Veiz Gozcingh ciep guh daih’it suhgi seiz, gij ginghci Guengjsae maqhuz yakrwix.

Aenvih deng “dayozcin” caeuq yinzminz gunghseva gitnau，gih raeuz haeuxsou lienzdaemh sam bi gemj canj, haeuxsou youq bi 1961 beij bi 1957 doekroengz 17%. Doenghgo ginghci naekhaenq gemj canj fukdoh gig laux, gunghyez canjciz daengx- mienh doekroengz. Ndawsingz haeux- gwn gunghhawj bouxhung bouxvunz ndwen cij ndaej 22 gaen, youzgwn cij miz 2 liengx, biuqbaengz gaxgonq moix vunz bi ndaej ciengh bet, seizneix cij ndaej 3 cik, gaiqgwn fusizbinj caeuq doxgaiq ngoenzyungh gig mbouj doh.

Mwhde, aen vwndiz ceiq angjda haenx dwg aeu anbaiz ndei gwndaenj vunzlai ndawsingz caeuq vunzlai lajmbanj. Ndigah hoizfuk caeuq mbefat swnghcanj hongnaz, baenz gienh saeh hungnaek Swcigih Dangjbveij caeuq Swcigih Cwngfuj ceiq gonq aeu naemj ndeu.

Hai sat aen hoih sam gaep veiyi gyonjcomz gij hit daj “dayozcin” daeuj haenx le, Swcigih Dangjveij lingjdauj faenfaen roengz lajmbanj bae diuhcaz ngeixyaeng, ra banhfap kaekfug hojnanz.

Bi 1961 ndwen 7, Veiz Gozcingh youh daengz Vujmingz Yen Dwngz- siengz Gunghse mbat dem. Bigvaq seizdoeng, de hix daeuj gizneix diucaz gvaq. Mwhde, seyenz doiq cingsuenq “haj rumz” (“rumz gunghcanj”、 rumzgangjboq、 rumz apbik mingh- lingh、 rumz luenh cijveih swnghcanj、 rumz ganbu guh daegbied ), hoizfuk yungh dadui guh aen gihbenj haedsuenq danvih, hawj seyenz gag ndaem di reih gagguenj haenx caeuq guh di hongcab ndawranz, hoizfuk hawciengz lajmbanj daengj, neix roxnyinh gig ndeimaez, hoeng hix doiq cwngfuj daezok manz lai yigen, daegbied doiq banh ranzngaiz doxgungh, yigen ceiq lai. De caenda yawjraen laeq lwgnyez ndeu daj ranzngaiz lingx ngaiz byaek bae ranz, mbouj siujsim dawz ngaiz byaek daengx ranz vunz daj goemj youq gwnz namh, siengsim dwk daej le haujlai nanz. Vunzlai geq ok haujlai gij mboujndei guh ranzngaiz doxgungh haenx, yauhgiuz aeu gag ranz gag cawj.

(caengz sat)

Veiz Gozcingh Sangcieng Cawj- guenj Guengjsae Ngeihcib Bi

□ Hoz Saubangj sij Cinz Siengzcouh Liuz Gingliuj Cinz Siengzgen hoiz