Seizcin ciengx ndang, youq ndaw bouxcungnienz caeuq boux- laux miz vunz nyieg caeux roxnaeuz miz gak cungj binghmenhsingq ndang byom ndang haw roxnaeuz hwet naet、da raiz、cingsaenz hoetsuk seiz, cungj ndaej leihyungh aen geiqciet neix gaengawq aenndang caeuq binghcingz daeuj gwn bouj, daeuj fuengz bingh yw bingh. Naemj daengz heiqyiengz ndang vunz cugciemh sengfat aen daegdiemj neix, seizcin gwn bouj wng aeu cit bouj bingz bouj guhcawj. Gijgwn bingzbouj miz megmienh、haeuxlidlu、haeuxfiengj、duh caeuq gij huq aeu duh guh、lwgmak、huq ndaw haij caeuq gyaeq daengj. Gijgwn cit bouj miz oij、makleiz、gyoijhom、ngaeux、byaekginzcai、beghab、nohbit、haijcwz、duzfw、saenaz、 haijdai daengj.

Seizcin gwn bouj wng haeujsim bouj daep. Linghvaih, lij aeu haeujsim fuzrex cingqheiq, bouj ik yienzheiq. Naengh aenndang bien heiqhaw, ndaej lai gwn di haeuxcuk、lwgmaenz、maenzcienz、nohgaeq、noh roeggumj、bya singjsien、duhdoem、lwgraz、makdaihcauj、maklaeq daengj; naengh bien heiq yaem mbouj gaeuq, ndaej gwn di lauxbaeg nding、 daeuhfouh、ngaeux、 lwgcid、 beghab、raet- ngaenz、gyaeqbit、nohdouq、duzfw daengj. Naengh aenndang okyienh mingzyienj heiq、 lwed、yaem、yiengz mbouj gaeuq, baengh gwn bouj gaenq bouj mbouj ndaej dauq seiz, ndaej youq cunghyih sonyinx lajde gwn di ywbouj van bingz ndeu.