Denzdungh Yen ginggvaq saedhengz aen guenjleix mozsi moq doengjit gveihva、doengjit cungj binjcungj ndeu、doengjit gisuz neix le, bi 2012, cien moux reih makbohloz sifan gihdi sou ndaej makbohloz 3000 lai dun, ciuq hawciengz gai moix gaen song maenz ngaenz suenq, cungjcanjciz dabdaengz 600 lai fanh maenz, yienghneix, 120 hoh ndaem makbohloz haenx moix hoh souhaeuj 5 fanh lai maenz.

Cozdwngh Yangh Dwnghgauh Cunh Yenzyicangz dwg Denzdungh Yen aen sifan gihdi ndaem makbohloz ceiq hung ndeu, gizneix namhbiz, ndit cuk, hab ndaem makbohloz, ndaem makbohloz gaenq miz 50 lai bi nanz lo. Hainduj, gyoengq nungzminz lingzsing ndaem di, aenvih mbouj rox dajndaem gisuz, canjlieng caeuq souik cungj gig daemq. Geij bi neix daeuj, cwngfuj saedhengz guenjleix mozsi moq le, makbohloz canjyez fazcanj gig vaiq. Seizneix ndaw yenzyicangz ndaem makbohloz mienhcik miz 1500 moux, moix moux ndaej sou 4000 lai gaen, makbohloz aen youh hung youh diemz, ndei gai raixcaix.(Banh Yungjgez)