengz, doiq guh dieggagndaem caeuq hai fwz gig hwnjheiq. Mwngz yawjraen gaiq reih roxnaeuz gaiq naz lawz gomiuz maj ndaej ndei, mbouj yungh cam couh rox dwg gaiq reih roxnaeuz gaiq naz ranz lawz gag ndaem haenx. cam gyoengqde baenzlawz guh cij ndaej hawj vunzlai nyienh lai guh hong vunzlai doxgungh ne? Gyoengq- de nyinhnaeuz aen banhfap ceiq ndei haenx dwg bau dingh yinvu gyau haeux le, gaiqwnq couh dwg dui lawz ndaem gijmaz couh sou gijmaz, raemxmboq mbouj famh raemxdah.

(caengz sat)

Veiz Gozcingh

□ Hoz Saubangj sij Cinz Siengzcouh Liuz Gingliuj Cinz Siengzgen hoiz