上林县大丰镇皇周小学四年级一班 李慧

Bouxvunz mbouj ndaej noix gijmaz ne？Mwngz gojnaengz naeuz dwg gij ndeigwn haenx, mwngz gojnaengz naeuz dwg gij ndei guhcaemz haenx, hoeng gou naeuz dwg“saw”！

Vunzraeuz noix mbouj ndaej saw, saw lumj dwg aen bakdou doengcoh gizndei haenx. De rox daiq mwngz bae gizdieg gvangqlangh haenx, bae yawj gij doenghnaz muengh mbouj raen haenz haenx, bae yawj gij ndoengfaex haenx, bae yawj gij saenzgeiz ndaw raemx；de daiq mwngz bae aen seiqgyaiq gohyoz, bae lwnh mwngz bingzgoj vih gijmaz rox doek roengzdaeuj？Doenghduz vih gijmaz rox dai……

Saw mboujmiz sengmingh？Mwngz itdingh naeuz mboujmiz, hoeng gou naeuz saw miz seng- mingh！Cijaeu mwngz nyinhcaen dijvei, mwngz couh fatyienh de cingq caeuq mwngz gangjvah, lwnh mwngz gij dauhleix laeg haenx. Saw couh dwg aen ranz cang rim baujboiq he, gij yaekseiz hai aen ranz haenx couh dwg doegsaw, de hawj mwngz lumz gij youcouz bae.

Saw hix dwg baengzyoux mwngz, mwngz siengsim seiz, de ndaej nai mwngz；mwngz mbwq seiz, de ndaej caeuq mwngz gangjgoj, hawj mwngz angqyangz hwnjdaeuj.

Neix couh dwg saw——bouxvunz mbouj ndaej noix haenx！

（指导老师：蒙汉奇）