Haetromh “Aensuen Maedlaeh Cunghvaz” Hwngzcouh, go maedlaeh lij duiqnengneng, goengqbya gizgyae gofaex dieggyawj deng mok goemq liux, heiqmok unqnemnem heux youq gwnz haenznaz, lumj caengzsa mbangmbeng ndeu mbinmiegmieg. Nyoengx dou ci, caengz ndaej ngonzyawj gij gingj gyaeu dangqnaj, cix nyouq daengz raq heiqrang sugseg ndeu, gij heiqrang neix mbouj dwg baenz ngeu baenz ngeu, cix dwg gyonj youq ndaw hoengheiq、dauqcawq rangfwt, nditrongh gyanghaet ciuq dwk, gij heiqrang haenx daj ndaw lupva raeujnyinh sanq ok, homsisi, noengznwd youh mbouj get, lumj boux doih doxndei ndeu, caengz gangj vah, couh roxdaengz gij cingz naekna de.

Gou byaij gyawj haenznaz ngaem ndang sijsaeq yawj, mbaw maedlaeh dwg song mbaw doxdoiq maj, lumj faj fwngz saeqset ndeu dak dawz raemxraiz, mizmbangj raemxraiz youq ndaw gyang mbaw caemrikrik, sawsisi, lumjnaeuz iu vunz menhmenh ndoet saek gaemz; mizmbangj cix duengh youq byai mbaw, ronghrikrik, mbwn’gvengq fwj laep de cungj siujsim riri bae ciepcoux. Dingzlai maedlaeh lij lup va yaek hai, gij valup ngamq hai saek di vahau haenx lij miz di saekheu damhdet、yaek raen mbouj raen; gij valup liux haenx, hausupsup seuqsetset, yienghceij gyaeundei, lumj heujciengh diugaek baenz aen daeng va- ngaeux iqet nei, youh lumj dahsau hobbak, naj mongmimi ndoj youq ndaw mbaw heuneu, caemdingh youh ndeiyawj.

Byaengqda muenghyawj, gij va hoenghhwd langh hai de, mizmbangj sohnengneng, gyaeundei rangfwt; mizmbangj doxlienz gyonjcomz, gangj vah nyibnyib; mizmbangj mbeilaux daengj naj bae coh daengngoenz angj hai; mizmbangj va byongh hai byongh haep, lumj yo gij simsaeh swhgeij. Hoeng gij heiqrang singjsien、cienz haeuj ndawsim bae, noengznwdnwd hawj vunz gag laep da, haeujmaez dangqmaz, baezbaez sup gaemz heiq raezrangh ndeu, cungjdwg aeu gij heiqrang singjsien neix menhmenh bae swiq cingh aenndang, dongj deuz nyapnyuk. Ndwn youq ndaw va mbouj raen henzbien neix, lwgda、aenndang、aensim cungj soengswt, vunz, caen maez liux lo, loq miz di fiz hoeng youh roxnyinh singjsag、angqyangz、simmaez…… Hix youq seiz- neix, gou cij rox vunz ciuhgonq vihmaz naeuz vamaedlaeh dwg “sengcingz yiengh gyaeu, seuqset hausik”, hix rox gij ceiqheiq canghsei Gyangh Gveiz Sungdai youq ndaw《Vamaedlaeh》 sij haenx: Coglaeng gou langh bien lizsij gova, couh sij de dwg ndaw biengz rang daih’it.

Youq ndaw fog va gizgyae, miz bouxndaemva ndeu cingq mbaet va. De daenj aen gyaep yiemhmauh gvangq ndeu, diuz gaenhoz ndeu goemq fajnaj lawxlub, cij loh ok fouq lwgda de. Baihnaj venj aen daeh muengx seiqcingq ndeu, gaenq cang ndaej dingz noix daeh va; baihlaeng cix longz geu “buhluiq” saekngaenz、ceijsik guh haenx——Ndit baihnamz ndatfoegfoeg, gij vunz youq ndaw reih guh hong haenx cungj rox.

Gou byaij bae gyawj de cam naeuz: “Dahnuengx, gou bang mwngz mbaet ba?”

De mbouj dingz fwngz, unqswnh han naeuz: “Mbouj yungh law, mwngz mbouj rox mbaet ne.”

Gou riu dwk lij naeuz: “Baenzneix gou hag gonq, couh rox luma?”

De ngiengx gyaeuj hwnjdaeuj lo, gwnz gaenhoz, fouq lwgda ronghdikdik. De mbon ok gaem valup ndeu hawj gou yawj, youh vix dwk caz nye va dangqnaj naeuz: “Yaek mbaet cungj neix, byai valup ngamq hai di limqva ndeu. Mbaet bae ranz, mbe cuengq yaep ndeu, ganj ndaej gib banringzgvaq sanq heiqrang, mwhhaenx aeu daeuj guh cazva, ceiq rang ceiq ndei.”

