Seizdoeng mbwn nitngaungau, daj ciengx ndang gakdoh daeuj gangj, hab gaenx dawz denz ok dak. Gaenx dawz denz ok dak miz sam daih ndeicawq:

1、Ndaej siu cumx. Ciuq gujsuenq, boux vunz raeuz moix hwnzngoenz aeu daj naengnoh daih’iek baiz ok 1000 hauz- swngh raemxhanh, moix aen singhgiz lij daj naengnoh iemqok 40 daengz 60 gwz youzlauz. Gyanghaemh ninz seiz, denz rox nem aeu gij raemxhanh caeuq youzlauz neix, seizgan nanz le couh mbaeqcumx lo. Danghnaeuz ciengzgeiz hoemq gij denz neix, doiq ndangdaej gengangh cibfaen miz haih. Seizdoeng ginggvaq dawz ok dak ndit le, denz doq sikhaek hoizdauq hawqsauj, vunz hoemq seiz rox gamjdaengz cwxcaih raeujrub, mbouj yungzheih ndaej bingh.

2、Ndaej mied nengz siudoeg. Seizdoeng aenvih doucueng ndaw rug mbouj ndaej ciengzseiz dajhai, ndaw rug couh sanj miz haujlai nengzbingh. Gij nengzbingh caeuq veizswnghvuz gwnz denz rox ingbaengh gij raemxhanh caeuq youzlauz daj ndaw ndang bouxvunz iemq okdaeuj haenx gig vaiq bae sanjlah. Dawz denz ok dak le, swjvaisen ndaw ndit ndaej siudoeg gajdai gak cungj nengzbingh caeuq veizswnghvuz. Ndigah, seizdoeng dak denz gawq ndeiraeuh dangqmaz caemhcaiq ndaej mbaet cienz mied nengz.

3、Ndaej hawj denz lai mboeng unq. Gij denz ginggvaq ndit dak le, engqgya mboeng unq, hoemq youq gwnz ndang rox hawj vunz gamjdaengz engq cwxcaih ninz ndaek vaiq.