Simcingz: Aeu baujciz vaiqvued hailangh, swnh’wngq seizcin heiqdaep swngfat daegdiemj, hawj heiqlwed huzswnh. Simcingz nyapnyuk、naemjngeix gvaqbouh rox yingjyangj aen goengnaengz bwtdaep caeuq beizheiq, okyienh mbwq gwn、aek ciengq、baenzsiq daengj siuvaq mbouj ndei cingzgvang.

Yietnaiq: Ciengx daep naek youq haeujninz, seizneix mbangj vunz ciengzseiz ngaizhwnz, aen- daep deng sienghaih youqgaenj. Dingzlai vunz aen’daep miz bingh dwg ngaizhwnz ndaej daeuj, itbuen daeuj gangj, boux ciengzseiz ngaizhwnz dingzlai dwg song da ndinghoengz, neix couh dwg huj daep swng hwnj cauxbaenz. Ndigah, boux baenz yizganh ceiqndei dwg ninzringz diemj cung ndeu, gaej ngaizhwnz.

Yindung: Itbuen daeuj gangj, geiz ganhyenz hozdung aeu dinghdingh ninz gwnz mbonq yietnaiq. Mwh caemcingx seiz ndaej habliengh guh di yindung ndeu, baujciz doengh cingx giethab. Gaej yindung haenq lai, mienxndaej lwed aen’daep cung gawh. Boux daep miz bingh aeu haeujsim yietnaiq ciengx ndang, mienx deng gyanaek fudanh aen’daep le yinxbaenz aen’daep deng sieng.

Gwnndoet: Seizcin wng lai gwn di gijgwn raeuj bouj heiqyiengz ndeu, lumj makdaihcauj、maenzcienz daengj. Coeng caeuq byaekgep hix ndaej hoh daep. Seizcin gwnndoet aeu cit、raeujndat, gaej gwn huqndip huqgyoet caeuq nohma、yinzsinh、luzyungz daengj huqbouj. Laeuj yungzheih sieng daep, aeu siuj gwn di. Boux miz yiengz daep hoengh seizcin yungzheih baenz gyaeuj in、da raiz, ndigah naek youq nyinh yaem bouj lwed, fuengz baenz hezyaz sang caeuq mauhfung. Ndaej senj gwn di gyoijhom、makcengz、makleiz、duhheu、byaekginzcai ndeu dem.