Nohgaeq. Nohgaeq hamz miz youhciz danbwz gig lai, lij hamz miz youzlauz、gai、linz、diet daengj yingzyangjsu youqgaenj dem, yingzyangj gyaciz ndei gvaq nohmou、nohcwz、nohyiengz, nyinhbouj cozyung cibfaen ndei. Daegbied hab boux yingzyangj mbouj ndei caeuq boux heiqlwed mbouj gaeuq gwn. Gaeqnohndaem dwg cungj gaeq baenz yw ndeu, doiq fuengzceih binghhukngawz bouxlaux gig ndei. Habdangq gwn di nohgaeq caeuq dang nohgaeq ndeu doiq ndang vunz gig miz ik. Danhseih boux danjgucunz sang lai、boux hezyaz sang、boux goengnaengz aenmak haemq ca、boux veisonh daiq lai mbouj hab gwn dang nohgaeq lai. Noh gaeqboux ndaej coi daep hwnjhuj, yungzheih yaeuhfat baenz menhsingq ganhyenz caeuq hezyaz sang fukfat, ndigah mbouj hab gwn lai.

Noh roegdoxgap. Cunghyih nyinhnaeuz, noh roegdoxgap ndaej nyinh bouj ik heiq、giep fung gej doeg, daegbied hab bouxlaux、boux guh soujsuz gvaq、mehdaiqndang、lwgnyez daengj seizcin gwn yungh, caemhcaiq doiq boux ndang haw、boux mehmbwk lwed haw dawzsaeg deng saek、boux gyaeuj ngunh ndang naiq、boux geiqsingq nyiegdoiq miz ceihyw cozyung. Noh roegdoxgap danbwzciz gig lai, yungzheih deng ndang vunz siuvaq supsou. Gij gai、diet、dungz daengj gvangvuzciz caeuq veizswnghsu A、veizswnghsu B、veizswnghsu E daengj hamzliengh beij nohgaeq、nohbya、nohcwz、nohyiengz lai ndaej lai. Moix baez gwn buenq duz couh ngamj, ceiq ndei dwg naengj gwn roxnaeuz aeuq dang gwn, baenzneix gwn cij miz yingzyangj.

Nohdouq. Nohdouq sien oiq, yungzheih deng ndang vunz supsou, nohdouq danbwzciz lai, youzlauz caeuq danjgucunz noix. Cunghyih nyinhnaeuz, nohdouq singq liengz, ndaej nyinh yaem liengz lwed、ik heiq nyinh naengnoh、gej doeg giep ndat. De hamz lonjlinzcij lai, ndaej cangq uk ik ceiqheiq. Boux hezyaz sang ciengz gwn nohdouq ndaej fuengz habbaenz lwed saek, ndaej baujhoh bangx sailwed. Seizcin ciengz gwn nohdouq, ndaej demgiengz rengzndang, hawj noh ndang vunz saed ndei caemhcaiq mbouj biz, hab boux mehmbwk youq seizcin gemjbiz gwn. Aenvih nohdouq singq liengz, ngamq haeuj seizcin mbwn nit mbouj hab gwn, caj daengz mbwn raeuj caiq gwn. Boux seiq gen ga gyoetgyang caeuq boux mehmbwk miz mingzyienj yiengz haw mbouj hab gwn nohdouq.