Ngoenzlwenz banhaemh, daj henzgyawj gou cienz daeuj sing heuh lwg ma ranz ndeu, gij singyaem haenx, ndei dingq youh unqswnh, rwenzrwd youh setsak, yaepyet couh hawj gou ngeixdaengz mwh lij iq.

Mwh lwgnyez, ndaejgeiq daengngoenz doek bya seiz, ndaw mbanj couh seiqlengq seiqbaih ndaejnyi meh heuh lwg ma ranz:

“Daeggyaeq——a——youq gizlawz ha——ma ranz lo—”

“Dahdauz ha——vaiqvaiq dauq ranz lo—”

Gyoengqde hemq lwgnyez, boux beij boux sing sang, sing beij sing raez, lumj lau lwgnyez swhgeij dingq mbouj nyi nei. Ndaejgeiq seizhaenx, ndaw mbanj ceiq leixhaih、doxndaq ceiq yak dwg Yahyinz, gij sing de heuh lwg de dauqma daengx mbanj ceiq sang, gij sing youh set youh raez youh lienz, nyex ndaej vunz ndaw mbanj dingq le, couhdwg gaenq hai bak heuh le hix dingz roengzdaeuj, caj de heuh gvaq le cij heuh. Yienghneix de dingq le couh naeuz mwngz heifouh de, yawj mbouj hwnj de, de couh yaek caeuq mwngz guh ciengz ndeu, ndaq mwngz ndaq daengz cien coj fanh daih bae. Ndigah, gij vunz ndaw mbanj raen de couh byaij deuz, liz de gyae’gyae bae.

Ndaejgeiq doeg siujyoz seiz, hagdangz couh youq henz ranz de, dou ciengzseiz dingqnyi de geij ngoenz couh caeuq gyabuz de doxndaq, ndaq hwnjdaeuj couh dwg sam ngoenz sam hwnz, mbouj dingz mbouj duenh. Dangseiz gyoengq lwgnyez dou cungj gig maij dingq gyoengqde doxndaq, dou bang lwgnyez ndeu bae daengz henzranz de, dingq gyoengqde doxndaq, dingq dwk dingq dwk, saekseiz dingq gyoengqde ndaq daengz gij vah haeu vah naeuh haenx, bang lwgnyez couh riu hwnjdaeuj, nyex ndaej Yahyinz dawz gaiq sauqbaet daeuj gyaep gyoengqdou, gyoengqdou couh lumj bang rwi nei buet sanq dauqbae hagdangz.

Seizneix siengj daeuj, cingqsoq Yahyinz cixdwg mbouj yungzheih bw. Mwh Yahyinz lij coz, boux gvan de bae mbutmeiz deng dienh dai youq lajcingj, ce haj boux lwg iq hawj de ciengx, gij saedceij de gvaq hoj gvaq haemz. Aenvih gyabuz mbouj rox sim de, youh deng saedceij haemzhoj daeuj nap, hawj de beizheiq guengzyak, baenzneix couh caeuq gyabuz de miz ngaekngeu. Hoeng mboujguenj baenzlawz yiengh, de lij gig gyaez haj boux lwg de, de mbouj hawj haj boux lwgnyez lumj daxboh de baenzneix mbouj raen. Ndigah, baez daengz banhaemh, de cungj heuh lwgnyez bae ranz, cigdaengz bouxboux ninz ndaek de cij cuengqsim.

Mwh iq, cungj roxnyinh daxmeh hemqhemq dwg saeh bingzciengz, mizseiz cungj lij ienq daxmeh dem. Meh gou, dwg boux rox dauhleix youh mizsim ndeu, de ciengzseiz gwn haeux gvaq liux cij son’gyauq gyoengqdou, bingzseiz gangjgoj, de cungj aeu bouxwnq daeuj beijgangj. Ndigah, youq mwh daxmeh caen mbouj miz banhfap, de cij haising ndaq dou donq ndeu.

Daxmeh gou caeuq daxmeh bouxwnq ityiengh, cungj gyaez youq bakdou couh cuengqsing hemq gyoengqdou, dou mizseiz dam guhcaemz, couh gyajcang dingq mbouj nyi, roxnaeuz couhsuenq dingqnyi le, hix nanznanz cij dauqbae. Miz baez ndeu, gou aenvih caeuq gij baengzyoux wnq bae aen daemz mbanj baihrog youzraemx, mbwn laep le cij dauqma, gou lau daxboh fad gou, couh ndoj youq ndaw doifwnz mbouj okdaeuj. Haemhhaenx, daxmeh dawz daengloengz youq luengqhongh ndaw mbanj ra gou, de doq ra doq hemq:“Siujveij ha——Youq gizlawz ha——Vaiq ma ranz ha——” De heuh sing dem sing, hemq mbat dem mbat, itcig daengz daxboh itheij hemq gou, gou cij daj ndaw doifwnz okdaeuj. Daxmeh umj gou gvaqdaeuj, raemxda lae okdaeuj lo, de sing saenzdedded doiq gou naeuz:“Lwg ha, mwngz rox daxmeh you mwngz lwi? Mwngz mbouj ndaej yienghneix ha.” De doq daej doq uet gij raemxhanh gwnz najbyak gou.

