●2 nyied 18 hauh, Lingzyinz Yen Minzcuzgiz cujyau lingjdauj daiq daengxcungq ganbu cizgungh daengz Ya’gyaz Yangh Nungfuz Yauzcuz Cunh caeuq Suijluz Cunh gizdieg ndaem faex ndaem faexlwg. Ginggvaq haenq guh ngoenz he, gyoengqde ndaem faexcoengz lwg daengj 160 go.(Loz Caijginz)

●2 nyied 18 hauh banhaet, Lungzlinz Gak Cuz Swciyen Dwzngoz Yangh Myauzcuz“ciet diuqbo”heijbanh lo. Baenz cien baenz fanh boux ginzcung henzgyawj caeuq ndaw gih rog gih boux gyaez ingjsiengq haenx daeuj camgya, neix hawj aen yangh neix gak cuz ginzcung gvaq cieng engq nauhyied.

(Yangz Dwnghliengz)

●2 nyied 17 hauh, Sanh- gyangh Dungcuz Swciyen Fuluz Yangh Gauh’anh Cunh vunz cien vunz fanh、sing luzswngh nem sing fwen goksasa. 22 aen luzswnghdui daj gij yangh(cin) henzgyaiq Gveicouh nem gih raeuz daeuj haenx doxcomz henz Dahyungzgyangh, haenqrengz ciengq ok go minzcuz doxgiet huzndei, doengzcaez hohfuk bi moq guh saeh swnhleih、saedceij engq ndei.(Gungh Bujgangh)

●2 nyied 15 hauh, Denzlinz Yen Nazlah Cunh boux Yauzcuz ndaw mbanj gak cujciz hwnjdaeuj banh Yauzcuz vwnzva yisuzcez, gyoengq Yauzcuz nem Bouxcuengh daj Yinznanz Vwnzsanh、Funingz、gih raeuz Dava caeuq ndaw yienh daeuj haenx faenfaen laebduenz camgya. Gij vwnzyi donzdui ndaw- biengz neix byaujyenj Yauzcuz vwnzva cezmuz, hawj baenz cien boux Yauzcuz gvaq ciet engq angqyangz vuenyungz.

(Fungz Cinhyinz Luz Anhbingz)

●2 nyied 13 hauh, 2013 nienz“vujdaiz hung mbanj Mulaujcuz”daihseiq gaiq lajmbanj vwnzyi comzyienj youq ndaw yienh vwnzva gvangjcangz heijbanh lo, baez hozdung neix gungh 4 ngoenz, 11 aen yangh(cin) 80 lai aen cezmuz camgya. Neix hawj vunzlai youq ndwencieng ndaej yiengjsouh vwnzyi, vanzlij hawj vwnzyi lajmbanj engq hoengh.

(Moz Vwnzswh)