Raqraq rumzcin homvan haenx ci gwnzbiengz heuswdswd，hix ci sim mwngz sim gou raeujrubrub，dangqnaj gizgiz ronghsagsag……

Go’nyaj iq heusausau，youq lajdin banhraih，mbaw nyaj heuoiq bibuengq youq ndaw rumz biufefe，naednaed raemxraiz sij mbouj ndaej doek. Go’nyaj iq riu le，ciepcoux ndit gyanghaet rongh ndei；godauz henzndang laeglemx haiva，longxriu gyaeundei dangqmaz，ciuyinx duzmbaj laisaek ndonjgvaq fwjmok hau. Diuz rij fubfed lae gvaq lajmbanj，“dingding dungdung” ciengqgo，raemxrij riu le，buet coh doenghnaz gvangqlangh.

Ngoenzneix，mwngz byaij gwnz roen，dwg mbouj dwg najriu hwnjdin？

Haetromh hwnqdaeuj，ndwn youq dangqnaj aengingq，caemrwgrwg doiq bonjfaenh riu mbat ndeu，vut loqdwglau haemhlwenz gvaq raeblaeng，ngoenz moq haidaeuz le. Byaij gwnz roen，bungq daengz vunz najmoq，hix doiq de riu mbat ndeu，camndei de mbat ndeu；caeuq baengzyoux caemhyouq，aeu najriu unqswnh，rag loqsiengj song mbiengj daeuj gyawj…… Daengngoenz doekcongh，yungh najriu cinghseuq caensim mwngz soengq moix benq fwjgyaepbya bae，yunghsim soengq moix aen doengxhaemh bae.

Najriu，lumjbaenz aen daengngoenz ngamq hwnj rim senggei，hawj moix aen sengmingh cingq majsang raeujrub.

Najriu，lumjbaenz benq nditfwj gyaeundei，ciuqrongh moix aen rizdin dauqma ranz.

Najriu，aeu ok caensim，mbouj gouz bauqdap saek di；aeu sim’aek lauxsaed，mbouj aeu daegdaengq guhyiengh；aeuyungh dwg simgyaez，aeuyungh dwg okrengz……

Banhaemh daeuj daengz， ndwenngoenz lauheiq miz mbangj laepngau haemzhoj，cijaeu miz simgyaez，caensaed najdoiq，najriu couhdwg aen daengdap mbouj ndaep ndeu，de aeu gij yienghceij feizlueg ruemx dawz rogdoengh，ciuqrongh diuz loh baihnaj mwngz. Doekfwn le，simcingz mwngz lauheiq dwg sieng’in yienghneix yienghhaenx，hoeng cijaeu gag saenq bonjfaenh，najriu couhdwg aen liengj hung gang hwnj gwnzmbwn mwngz，hawj mwngz byaijgvaq moix aen ndwenngoenz rumz geuj fwn doek.

Riunyaen，dwg fag giemqsongbak ndeu，ndaej gvejgat diuz cingzngeih caen neix；riugae，dwg gaenj cim doeg ndeu，ndaej coeg byoengq loqsiengj mwngz caeuq gou. Mbangjbaez baknaek hix dwg boengz raemxgyaeng ndeu，gvaq saedceij lumj mbaw fanruz nei hai mbouj hwnj.

Mwh mwngz guh baenz gwn，gaej daekeiq fwngfwng, angqriu youq ndawsim couh ndei，dawz yienghsiengq ceiq gyaeundei najdoiq rumziq，soengq hawj gyoengqvunz henzndang mwngz；mwh mwngz guh saetbaih，gaej doeknaiq，hix aeu najriu，yungh raemxda swiq caenh gij dungxliengz，youq gizlawz laemx couh youq gizlawz bin hwnj.

Ngoenzneix，mwngz angq riu lwi？

Doiq baengzyoux hawj mbat riu cingh ndeu，doiq bohmeh hawj mbat riu caen’eiq ndeu，doiq lwgnyez hawj mbat riu sienh’eiq ndeu， mwngz couhdwg boux vunz gwnzbiengz ceiq vaiqlag、ceiq vuenyungz ndeu.