Gou ciuq de guh, aeu ai lwgmeh caeuq lwgfwngzyinx, menhmenh nyaeb ganjva heu oiq, menhmenh mbaet, duj valup ndeu, couh baenzneix mbaet ndaej ngaihngoz, yaep ndeu, gop valup ngamq mbaet ndeu, loq gyoetgyet, dinghdingh youq ndaw angjfwngz gou, doengh duj valup neix hausup lumj naedcaw, ronghrik unqnem. Lajdaej valup lij miz gyaengh ganj heu iq ndeu, giz goenq de miz raemx iemq okdaeuj, lumj gij vah diemz caengz gangj ok bak, danghnaeuz ngaem daengz gyawj menh nyouq, lij nyouq daengz di heiq homngeu.

Dou doq mbaet valup, doq gangjgoj. De lwnh gou nyi, de dwg vunz Bouxcuengh, ndaw ranz geij daih vunz cungj ndaem maedlaeh, gaenq youq mwnq dieg neix dajndaem geij cib bi, bibi 4 daengz 10 nyied, de couh guh gij hong mbaet valup lai, haet haemh cungj youq ndaw reih nyaengq hong. “Ndwen lawz mbaet gaiq reih lawz, gaiq reih lawz va gaeuq hom, gou rox liux caez ni.” “Mbaet valup yaek caeux di, banringz ndit ndat lai, va reuq bae, valup couh mbouj gaeuq hom……” De menhmenh gangj, hoeng yawj ndaej ok de gig ndiepgyaez、sugrox benq diegdeih neix. Dahnuengx gungq hwet youq ndaw cazva nyaengqnyatnyat, song faj fwngz gvailetlet mbaet va mbouj dingz, ngoenz dem ngoenz guh gij hong neix, gou nyinhnaeuz, mbaet vamaedlaeh mbouj dwg ciengx bak ndwi, engq lumj guh yiengh hong caemrik、yiemzrwd ndeu, dwg bouxndaemva caeuq dujva doxndei doxrox, doengh duj valup deng genj bae haenx, cungj dwg iekdingh gvaq, mwh duj valup dwk roengz ndaw daeh muengx bae, cix dwg daj ndaw doengh haeuj daengz ndaw biengz bae.

Hwngzcouh ndaem vamaedlaeh daj Dunghhan Sihhan hainduj, 20 sigij 70 nienzdaih geizbyai hainduj ndaem baenz benq baenz benq maedlaeh songmbaw. Bi 2024, dan dwg vamoq couh ndaej 11 fanh dunh, daengx guek gyonj liux ciemq bet cingz doxhwnj.

Maedlaeh yienzbonj dwg doenghgo rog guek, ciuq ndaw saw lizsij geiqsij, caeux youq Handai de cix daj aen guek Bohswh caeuq Yindu gaeuqgeq, daiq dwk gij heiq rangfwtfwt dieg wnq, daeuj daengz Cungguek. De lumj boux guh hong vaigyauh unqswnh ndeu, aeu va gangj leix, guhcingq gij vwnzmingz Baihdoeng Baihsae doxgyau, youq ndaw vwnzva Cungguek, aeu daeuj dajbeij “seuqcingh” “simsoh” doengh gij hamzeiq ndei neix. Seizneix, youq Bazgvei benq dieg gvangqlangh fouqmiz neix, de gaenq cap rag roengz namh bae laeglumx, ra ndaej giz diegyouq mwnhoengh.

Ndawbiengz geijlai gyaeu baenzlawz ngeix, aeu simdingh bae naemj cij roxdaengz. Vunz ciuhgonq haenh de “lajmbwn rang daih’it”, de mboujdan sanq youq ndaw reih va, lij souyo youq gwnz byai lwgfwngz、ndaw sim bouxguhhong, hawj gyoengqde muengh raen diuzroen baenaj. Mwh ranz yaek laep, daeng ngamq ciuq rongh, cimq cenj caz vamaedlaeh ndeu, yawj limqva youq ndaw raemx mbe hai、caem bae fouz hwnj, dinghdingh caj cazva sanq ok heiqrang, menhmenh ndoet gaemz ndeu, ndaw bak mboujdan miz heiq varang, engq dwg saenzheiq——Haenx dwg gij ndei maedlaeh yungh rengz liux, bae supsou nditrongh、couxaeu fwn caeuq raemxraiz cix guhbaenz. De aeu doengh gij doxgaiq mbwn deih soengq hawj haenx cauh ok heiqrang, mboujdingz bae biensij biensei Hwngzcouh benq dieg gvangqlangh naek- na、raeujrub neix.