(Ciep geiz gonq)

Ngoenzlaeng mbwn caengz rongh, maxbang couh gipmuengz ganj roen. Dahsau soengq maxbang ok riengmbanj, maqmuengh gyoengqde bingzan dauqma.

Dahsau ngoenzngoenz muengh bae muengh dauq, gwn mbouj feih, ninz mbouj ndaek. Seizcin binaj daeujdaengz lo, doih maxbang neix youh daeujdaengz aen mbanjlueg neix. Hoeng dahsau mbouj raen daegmbauq riengz doih daeuj, roxnyinh geizheih lo, caengz caj dahsau hai bak cam, bouxdaeuz maxbang mbon gagoenh okdaeuj soengqdauq hawj dahsau, lij naeuz：“Gaej caj daegmbauq lo, de bienqsim lo, bi’gvaq daegmbauq daiq maxbang dawz huq daengz Lahsaz, raen dahlwgvuengz maj ndaej gyaeundei, sikhaek doenghsim hwnjdaeuj, mbouj geij nanz, songde couh guhndei lo, seizneix, de cingq youq gizde yiengjfuk ne, ga goenh neix dwg de daengq gou dawz daeuj doiq hawj mwngz.”

Dahsau raemxda doekbyoeb- byoeb dap naeuz:“Mwngz yaeuh gou, gou roxnyinh daegmbauq mbouj dwg cungj vunz neix.”

Bouxdaeuz maxbang mbouj leix- langh dahsau, fad max ganjroen bae de lo.

Bi daihsam seizcin, doih maxbang youh byaij daengz aen mbanjlueg neix. Bouxdaeuz maxbang gig gyae couh yawjraen dahsau najsug he ndwn youq laj goreiz, de sikhaek nyinh’ok dah neix dwg dahyoux daeg- mbauq. Daengz gyawj le, bouxdaeuz maxbang youh doiq de naeuz:“Lan ha, mwngz gaej huk lo, cungj vunz mbouj gangj liengzsim neix baenzlawz cigndaej mwngz bae caj ne? Caiqnaeuz bi’gvaq daegmbauq gvaq Nizbwzwj baihde bae le, raen dahlwgvuengz Nizbwzwj engq gyaeu- ndei, de youh bienqsim lo, seizneix de cingq youq ndaw ranzvuengz vaiqvwt ne.”

Dahsau raemxdalili han naeuz：“Gou lij ciengzseiz youq ndaw fangzhwnz raen de, roxnyinh ndaw sim de lij miz gou .”

Hoeng mboujguenj dahsau baenzlawz gangj, bouxdaeuz maxbang mbouj wngq de saek coenz, gyoengq vunzdoih hix mbouj miz byawz ngiengx gyaeuj yawjcoh dahsau, boux riengz boux ngaemgyaeuj cing max byaij henz de gvaqbae.

Bi daihseiq youh daengz lo, mwhhaenx, va’ndoi rim bo, mbwnseuq rumzraeuj. Aen mbanjlueg neix youh “doengdengdoengdeng” yiengj hwnj singlingz maxbang. Siengj mbouj daengz dahsau caeux couh youq laj goreiz deq doih maxbang neix. De gvih youq gyang roen, doq daej doq gouz bouxdaeuz maxbang caemh daiq de hwnjroen, dahsau naeuz de lij ciengzseiz loq raen daegmbauq youq aen lueg gyae he caj de ne!

(caengz sat)

Ronghndwen Ok-

daeuj Ronghsagsag

月亮出来亮汪汪

□ Luz Yuzgangh/陆如刚