Baez hai dennauj, QQ gag hwnjsienq lo, sikhaek sou ndaej haujlai saenqsik, dingzlai cungj dwg angqhoh “ciet sam bet vaiqvued”, nauhnangnang, hoenghhwdhwd, gou sim’angq raixcaix. Yawjraen doengz- doih、doengzhag youq ndaw QQ gangjlwnh baenzlawz gvaq ciet, bae gizlawz guhcaemz, gou yienznaeuz sim haenznyubnyub, hoeng, swhgeij mbouj guh saek sing. Aenvih, mboengqneix hong nyaengqnyatnyat, mbouj caengz ndaej ngeix gvaq baenzlawz gvaq ciet, mbouj miz saek di cunjbei, doengzdoih iu bae gizlawz guhcaemz, hix mbouj rox baenzlawz han.

Daihgya cingq gangjlwnh dwk, ndaw danhvei miz vunz dwk dienhvah daeuj naeuz bae camgya hozdung hoh “ciet sam bet ”.

Mboengqneix cungj guh hong dennauj, guh ndaej haeujmaez, cingq daraiz gyaeuj ngunh, dingq naeuz danhvei bae guh hozdung, gou angq raixcaix.

Naemj daengz haemq nanz mbouj okrog bae guhcaemz, aensim couh sikhaek mbin gvaq ndoi gvaq lueg lo. Sim baez maengx, couh youq gwnz QQ sij le hot fwen ndeu byaujdaz gij simcingz caeuq siengjfap swhgeij, hix suenq han doengzdoih.

Mizeiq coux sam bet,

Baizletlet hong lai;

Mbouj haenz vunz fouqcaiz,

Cij maij bae rog byaij.

Siengj daengz seizcin daeuj lo, rog doengh gwnz ndoi, bak va angjo roeg heuh didek, rumzcin cifefe, gyaeugywtgywt, ndeindi’ndi, vuen- vuedvued, haemq nanz mbouj bae rog doengh gwnz ndoi guhcaemz, seizneix daihgya cungj angq gvaq “ciet sam bet”, bae lijyouz, gou sim engq haenz lo, couh sim mbinfangfang hwnjdaeuj. Hai, mboujguenj hong geijlai nyaengq, hix roengzsim lo, ngoenz singhgiz itdingh bae rog guhcaemz. Ndigah, youh sij le hot fwen daihngeih lwnh doengzdoih:

Singhgiz bouj “sam bet”,

Gizgyawj cet bya’ndoi;

Vunz bae gizgyae youz,

Gou bae rog suen byaij.

Hong nyaengq feiq simlig,

Ngoenzngoenz mbik mbouj hai;

Ndaejhoengq rog bae byaij,

Seizcin caij ndoi doengh.

Yaep ndeu, miz boux doengzdoih ndeu youq ndaw QQ fat saenqsik daeuj——“hoh mwngz sam bet vaiqvued”. Gou cingq nyaengq, mbouj haeujsim hoiz vah hawj de. Mbouj geijlai nanz, de youh sij “doiq mbouj hwnj, dwg ‘ciet sam bet vaiqvued’”.

Hwhw, “sam bet” roxnaeuz “ciet sam bet”, gou gaenbonj mbouj lwnh, vunzlai hix caeux mbouj lwnh lo. “Sam bet” caeux gaenq bienqbaenz aen swz heuh mehmbwk lo. Gijneix wnggai daj “ciet sam bet” rangh ndaej daeuj ba —— bibi hoh “ciet sam bet”, bingz “sam bet hungzgizsouj” daengj, “sam bet” couh bienqbaenz mingzlawh mehmbwk lo. Seizneix “sam bet” ceij boux mehmbwk neix youq danhvei, roxnaeuz guh goengsaeh guh ndaej daegbied ndei, daegbied ak, “sam bet” gaenq baenz mingzlawh boux mehmbwk maenh’ak lo.

（caengz sat）

sanjvwnz

□ Ganh Sozvwnz/甘说文