Seizdoeng dwg aen geiqciet baenz feiyenz hoengh ndeu, ciepcungj feiyenz yizmyauz couh ndaej mizyauq dwk yawhfuengz baenz feiyenz.

Cawz lwgnyez caeuq bouxlaux aeu ciepcungj yizmyauz le, gij vunz 2 daengz 59 bi buenx miz baenz binghmenhsingq、boux menjyiz goengnaengz deng sieng、boux aenmamx deng sieng roxnaeuz boux deng gvej mamx gvaq cungj wnggai ciepcungj yizmyauz.

Miz geij cungj vunz mbouj ndaej ciepcungj yizmyauz: Boux doiq cungj cwngzfwn yizmyauz lawz cungj miz gominj haenx mbouj ndaej ciepcungj yizmyauz; danghnaeuz gaxgonq ciepcungj cungj yizmyauz neix miz gominj fanjying mbouj ndaej caiq ciepcungj; boux baenz fatndat、gipsingq ganjyenj、binghmenhsingq gip- singq fatbingh wng doiceiz ciepcungj; daiqndang geizgan 3 aen ndwen gaxgonq wng doiceiz ciepcungj.

Ciepcungj le, mbangj vunz gojnwngz miz fatndat、giz bakcim foegnding daengj cingzgvang. Danghnaeuz fatndat youq 38.8 doh dauqlaj, caemhcaiq mbouj raen miz foegnding youqgaenj、insep caeuq gengndongj, dingzlai de gag rox genjmbaeu. Danhseih baez fatndat mauhgvaq 38.8 doh, okyienh hohdaez in、noh insep、hoh in、naengnoh hwnjcimj、baenz cinzmazcimj daengj seiz, wnggai gibseiz bae yihyen duenq yw. Linghvaih, ciepcungj yizmyauz dangngoenz ceiq ndei gaej caemxndang, caemhcaiq mienx deng giz bakcim bungq daengz raemx, fuengz baenz ganjyenj.