Mwh de roxdaengz Luz Siuyenh soengq daepmou hawj de, de doiq vunzranz naeuz: “Luz Siuyenh dungzci bi’nienz beij gou lij geq, engqgya aeu boujndang, gaiqde baen ndaej wnggai ce hawj de gwn, raeuz mbouj wnggai aeu.” Veiz Gozcingh hawj lajfwngz de dawz daepmou doiq dauqbae, naeuz de ndawsim lingxcingz lo, gyoangq Luz Siuyenh dungzci gvansim de, heuh Luz Siuyenh lai haeujsim re ndang.

Doiq gij doxgaiq vunz soengq daeuj haenx, Veiz Gozcingh doiq vunzranz caeuq vunzhong henzndang cungj miz diuz gvidingh ndeu: Fanzdwg canyouj、 caencik yungh ngaenz cawx doxgaiq daeuj soengq hawj de, aeu guh daengz laex miz bae miz dauq; fanzdwg gunghcangj roxnaeuz danhvei soengq doxgaiq moq roxnaeuz doxgaiq laex daeuj hawj de sawq yungh, aeu doiq dauqbae, mbouj ndei doiq nei couh ciuq gyaqgai hawj ngaenz.

De youq gyang hoih Gih Dangj- veij Cangzveijvei naeuz:“Fanzdwg vunz baihlaj soengq doxgaiq moq daeuj hawj raeuz sawq yungh, nyienh aeu couh ok ngaenz cawx, mbouj nyienh aeu couh gyau hawj bangunghdingh cawjleix. Youq fueng- mienh neix raeuz aeu guhdaeuz bae guhndei, mboujne gij cozfungh mbouj ndei haenx couh yied ngoenz yied yak, lumj raemx dumh haenz nei.”

Miz mbat ndeu, Veiz Gozcingh caeuq Sanghyezdingh boux lingjdauj ndeu doxgangj, mbouj siujsim dwen daengz de gig siengj guh geu buhfaiqsei ndeu, hoeng mbouj ndaejvangq bae haw cawx baengz. Sanghyezdingh boux lingjdauj daj simndei fuengmienh daeuj naemj, heuh bwzho gunghswh baij vunz soengq song cungj baengz mbouj doengz saek haenx daeuj daengz ranz hawj de senj aeu, de genj aeu cungj ndeu, caemhcaiq ciuq gyaqngaenz hawciengz hawj ngaenz. (caengz sat)

韦国清上将主政广西二十年

□ Hoz Saubangj sij Cinz Siengzcouh Liuz Gingliuj Cinz Siengzgen hoiz