Yinznanz Swngj Dizging Couh Cunghden Yen dwg baengh bonjsaw《Dibingzsen Siusaet》(《消失的地平线》) okmingz lajbiengz. Bonj saw neix danq dieg gapgyaiq Yinznanz、Sih- cang、Swconh dwg aen diendangz vunzbiengz: Gizde fwj daemq mbwn lamz, va hai rim doengh; gizde miz cungj cunghgyau vwnzva gig saenzmaed he, sinyangj hawj gyoengqvunz de caeuq swyenz doxhuz caemhyouq……” Doeklaeng miz conhgyah cingqsaed, diegde couhdwg Dizging Couh Cunghden Yen. 1997 nienz, Cunghden Yen gaijmingz heuhguh “Yanghgwzlijlah”.

“Yanghgwzlijlah” aen coh neix dwg daj Yinghyij yaemhoiz gvaqdaeuj, eiqsei de dwg “dieg ceiq hab vunz youq”.

Gaxgonq gou cungj laihnaeuz dieg Yanghgwzlijlah Yinznanz liz gou gyae lai, hoeng bi’gvaq 7 nyied daej mwh gou riengz lijyouzdonz naengh ci gvaq henz Byasiet Yilungz, gou fodfwd roxnyinh dieg diendangz fangzhwnz neix liz gou yied daeuj yied gyawj lo.

Gou daiq sam aen maqmuengh bae youz Yanghgwzlijlah: It dwg bae ranzbaed gamjsouh gij Cangconz Fuzgyau saenzmaed youh lauxgeq haenx; ngeih dwg haeuj Ranzcang bae cimz cazsuhyouz; sam dwg bae Yihlah Caujyenz yawj vagwzsangh.

Haetde dou lizhai singzgeq Li- gyangh, cidabah gig dwgrengz youq gwnz Cingh Cang Gauhyenz hopheux baedauq, daengz Yanghgwzlijlah gaenq dwg lajbyonghngoenz sam diemjcung. Baez diebroengz diegnamh mbouj bingzciengz neix, sikhaek hawj gou cimzdaengz gij gihou leixhaih gauhyenz, banringz gou ngamq daenj geu buhgengoenq he, seizneix daenj song geu buh lij raen nit ne! Mboujgvaq yawjraen youq fwj daemq mbwn lamz baihlaj, baenz doih baenz doih vaizmauzniuz youq ndaw doengh ngaem gyaeuj gwn nywj; ndupnduq daengz gij hoengheiq seuqsat haenx, ndawsim roxnyinh raeujrub raixcaix.

Gou dwg Vunzcuengh lajmbanj, miz cungj sibgvenq ‘haeuj mbanj riengz sug’ he. Gou daiq yiengh simcingz gingqboiq baedhozfuz byaijhaeuj ranzbaed bae yawjngonz. Mwh boux cawjranz nungzgyahloz hawj gou venj mbaw baengzhahdaz hausak haenx, gou song fwngz hob youq bakaek caemhcaiq ngaekgyaeuj doiq de naeuz “cazsihdwzlwz!”; youq dieg Canggih, gou gaij bak heuh dahdaujyouz guh “Cozmaj”.

Doengzcienjging、Dangzgaj、Nizmajduih doengh gijneix hawj vunz gamjsouh daengz gij vwnzva Cangcuz baenzneix dogdaeg youh ronghsag, youq neix hawj vunz roxdaengz sinyangj dwg yiengh ligliengh hungmbwk he.

Ngoenzde lienzdaemh youz geij dieg, roxnyinh miz di naiqbaeg, gyanghwnz ing youq gwnz mbonq, dauqcup gij feih cazsuhyouz homlili goeklinx haenx; siengj daengz gij va- gwzsangh gwnz Yihlah Caujyenz, couhcinj gou mbouj miz maz gauhyenz fanjying, lij gig nanz ninz haeuj ndiu ne!

Yihlah Caujyenz youq baih saebaek Yanghgwzlijlah sigih 6 goeng- leix, daengx aen caujyenz gvangq miz 13 bingzfueng goengleix. Haetromh naengh ci bae gizde, song mbiengj roen dwg baenz doengh baenz doengh haeuxcinghgoh heurwgrwg. Baihgvaz rad ranzbaed Sunghcanlinzsw hawj mwngz siengjdaengz Budazlahgungh Lahsaz, roxdaengz dieg neix hix dwg dieg cunghgyau swngdi he.

Daeuj daengz Yihlah Caujyenz gaenq raen haujlai hekyouz sien daengz gizde yawj va caeuq guhcaemz lo, Yihlah Caujyenz bingzbwd lumj ciengzdikgiuz nei. Yawj coh seiqhenz, yienznaeuz mwhhaenx raemxmok lij haemq lai, hoeng gyawz dwg nywjheu gyawz dwg vagwzsangh hawj mwngz baez yawj couh baen ndaej ok. Cozmaj fwngz vix dangqnaj naeuz, gij va maj youq ndaw caujyenz couhdwg va- gwzsangh lo. (caengz sat)