Okrog guhhong yaek samcib bi, seng’eiq canhcanh sawsaw, ndwen- ngoenz diemzdiemz soemjsoemj. Yawjraen haujlai doengzdoih ndaej dangguen, ndaej fatcaiz. Dauq yawj swhgeij, gag raen gvaqndaej saemxsaemx saxsax, gijmaz saeh hix guh mbouj baenz, najmong sim cix nyaep.

Biekliz ranzlaux samcib lai bi lo, byonghhwnz ciengz loq raen daxmeh dawz aen daengyouz diemj rongh.

Mbwn fuemx, youq bakdou ranzlaux naenghndwi……

Dinmbwn, fwjndaem duj sonx duj, sonx ndaej baenz benq baenz benq; geij diuz ronghndit daj ndaw geh fwj nyeq okdaeuj, ciemhciemh dwk, ciemhciemh dwk, ronghndit bienq myox lo.

Haenzdah, goliux nye rangh nye, rangh ndaej baenz gyoij baenz gyoij, nyeliux gaen rumz bibi buengqbuengq. Rumz dingz lo, nyeliux duenghsoh mbouj doengh lo.

Dingj ranzcauq, diuz hoenzhau biu hwnjdaeuj, diuz hoenzhau geuj- letlet, menhmenh mbegvangq…… Bangxdah, gyoengq bithau duz gaen duz cwxcaih youz dauqma.

Yawj ronghndit set ok youh myox bae, yawj nyeliux bibuengq youh duenghsoh, yawj hoenzhau geujlet youh mbegvangq, yawj gyoengq bithau cwxcaih youz dauqma…… Baihnaj gou mizseiz myoxmyad, mizseiz ronghsag, mizseiz youh bienqbaenz laepcupcup; ndawhoz mizseiz saemjset, mizseiz haemzngamq, mizseiz youh bienqbaenz diemzsisi……

Yaepyet nyeuxnaj yawj ranzlaux, mbouj rox seizlawz, ndaw ranzcauq daxmeh dawz aen daengyouz diemj rongh lo.

Mehlaux yienznaeuz hwet gungj baengh dwngx, hong, ndangdaej gig ndei, gyaeu baenz goujcib bi lo, gig noix ndaej bingh. Mehlaux seiqvunz cungj gaenx, haet caeux haemh laep, cin ca ndaem cou ganj gvej, gwn haemz gwn hoj mbouj gyangz saek coenz gvaq. Gou……

dawz aen daengyouz de diemj rongh lo, baihnaj gou hix gaen gij rongh daengyouz ronghsag hwnjdaeuj lo!

Daxmeh

又看见母亲的煤油灯亮了