平果：农民林下养鸡走上致富门路

Bingzgoj Yen Sinh’anh Cin Danghna Cunh miz 1570 moux reihnaz ndawde couh miz cien moux ndoengfaex. Aen mbanj neix dingq baihgwnz dangjveij、cwngfuj guh aen haucau “aen mbanj ndeu miz cungj binjbaiz ndeu” neix, leihyungh diegfaex swhyenz, youq ndaw ndoeng ciengx gaeq ra diuz loh baenzfouq. Dan bi 2012, aen mbanj neix ciengx baenz it bak fanh duz gaeq, dwg dangdieg mbanj ciengx gaeq okmingz ndeu.

Mbanjdanghna ciengx miz it bak fanh duz gaeq, liz mbouj ndaej cin cwngfuj yungh sim bangcoh.Cwngfuj roxyiuj gyoengq bouxcoz nungzminz mbanj neix siengj cangyez hoeng ngaenz mbouj gaeuq le, couh lienzhaeh Nungzcunh Sinyungse ciq ngaenz hawj gyoengqde, gungh ciq hawj 125 fanh maenz; bang gyoengqde cingj ndei dieg, guh ndei hong “sam doeng”—— doeng loh、doeng raemx、doeng dienh, guh hangh hong neix, cwngfuj couh roengzngaenz 205 fanh maenz. Vihliux gaijgez bouxciengxgaeq gai gaeq vwndiz, cwngfuj yinxhaeuj Fubungz、Fungciengz、 Canhvangz daengj sam aen giyez hung “gunghswh + gihdi +hoh- ciengxgaeq” gij dajciengx mozsi moq neix daeuj gaijgez aen vwndiz gai gaeq.

Bi’gvaq, Mbanjdanghna gaenq miz 90 hoh youq ndaw ndoengfaex ciengx gaeq, gyoengqde bi gai gaeq bak fanh duz, souhaeuj 300 fanh maenz. Nungzminz youq ndaw ndoengfaex ciengx gaeq caencingq demsou lailai.(Vangz Cunhhoz)