Veiz Gozcingh caenndang daengz Yunghningz Vujdangz Gunghse gyaep- yawj gij sawqdiemj cazseuq bingzfanj guh hong ndaej baenzlawz yiengh. De caiqsam daengqmaed, hong cazseuq bingzfanj aeu ciuq saehsaed bae gangj vah caeuq guh saeh, hong aeu guh ndaej nyinhcaen, fanzdwg gaxgonq cawjleix loeng le aeu genhgez niujcingq gvaqdaeuj. De lij cingj gij dangjyenz、 ganbu deng ienuengj haenx daeuj hai hoihnaenghdamz, dawzrap lingjdauj cwzyin, siucawz heiqienq gyoengqde, gujli gyoengqde cuengqsoeng swhsiengj, vih hwnqguh hong seveicujyi haenqrengz bae guh.

Yienh Yunghningz miz gienh anq gyajuengj ndeu, bonjlaiz wnggai bingzfanj, hoeng miz vunz naeuz aen anq neix dwg boux diveij lingjdauj ndeu dingh bw, lau bingzfanj liux git daengz visaenq boux lingjdauj neix, yienghneix couh nanznanz mbouj niujcingq. Gienh saeh neix fanjyingj daengz Veiz Gozcingh gizde, de sikhaek ra Swcigih Dangjveij Genhveijvei suhgi Siz Dangz naeuz: “Mboujguenj dwg Yenveij baecinj, Diveij baecinj, vanzlij dwg Swcigih roxnaeuz dwg gou dingh, cungj aeu miz maz gangj maz, deng le couh aeu gengqdawz, loeng le couh aeu niujcingq, loeng geijlai couh niujcingq geijlai, vanzlij hawj vunz hoizfuk mingzdaeuz. Niujcingq anqienuengj, miz maz gangj maz, neix biujyienh ok gij dangjsingq haenq raeuz, mboujdanh mbouj doeknaj, vanzlij riujsang visaenq dem, miz loeng mbouj niujcingq, najmienh bauj mbouj maenh, lij deng bihbingz. Rox loeng mbouj gaij, haenx dwg loeng le engq loeng. Aeu mingh cwngci bouxwnq bauj aen najmienh ndanggaeuq, neix suenq, gijmaz gungcanjdangjyenz? Anqienuengj aeu niujcingq riuz, miz loeng mbouj niujcingq aeu gyaepdawz boux lingjdauj cwzyin.” Genhveijvei dawz gij cijsi cib’it mbat cienz roengzbae, aen anq neix gig riuz couh ndaej gaijgez, hix doidoengh gij hong cazseuq bingzfanj daengx gih ndaej byaij baenaj.

(caengz sat)

Veiz Gozcingh

□ Hoz Saubangj sij Cinz Siengzcouh Liuz Gingliuj Cinz Siengzgen hoiz