Yihyoz yenzgiu swhliu byaujmingz, binghsimdaeuz bouxvunz raemhrwnh fat baenz sim geuj in、simlwd mbouj doengz bingzciengz、simdaeuz fwtdai, seizdoeng fatbingh dwg seizhah song boix lai. Doengzseiz, boux baenz gvanhsinhbing youq bi ndeu dauqndaw dingzlai dwg youq ndaw seizdoeng dai bae.

Youq seizdoeng swnghhoz ndawde, fat baenz gvanhsinhbing hougoj cibfaen youqgaenj. Ndigah, boux baenz gvanhsinhbing seiz- doeng wng haeujsim swnghhoz baujgen. Gidij cosih lumj baihlaj:

Daih’it, haeujsim bauj raeuj, gaej hawj dwgliengz. Moix ngoenz yawj densi、gvangjbo, gibseiz liujgaij moix baez rumznit seizlawz daeuj daengz caeuq daeuj geijlai ngoenz, guh ndei fuengz nit bauj raeuj cosih. Boux baenz gvanhsinhbing seizdoeng guh ndei bauj raeuj cibfaen youqgaenj.

Daihngeih,“ninzringz buenq diemj cung, gvanhsinhbing siuj sam cingz”. Miz vwnzyen baudauj naeuz, mox ngoenz ninzringz buenq diemj cung beij boux mbouj ninzringz baenz gvanhsinhbing dai bae fatbinghlwd doekdaemq 30%, yenzyinh dwg caeuq mwh ninzringz hezyaz doekdaemq, simlwd gemjmenh, hawj gyangngoenz hezyaz gauhfungh okyienh duenh seizgan doekdaemq ndeu mizgven.

Daihsam, fuengz “mohgveij seizgan”. Swnghvuzcungh cietlwd yenzgiu byaujmingz, hwnzngoenz ndeu 24 diemj cung ndawde, gyanghaet 6 daengz 11 diemj dwg duenh seizgan fatbingh gipsingq sim saek、fwtdai ceiq gaenj ndeu, deng heuhguh “mohgveij seizgan”. Neix caeuq gyauhganj sinzgingh fat angq、simlwd gyavaiq、hezyaz swng sang、ndaw ndang hauq yangj lai、hezsiujbanj comzrom demlai mizgven. Ndigah, bouxlaux baenz gvanhsinhbing haemq naek haenx, gyanghaet hwnqmbonq le aeu daezgonq gwn yw, gyanghaet gaej anbaiz hozdung daiq lai.

Daihseiq, sam aen buenq faen cung, bauj diuzmingh bingzan. Yenzgiu byaujmingz, mbangj bingh sailwed sim uk gyanghwnz oksaeh roxnaeuz fwtdai caeuq gyanghwnz sawqmwh hwnqcongz ok haexnyouh, aenndang gaijbienq daiq vaiq cauhbaenz yaepseiz sim uk soengq lwed mbouj gaeuq mizgven. Gyoengq conhgyah genyi naeuz: Mwh gyanghwnz ndiusingj seiz, wng sien ietnonx gwnz mbonq buenq faen cung, liuxle hwnq naengh buenq faen cung, caiq song fwngz gaemh bien congz buenq faen cung cij bae ok haexnyouh.