It

“Mbatneix biengj goeng Meijdangz dwg mbanj raeuz banh baez begsaeh youh hung youh ceiq nauhyied ndeu. Goeng neix saedcaih dijndaej yienghneix biengj de!” Vunzmbanj cungj yienghneix naeuz.

Daxboh dwg boux vunz daudwz ndei mingzmuengh naek ndeu, baezneix, danghnaeuz diuz lingzhoenz daxboh youq gwnzmbwn, yawjraen dou geij beixnuengx doxrumj doxram biengj de, yawjraen beixnuengx、vunzmbanj bouxboux haeujhenz, boux bae gyae guhhong mbouj ndaej dauq haenx cungj denva dauq， heuh vunzranz bang de lai dwk cenj laeuj hawj daxboh, lai cang baez yieng hawj daxboh; boux daeuj gwn haeuxcaeuz haenx lai ndaej ra dieg naengh mbouj miz, ra dieg ndwn mbouj cawq, daxboh haengjdingh naeuz:“Ca mbouj geijlai! Ca mbouj geijlai! Yienghneix gou bae da laep lo, onjsim lo.” Gangjsat, de haengjdingh sim laemxlele dwk bae gwnzmbwn ra daxmeh seiq bi gonq couh gvaqseiq haenx.

Youq ranz gou, “ca mbouj geijlai” coenz vah neix, dou bouxboux cungj dingq gvenq lo. Mboujguenj dou bouxlaux bouxiq, danghnaeuz dou gingq bouxlaux gyaez bouxiq; danghnaeuz vunzmbanj cienz dou guh saeh hab cingz hab leix; danghnaeuz dou doegsaw cingzsik ndei, ndaej lingx ciengjcang daiq va hoengz dauq ranz; danghnaeuz dou guh hong oksaek miz goenglauz, bingzndaej senhcin, daxboh couh doiq dou gangj:“Mbouj loek! Mbouj loek! Yienghneix cij ca mbouj geijlai ma! Ca mbouj geijlai ma!”

Daxboh lij lix seiz, de mbouj haengj gangj coenz vah neix, hoeng coenz vah neix dauqfanj lumj geu oen nei faet dou byaij baenaj, son dou guh vunz guh saeh; hix lumj diuz cik nei dag dou guh ndaej baenz mbouj baenz; lumj bit caizfouq yungh mbouj liux mbouj caenh nei, hawj dou yiengjyungh; engq lumj aensauq boq dwk caenh dou okrengz guh ndei guh ak.

Ngeih

Daxboh lij iq couh mbouj boh mbouj meh, mbouj ranz mbouj riengh, hix mbouj beix mbouj nuengx, ra gwn mbouj raen daenj, gwn haet mbouj raen haemh, bungz cai bungz nanh gag rap, nditndit ndatndat gag bomz, baez ngeixdauq daengz gij goj neix, daxboh cungj raemxda roengzyagyag. Hojsik bakbit gou bumx, sij mbouj ok gij haemxhoj haenx fanh faen cih it ngeih.

Lauheiq dwg lau dou byaij diuz roen hojndingnding de, lauheiq dwg lau dou guh vunzrwix、deng vunz haepha, dou geij beixnuengx lij iq, daxboh couh gaem dou gig ndaet, mbouj cinj dou benz byasang, hwnj byaifaex; mbouj cinj dou caeuq bouxlaux doxdingj; mbouj cinj dou benz ciengz ranzhag; mbouj cinj dou deuzhag; mbouj cinj dou bae mbit gij mak ranzhenz, euj gij oij ndaw mbanj; mbouj cinj vat gij lwgsawz ndaw doih daeuj sez…… Roxnaeuz byawz famh, couh deng daxboh hwnj dangz “cwngcigo” ndeu.

Daxboh daengx bi saet gwnz saet laj, ngoenzngoenz buekmingh laeb cien、guh canghfaex, ra ngaenz ciengx lwg goq gya, de raen lai rox lai, yienznaeuz swhgeij dwg boux lwgdog, hoeng de lwgsai lwgmbwk bouxboux cungj goq daengz hung, cawzliux cejdaih caeuxcaeux couh mbouj doegsaw, dou roek beixnuengx doeklaeng cungj ndaej haeuj ranzhag doegsaw, de mbouj miz yawj naek lwgsai yawj mbaeu lwgmbwk, neix youq seizdaih gwn hoj gwn haemz haenx caen dwg nanz guh ndaej daengz a!

