Bonjbauq siusik(gicej Yangz Lanzgvei) 1 nyied 15 hauh, Daengx Gih Minzveij Minzyijveij Hidungj Gunghcoz Veiyi youq Nanzningz ciuhai. Swcigih Dangjveij fusuhgi Veiz Cauzanh fat fung saenq he daeuj, haenh bi’gvaq minzcuz、 minzyij gunghcoz aeu ndaej cingzcik ndei, maqmuengh daihgya bineix engqgya haenqrengz guhhong, hoh daihgya bi moq ndang rengz ndang cangq, daengx ranz vuenyungz. Swcigih fucujsiz Gauh Yungz camgya haihoih caemhcaiq guh cungyau gangjvah. Daengx gih gak si minzveij、minzyijveij cujyin, dangjcuj suhgi, gak yienh(si、gih) minzcuzgiz gizcangj、minzyijban cujyin caeuq Swcigih Minjveij、Minzyijveij gih- gvanh daengxgyoengq ganbu cizgungh caeuq cizsuz gak danhvei lingjdauj banhswj cwngzyenz gungh 320 vunz camgya haihoih.

Gauh Yungz youq gwnz hoih gangj, 5 bi daeuj, gih raeuz minzcuz gunghcoz caeuq minzyij gunghcoz aeu ndaej cingzcik ndei. De giengzdiuh, dangj caeuq guekgya itcig yawjnaek minzcuz gunghcoz, Cibbet Daih cix gaenq guh liux busuj, daezok le fwndou muzbyauh, Swcigih Dangjveij、Cwngfuj itcig dawz coicaenh minzcuz doxgiet dangguh gij hong naek hong youqgaenj laeb dangj cizcwng caeuq cizcwng vih minz. De iugouz daengx gih gak gaep gak bumwnz aeu dawz Cibbet Daih cingsaenz guh cijdauj, maedsaed doicaenh minzcuz doxgiet cinbu mozfangih gensez; daengx gih minzveij、minzyijveij hidungj aeu cungfaen fazveih gij ciznwngz cozyung swhgeij, coicaenh daengx gih minzcuz gunghcoz.

Swcigih Minzveij、 Minzyijveij cujyin Luz Yenbenj daibyauj song veij dangjcuj guh gunghcoz baugau, cungjgez le 2012 nienz gunghcoz, caemhcaiq cungjgez le 5 bi daeuj gij dijvei ndaw minzcuz gunghcoz sizcenj, lij doiq gij hong 2013 nienz caeuq gvaqlaeng duenh seizgan he haenqrengz doidoengh minzcuz doxgiet cinbu mozfangih gensez caeuq guh ndei bonjfaenh gensez daengj guh le anbaiz.

Nanzningz Si Minzveij、Cungzcoj Si Minzyijveij daengj 7 aen danhveij boux lingjdauj youq gwnz hoih guh le gyauhliuz fazyenz.