●1 nyied 6 hauh, gicej daj Lozcwngz Mulaujcuz Swciyen Sevei Gohyoz Gai Lenzhozvei ndaej siusik, bonj《Lizsij Mulaujcuz》 ndaej Gvangjsih daih’cibngeih baez sevei gohyoz youhsiu cwngzgoj itdaengjciengj, dwg Hozciz Si bonj saw gag ndaej yiengh ciengj neix.

(Se Danh Cwngh Yijbingz)

●Bi’gvaq, Gunghcwngz Yauzcuz Swciyen daengx bi youq 83 aen mbanj guhsat roensuijniz, roengzngaenz 871.25 fanh maenz, roensuijniz gungh raez 54.94 goengleix. Neix hawj 5411 hoh 2086 boux ginzcung ndaej byaij roensuijniz lo.

(Gyangh Dauh)

●Daj 2008 nienz daeuj, Hocouh Si Bingzgvei Gvanjlijgih Minzcunghgiz cizgiz bang doengh- boux hagseng saujsu minzcuz, hawj gyoengqde ndaej onjsim doegsaw, ciuq gyoebsuenq, gungh miz 25 boux hagseng saujsu minzcuz maenhndei ndaw ranz gungzhoj haenx ndaej bangcoengh, saedyienh le aen muzbyauh“mbouj hawj saek boux hagseng aenvih ranz hoj couh saethag”.

(Vangz Ligenh)

●Vihliux hawj ranzvujbauj bouxgeq“miz ranz youq”, bi’gvaq, Denhdwngj Yenveij Cwngfuj roengz 300 fanh maenz hawj 100 hoh ranzvujbauj bouxgeq hwnj ranzmoq. Dangqnaj, gaenq guhsat ranzmoq lo.

(Vuh Cincungh Vangz Lilanz)

●Bi’gvaq 12 nyied co, Nanzningz Si Hinghningz Gih Hinghningz Segih“ranz minzcuz”cujciz saujsu minzcuz ginzcung gaihcanj ranz minzcuz doxlienz hozdung, gyoengqvunz ndaw gih neix nem saujsu minzcuz liuzdung doengzcaez ciengqgo、diuqfoux、bengcag、dwk gibaizgiuz, gij vunzlai hozdung neix hawj engqgya doxndei.

(Hanz Minj)