Yienznaeuz daxboh lij iq couh mbouj miz vunz son’gyauq, beizheiq gaengh, hoeng de coengzlaiz mbouj dwk dou gvaq, engq mbouj ndaq roxnaeuz hoenx daxmeh gvaq, vunz naeuz “bouxmiz cix gangjgoj, bouxhoj cix doxndaq”, hoeng daxboh cungj caeuq dou baij saehsaed、gangj dauhleix, daezsingj dou gaej guh iu guh vaih, aeu caeuq vunz guhndei, cungj son dou cijmiz doegsaw ndaej gaijbienq minghhoen, de lij ciengzciengz caeuq dou lwnh seiqgyaiq gyaeundei baihrog, ndigah, dou ceiq maij dingq gij vah daxboh.

Vihliux byaij ok lajmbanj haemzhoj haenx, vihliux ak gvaq vunz, dou geij beixnuengx doegsaw gig roengzrengz, gwnzmbwn miz lwgda, yawjraen dou sinhoj, hawj dou bang lwg hoj lwg haemz neix ndaej fonjndang lo.

Gaxgonq ranz gou sam daih cungj dwg bouxguhhong, mbouj miz byawz ndaej okcot gvaq, daj 80 nienzdaih haidaeuz, ranz gou laeglemx fatseng bienqvaq: 1980 nienz, daeggo gou camgya gauhgauj gauj ndaej Nanzningz Suijden Yozyau, 1982 nienz bizyez, faenboiq daengz Bwzswz Si Suijden Sezgiyen, baenz ranz gou boux daih’it ndaej gwn haeux baihrog; 1983 nienz, gou gauj hwnj Bwzswz Minzcuz Swhfan Yozyau, bizyez le dang lauxsae; 1985 nienz, cejsam camgya ganbu cauhbin gaujsi, gauj ndaej Dungzlauj Yangh Fulenz; 1989 nienz, dahnuengx iq gauj ndaej Bingzgoj Lijyez Gunghswh dang boux gunghyinz cingqsik.

Daj geij bi de hwnj, dou boux yawj boux roengzrengz guhhong, boux yawj boux baenzgya seng lwg, cawx ranz cawx ci, boux gaen boux daiq bawx daiq gvan, daiq lwg daiq lan doxdauq ranz yawj bohmeh, hawj bohmeh cimz daengz gij saedceij diemzsubsub haenx. Baez daengz seizneix, daxboh cungj umj boux lan iq neix, cup boux laej iq haenx, sim- angq dwk bak haep mbouj ndaej, cungj naj longxriu dwk ngaek gyaeuj diegdieg naeuz:“Ca mbouj geijlai! Yienghneix ca mbouj geijlai!”

“Hi! Gou mbouj saenq! Gij lwg daeg Vangz Meijdangz baenzlawz ndaej gwn haeux baihrog ne? Gou mbouj saenq!”

Raen gou geij beixnuengx boux gaen boux vit ga namhboengz gwn haeux baihrog, hainduj, bouxlaux ndaw mbanj cungj mbouj saenq, gyoengqde naeuz：

“De boux lwggyax ndeu, duzma lijmiz maet bw, de gyanq gvaq duzma bae, mbouj boh mbouj meh, mbouj beix mbouj nuengx, de ndaej ing bouxlawz?”

“De seng caet boux lwg, mbouj dai iek cungj ndei lo, de baenzlawz lij ndaej goq bang lwg neix doegsaw dem, fangzhwnz loba?”

“Bouxboux cungj okcot, caen miznaj lai lo! Laudwg cojcoeng deng daihcangq ba? Mohcoj mauh oenqheu loba!”

Gyoengqde guhlawz roxdaengz, neix dwg daxboh yungh caenh rengz ciuhvunz cij guh daengz!

Gyoengqde hix mbouj rox, mboujguenj dou guh ndaej baenzlawz ndei, daxboh cungj lumj gaeuq nei dawz ndaet dawz gaenj dou, de cungj son naeuz：

“Gaenx mbouj miz goj imq, gik mbouj dai goj iek.”

(1)