(ciep geiz gonq)

Ausam mbon daeh ra cienzlingz hawj mehmbwk. Mehmbwk ciep aeu seiq maenz ngaenz oet roengz ndaw daeh bae le, daj ndaw daeh dawz ok song mbaw 10 maenz caeuq mbaw 50 maenz ndaw fwngz cungj ndenq hawj Ausam, gangjriu naeuz: “Duzmax gya gyaeq miz rengz, lwg’eng gwn ndok maj ndang, gwn sat le caiq daeuj caeuq gou aeu gyaeq bw.” Ausam riu naeuz: “Va reuq rwed raemx caiq mbouj hoengz, goenggeq gou gwn lai hix fouz yungh lo.”

Song boux miz gangj miz riu, Ausam ciep aeu ngaenz yawj hix mbouj yawj couh byaij deuz lo.

Daengngoenz gaenq venj daengz dingj gyaeuj, ndaw ranz lij miz hong aeu guh, Ausam dajsuenq gwn vanj faenj he couh dauqbae, de byaij haeuj diemqfaenj, raen boux gai faenj cingq caengh faenj, de heuh bouxcawj gai faenj bang de caengh yawj gij gyaeq de ngamq cawx haenx doh mbouj doh caengh.

“Sam gaen roek cangz.” Boux- gaifaenj naeuz.

“Mbwn ha!” Mehmbwk haenx gwn gou seiq cangz huq lo! Ced meh de! Ausam heiq dwk naj nding bae.

Ausam dajsuenq gwn faenj le couh bae ra mehmbwk haenx suenqsoq, de daj ndaw daeh mbon ngaenz hawj bouxgaifaenj seiz, raen ndaw daeh miz 70 maenz ngaenz, de geiq ndaej gig cingcuj, haetneix ok dou seiz de cij daiq mbaw 50 maenz ndeu, seizneix ndaw daeh baenzlawz lij miz mbaw 50 ne? Ausam geizheih dwk sim diuqboebboeb, lumjbaenz guhcaeg nei. Doeklaeng, Ausam naemj gvaqdaeuj lo, mbaw 50 maenz neix dwg mehmbwk haxbaenh dang guh mbaw 10 maenz bouj hawj de lo. Ausam ndawsim caegcaeg angq naeuz: “Boux vunz sim mbouj cingq, mingh hix mbouj nyiengh ha, raen aenviz mwngz lwi?” Ausam gietdingh mbouj caiq bae ra mehmbwk.

Haeuj dou ranz le, Ausam naengh roengz sahfaz bae, hai gaemxgienz, gij cienz mehmbwk bouj dauq haenx deng de gaem ndaej nyaeuqyatyat, seizhaenx dwg seizdoeng, gyang fwngz de lij miz di hanh, de gag riu swhgeij naeuz: “Mbouj caeg mbouj ciengj, gou vueng gijmaz ni? Caen dwg bouxbag!”

Ausam nyaenx mbouj ndaej, gag riunyumj hwnjdaeuj. De dawz mbaw ngaenz 50 haenx rub ha rub ha ……Sawqmwh, de nyinhdaengz gij cienz neix miz di ndat fwngz, yied rub yied ndat .

“Mehmbwk guh gaicawx hix mbouj yungzheih ha, gou baenzlawz yienghneix dam ne, wnggai doiq dauq hawj de.” Naemj daengz neix, Ausam lumlwt ndwn hwnjdaeuj, dawz ngaenz bae doiq hawj mehmbwk haenx……(sat)