Bi 1962 ndwen 3, youq gwnz hoih Swcigih Dangjveij It Gaiq Cib’it Mbat Cienzhoih, Veiz Gozcingh youh caensim dwk doiq doengh boux dungzci deng loeng cawjfaenh haenx boizlaex. De naeuz: “Raeuz youq bi 1959 fanjdoiq ‘yougingh’ seiz sienghaih le bouhfaenh ganbu bonjlaiz mbouj wnggai deng sienghaih haenx, cujyau youz Gih Dangjveij dawz cwzyin, dou fucwz gaijcingq. Ngoenzneix gyoengq dungzci naengh youq gizneix, miz mbangj vunz deng bihbingz roxnaeuz cawjfaenh. Fanzdwg guh loeng, dou cungj dawzsiu bae, gyonj loeng couh gyonj dawzsiu, loeng mbangj ndeu couh dawzsiu mbangj ndeu. Dawzsiu cawjfaenh liux le, raeuz baenaj lij yaek aeu doxgiet, vih saehnieb dangj raeuz haenqrengz guh hong.”

Ginggvaq cazseuq bingzfanj, haujlai ganbu、 dangjyenz engqgya roxnyinh daengz dangj dwg genhciz caenleix, coihcingq loengloek, dwg ciuq saehsaed guh saeh gangj vah, neix diuhdoengh le gyoengq dangjyenz caeuq ganbu haengjheiq hwnjdaeuj guh hong. Gij cienzdoengj ndei dangj raeuz hix engq ndaej hoizfuk yamq ndeu.

Guengjsae youq bi 1958 youq ndaw “fanj yougingh boujgoq” seiz dawz Cinz Caili (Swngjveij cangzveij、fuswngjcangj), Vangz Mungcouh (Swngjveij veijyenz, Swngjveij Cujcizbu bucangj), Loz mingz (Swngjveij veijyenz, Swngiveij Senhconzbu bucangj), Liu Yenz (Swngjveij veijyenz, Swngjveij Caizmoubu bucangj), Vangz Hau (Swngjveij veijyenz, Swngjveij Vwnzgyaubu bucangj), Liu Lenzyenz (Swngjveij houbuj veijyenz, Swngj Binghyigiz gizcangj) daengj roek vunz baen haeuj “youbai cizdonz”, haicawz dangjciz caeuq dawzsiu ndaw dangj rog dangj daengx yiengh cizvu. Veiz Gozcingh caeuq mbangj lingjdauj dungzci nyinhnaeuz, doiq gyoengqde veh loeng lo.

(caengz sat)

韦国清上将主政广西二十年

□ Hoz Saubangj sij Cinz Siengzcouh Liuz Gingliuj Cinz Siengzgen hoiz