Mbwk: Gaihcae ndi miz bib,

Ndaekgik yienghlawz fan;

Mehmbwk ndi miz gvan,

Yienghlawz dang seiqgyaiq.

Sai: Ranz ndi duzgaeqmeh,

Baelawz ce miz gyaeq;

Bouxsai ndi miz maex,

Byawz daeuj leix gyaranz.

Mbwk: Mwngz gangj ndi ciengx mou,

Bakdou youh miz haex;

Mwngz gangj ndi miz maex,

Lwgsaeq daej ndaw ranz?

Sai: Mwngz gangj ndi ciengx meuz,

Gijmaz ngveuh gwnzgyanh;

Mwngz gangj ndi miz gvan,

Bouxlawz vang ndaw mbonq?

Mbwk: Haemhlwenz cien byavanx,

Meuz daeuj gwnzgyanh ndom;

Song swiz vang gwnz congz,

Mwngz nyix song gyaeujgyah.

Sai: Duzmoumeh ndaw gyok,

Okhaex youq bakdou;

Ranznden lwg daej nyouh,

Luenh naeuz gou guhmaz.

Mbwk: Cibbet ndei guhcaemz,

Samcib daengz cix gyoh;

Rumz doeng gauj bekloh,

Va oq lij geij nanz?

Sai: Gofaex youq gyanggemh,

Mbaw sengx cij vih rumz;

Bi’moq dauq dajcin,

Va lij mwn ciuqgaeuq.

Mbwk: It daengq ngeih youh daengq,

Daengq goraeu bangxdah;

Sam daengq seiq youh hah,

Daengq beix gaq giuzfouz.

Sai: Nuengx daengq sam daengq seiq,

Beix daengq ngeih daengq sam;

Song mbiengj sim caez van,

Gaq giuzgang caj nuengx.

(caengz sat)