●Youq Daihsam Gaiq Cungh- goz Cietgingq Okmoq Lundanz geij ngoenz gonq haisat haenx, Gveilinz Siufungh“Sam Nyied Sam”hawfwen、cietfwen minzcuz ndaej heuhguh“2012 cietgingq buengj Cungguek aen cietgingq swnjcienz conzdungj ceiq ndei”.

(Lungz Vaizyi Couh Vaz)

●Daj haeuj seizdoeng daeuj, Denzlinz Yen youq seizhoengq cujciz mizgven bumwnz haeuj daengx yienh 43 aen mbanj gungzhoj bae gaihcanj saedyungh gisuz beizyin, hawj 4815 boux ginzcung gungzhoj gaemmaenh it daengz song hangh saedyungh gisuz.

(Fungz Cinhyinz Luz Anhbingz)

●Gaenh bi daeuj, Lozcwngz Mulaujcuz Swciyen mboujduenh gyadaih ligdoh roengz ngaenz gensez vwnzva lajmbanj. Ciuq cam rox, aen yienh neix gaenq guhsat daengx yienh 11 aen yangh(cin) vwnzvacan byauhcunjva gensez, lajmbanj yezyiz vwnzyidui gaenq fazcanj daengz 79 aen, yezyiz dijyuzdui 116 aen, duzlungz saeceij byaujyenjdui 30 lai aen.

(Se Danh)

●Geij ngoenz gonq, “Gvangjsih Mbawcaz Yozvei Daihbet Gaiq Lijswvei Daihngeih Baez Cangzvu Lijswvei”youq Vuzcouh Si gawjbanh, youq gwnz hoih, Lingzyinz Yen Yihungz Yauzcuz Yangh ndaej bingzguh“2012 nienz Gvangjsih aen yangh caz canjyez mizmingz”, youq gih raeuz daih’it buek 5 aen“Gvangjsih aen yangh caz canjyez mizmingz”ndawde ciemq aen he, hix dwg Bwzswz Si daih’it aen.

(Loz Caijginz)

●Ciuq gyoepsuenq, Bi’gvaq Lingzyinz Yen daengx yienh gungh swnghcanj cazsauj 4159 dun, beij bi’gyai demhwnj 16.8%, saedyienh canjciz 2.31 ik maenz, beij bi’gyai demhwnj 49.1%, bouxndaemcaz moix ranz bingzyaenz souhaeuj 1.81 fanh maenz, saedyienh demsou 7900 maenz, canjciz、yauyiz dwg lizsij ceiq sang.

(Loz Hihhaij Cwng Senhlinz)