Sawgeq geiqnaeuz, “Yinznanz” aen coh neix dwg daj gawqvah Sawgun “Baihnamz fwjgyaeu” okdaeuj. Yinz- nanz dwg dieg gingj gyaeu maezvunz caemhcaiq dwg dieg saujsu minzcuz comzyouq he. Lai bi daeuj, gak cuz beixnuengx youq gwnz gauhyenz cauh ok lai cungj lai yiengh vwnzva ronghsag: 《Ahsihmaj》、《Haj Duj Vagim》doengh gij gojgaeq neix youq ndawbiengz dauqcawq louzcienz;《Henz Mboqmbungqmbaj》hot go neix ndaej cienzciengq geij ciuhvunz; Hot go 《Hekgyae Cingj Mwngz Louz Roengzdaeuj》ndaej hwnj aendaiz bimusiz vanjvei Baekging Auyinvei.

Bineix seizhah, gou riengz lijyouzdonz riengz diuz sienqloh “Dalij— Li’gyangh—Yanghgwzlijlah”bae lijyouz. Mwh dou yaek daengz dieg Gamjguksaet, dingqnyi dahdauj- youz lwnhgangj aen gojgaeq Roengeq Cazmax le, cix rox diuz go 《Ronghndwen Okdaeuj Ronghsagsag》 laxlawz dwg yienghneix ciengq ok- daeuj, roxnyinh aen gojgaeq neix doiq vunzcoz ciuhneix gig miz gyauyuz yiyi……

Gig nanz gaxgonq, Yinznanz dieg vunz Nazsihcuz comzyouq haenx, miz ranz fouqmiz he, boux cawjranz nienzgeq cij aeu ndaej lwgsai, daengx ranz vunz dawz daeglwg dangguh naednyawh ndaw fwngz, gyaez dangqmaz. Mwh lwgsai ndaej 18 bi, maj ndaej mbauqndei youh roxlaex, miz ngoenz he, daeglwg gouz daxboh de naeuz, seizneix de gaenq majhung lo, caemhcaiq nienzgeij daxboh hix yied ngoenz yied geq lo, iugouz dingjlawh daxboh daiq maxbang doz huq bae Lahsaz. Daxboh roxnyinh byaij diuz Roengeq Cazmax neix gig mbouj yungzheih, mbouj rox miz geijlai vunz ngaiz vutmingh youq byongh roen ne! Hoeng baenzlawz cungj euq mbouj gvaq daeglwg, doeklaeng dapwngq de guh bouxdaeuz maxbang.

Seizcin bide, daegmbauq baez daih’it daiq maxbang hwnj roen. Byaij ha, byaij ha, ngoenz he gyoengqde byaij daengz Dalij aenmbanj Vunz- bwzcuz, youq gizde ra diemqninz dingz roengzdaeuj yietnaiq. Gvanbaz diemqninz miz dah sau he bakgvai youh gyaeundei, nienzgeij caeuq daegmbauq ceng mbouj lai. Nienzgeij doxhab hawj song boux coz neix gangj ndaej gig doxgwn, mbouj rox mbouj nyinh songde doxgyaez hwnjdaeuj. Ngoenzlaeng maxbang couh aeu ganj roen bae baihbaek lo, haemhhaenx daegmbauq caeuq dahsau doxiek youq laj goreiz henzranz damzyoux. Daegmbauq daengq dahsau youq ranz caj de, binaj dawz huqlaex ram giuh coux de ma ranz guh bawxmoq, gangj sat, lij gej ndaeknyawh lajhoz okdaeuj soengq hawj dahsau guh huqdingh. Dahsau hix swnh fwngz duet gagoenh okdaeuj soengq hawj daegmbauq. Haemhhaenx, song boux- coz roxnyinh ronghndwen singjsag dangqmaz, roxnyinh gyanghwnz dinj lai lo.(caengz sat)

daeuj