Ndwencieng gonqlaeng, givwnh bienq sang, youh laebdaeb doek fwnmoenq, doiq mbawcaz majhung gig miz leih, mbawcaz maj ndaej mwncupcup， heuyauyau. Seizneix, Cauhbingz Yen 16 fanh moux gocaz cingq ngamjhab mbaet mbaw, geij fanh bouxndaemcaz hwnj bo bae nyaengq mbaet mbawcaz.

Cauhbingz Yen diegyouq ndei, gihou diuzgen hix ndei, habngamj ndaem gocaz. Seizneix, daengx yienh ndaem gocaz miz 16 fanh moux, miz 100 lai aen giyez guh mbawcaz, daengx bi sou dak mbawcazhawq 7000 lai dun, cungjsouhaeuj ndaej 8 ik maenz. Seizneix, Cauhbingz Yen miz 8 fanh vunz guh hong mbawcaz, gyoengq nungzminz dangdieg dan hangh mbawcaz souhaeuj bingzyaenz moix vunz couh miz 1550 maenz. Cauhbingz sou mbawcaz lai, mbawcaz cizlieng ndei, ndaej heuhguh “Mbanj Mbawcaz Cungguek”. (Liuz Feih)