Mwh iq， manz dwg bonjsingq lwgnyez, gou hix mbouj linghvaih. Ndaejgeiq najmbanj miz aen daemz ndeu, ndaw daemz miz geij diuz faex hung, gij faex haenx miz haj、roek mij raez, dingqgangj, gaxgonq guh ranz dwg yungh daeuj guh saeu, cuengq haeuj ndaw daemz bae cimqceh, yienghneix couh mbouj caiq miz moed dwk. Seizhaenx, ndaw daemz dwg aen diegangq gou, gou baenzngoenz ceh youq ndaw daemz, caeuq lwgnyez lai aeu gij faexsaeu bae guh ruz vad, aeu diuz faex iq ndeu daeuj guh fagcauh, youq ndaw daemz vad ruz doxdax, gig angq gig mizyinx.

Daengz banhaemh lo, ranzranz cungj dingqnyi daxmeh heuh daeglwg swhgeij dauq ranz, hoeng gou couh dingq mbouj raen daxmeh gou heuh gou dauqbae. Yienghneix, gou swhgeij gag ma daengz ranz, cij rox daxmeh baenz bingh lo. Gou daeuj daengz henzmbonq daxmeh, raen daxmeh fatndat fatnit, cingq ninz youq gwnz mbonq gongzrwgrwg. Daxmeh raen gou dauq lo, de sing iq doiq gou naeuz:“Lwg ha, meh baenz bingh lo, mwngz aeu roxsoq, mbouj hawj meh ngoenzngoenz heuh mwngz lo, mwngz ndaej mbouj ndaej bang ndaw ranz guh di hongranz? Ndaej mbouj ndaej hawj gou mbouj causim lai?” Gou dingq daengz gij vah daxmeh, ngaem gyaeuj roengzdaeuj, daj seizhaenx le, gou dingq gij vah daxmeh, cuengqhag couh bae aeu byaekmou, ngoenz singhgiz couh bae gip fwnz, lij dawz doengjfaex iq bae rap raemx.

Doeklaeng, gou ok baihrog bae doegsaw lo, caiq dingq mbouj nyi gij sing heuh lwgnyez ranzmbanj haenx, caiq mbouj dingq nyi sing daxmeh. Seizdoeng daeuj lo, gou daj ndaw siengfaex dawz gyoengq buhdoj moq daxmeh guh hawj gou haenx okdaeuj, souj sei “meh dawz mae nyib buh, hawj lwg youz gyanghhuz. Yaek bae nyib baenz gyoengq, soengq lwg raemxda lae. Go’nyaj geij conq sang, rox seizcin aencingz” haenx ciemhciemh nyoengx hwnj simdaeuz， gij yienghsiengq daxmeh sikhaek yienh youq dangqnaj gou, gou baez ngaem gyaeuj, gij siengjniemh couh lumj raemxrongz bongh okdaeuj.

Ndaejgeiq doeg cuhcungh bi daih’it, gou caeuq geij boux doengzhag bae rog hagdangz benz bya, aenvih gwnzbya miz haujlai lwgnim, gou gag bak ngah, couh gag liz doih, bae gip maknim gwn. Doeklaeng, hujgeiq ra gou mbouj raen, couh roengz bya bae hagdangz ra banhcujyin daeuj itheij ra gou. Banhcujyin dwg boux lauxsae mehmbwk ndeu, ndaej seiqcib lai bi. Dangseiz, aenvih gou ra mbouj raen doih, loeng roen lo, yied bae yied gyae. Banhcujyin caeuq geij boux lauxsae hwnj bya lo, de hawj geij boux hujgeiq gou daiq roen, doq cazyawj ndaw ndoengfaex doq heuh coh gou.

Ciemhciemh, gou dingqnyi gij sing banhcujyin, gou dingz roengzdaeuj lo. Caiq sijsaeq dingq, caen dwg lo. Seizhaenx, gou roxnyinh gij sing neix, caeuq sing daxmeh gou hemq haenx ityiengh, youh nduen youh rwenz. Gou “va” sing ndeu daej okdaeuj, siengj mbouj daengz gou youq baihrog hix miz vunz lumj daxmeh gou nei gvansim gou, in- gyaez gou.

Banhcujyin dingqnyi gou daej, sikhaek buet gvaqdaeuj, rag fwngz gou naeuz:“Mbouj lau mbouj lau, lauxsae daeuj lo!” Yienzhaeuh, aeu genbuh de uet gij raemxhanh gou, gaem fwngz gou byaij roengz bya lo.

Gij ngeix ranzmbanj couh lumj gyoengqmuengx dwkbya ndeu, ciengxlwenx roemj youq gwnz gyaeuj gou; Singmbanj dwg lumj aen mboqraemx ndeu, ciengxlwenx youq ndaw sim gou lae mbouj dingz. Seizneix, daxmeh bae lo, gou ciengxlwenx dingq mbouj ndaej nyi gij sing de heuh gou, dingq mbouj ndaej nyi gij vah de son’gyauq gou.

Gyanghwnz caemrwdrwd, gou cijndaej ndwn youq diegrog yawj coh ranzmbanj, yungh siengjniemh daeuj mad bingz gij youheiq ndaw sim.

Riengz seizdaih baenaj, seizneix gyoengq lwgnyez geij bi cungj aeu soujgih daeuj guh- angq, engq mbouj yungh gangj dwk dienhvah lo. Seizneix, caiq dingq mbouj nyi gij sing daxmeh ndwn youq bakdou heuh lwg dauq ranz. Hoeng youq ndaw sim gou, gij sing neix ciengxlwenx diuqdoengh……