□ Hoz Saubangj sij Cinz Siengzcouh Liuz Gingliuj Cinz Siengzgen hoiz

De gujli gyoengq nuengxsai de aeu baengh rengz ndanggaeuq bae gaijbienq gwndaenj gungzhoj haenx, gauq ndanggaeuq guh hong gvaq ndwenngoenz, hoeng gyoengqde miz hojnanz ne de hix bang. Dauqma Guengjsae guh hong le, de doiq maexyah naeuz: “Gou lij lw geij boux nuengx neix ndwi lo, gyoengqde gwndaenj miz hojnanz, raeuz yaek rap hwnjdaeuj”. Geij boux nuengxsai de mwh lij iq bohmeh couh gvaqciuh lo, daj iq couh souh hoj, maexyah roxyiuj gij simcingz de dang go’daih aeu ciuqgoq nuengxiq haenx, bibi cungj geiq ngaenz dauqranz, bang gyoengqde gyau ngaenzhaeuxliengz guh goengfaen mbouj gaeuq haenx, bang lwg beixnuengx gyau ngaenzhag, hawj biuqbaengz hawj gyoengqde cawx baengz guh buhvaq. Bungz daengz vunzcaen baenzbingh bae yw、 coihguh ranzyouq、cawx cwzvaiz daengj, lij aeu linghvaih geiq ngaenz ne. De miz boux lan he ga deng raek youq 303 Yihyen yw, yihyen lingjdauj naemj daengz ranz nuengx Veiz Gozcingh hojndoq lai, dawz bit ngaenzyw neix dangguh yw bouxbing bouxsieng ndaw budui siu bae lo. Veiz Gozcingh rox le bihbingz boux lingjdauj neix, youh gag gyau ngaenzyw caez bae. Gienh saeh neix gvaq le, de youh caz rox, boux lan de youq ndaw Yen Yihyen yw ga seiz, yiemq bit ngaenzyw ndeu hix youz ndaw yienh bausiuh gvaq, de cix ciuqsoq geiq ngaenz bae boiz hawj ndaw yienh.

Ranz geij boux nuengx de gig gaeuq, ndaw ranz hoengqngaungau, cij miz geij yiengh doxgaiq mbouj dijcienz caeuq hongdawz ndwi. Byawz ndaej ngeix daengz, boux cienghginh ndaw guek rog guek cungj okcoh neix, boux gaem gienz dangj、 cwng、 ginh Guengjsae, youh dwg bouxdaeuz ceiq hung haenx, ranzgeq de hojndoq baenzneix. Vunz yawj daengz neix, bouxlawz mbouj gamjdoengh ne!

(caengz sat)