Daengz laux hag Sawcuengh,

Gwn haeuxdonq hix van,

Ngoenz ndaejhoengq youq ranz,

Lumj iek dam gwn haeux.

Hag caeuq lienh doxgap,

Yiengj vaiqlag haujlai,

Ciengzciengz lumz gwn ngaiz,

Caen dwg maez bae liux.

Aeu Sawcuengh raiz fwen,

Aensim vuen raixcaix,

Sawcih ndei dahraix,

Sawcuengh daihdaih cienz.

Ngeix haeuj fwen Sawcuengh,

Cuengq haeuxdonq hix miz,

Lumj haeuxcid guhciz(ceiz),

Mbouj doxliz nem dwk.

Aeu Sawcuengh raiz fwen,

Geij ndwen daeuz baez gauj,

Youh ndaej ngaenz demhaeuj,

Ndawsim raeuj dangqmaz.

Sawcuengh dwg vahmeh,

Deq raeuz bae swnjcienz,

Gij fwen seiq loeg liemz,

Cienz ndaej bae gyae’gyangq.

Aeu Sawcuengh raiz fwen,

Fwen raeuz cienz cien leix,

Vunz diegseng haengjheiq,

Son vunz eiq mbanjranz.

Sawcuengh dwg vahmeh,

Gaej sajdeq vunz caez,

Rox gangj caengz suenq ndei,

Rox raiz bae cij ngamj.

Ngaenzgauj mbouj yawj naek,

Sawcuengh raek mbouj baenz,

Vwnzva minzcuz hwng,

Sawcuengh caen youqgaenj.

Raeuz dwg vunz Guengjsae,

Ciengzseiz gangj Vahcuengh,

Sawcuengh aeu hwngvuengh,

Mboujduenh bae ciepcienz.

Gou maij Sawcuengh lai,

Mbouj gwn ngaiz hix nyienh,

Gangj Vahcuengh mbouj bienq,

Ngoenzngoenz yiengj angqfaengz.

Nyez hag Sawcuengh lai,

Hix bienq gvai mbouj noix,

Lumj ndaej gwn dangzoij,

Mbouj nyienh doiq dauqlaeng.

Raeuz dwg vunz Bouxcuengh,

Saedceij onj huzndei,

Vahcuengh geij cien bei(bi),

Lawz vut bae mbouj yungh?

Sawcuengh caen dwg ndei,

Seizseiz bae cienz gvangq,

Vunzlai cungj sim’angq,

Haisim danq dangqmaz.

Rox gangj youh rox raiz,

Dawz dungxcaiz okdaeuj,

Laux uk mbouj bienq naeuh,

Aensim raeujrubrub.

Sawcuengh youq ndawsim,

Gij caencingz raiz ok,

Mbouj lumz gij gaengoek,

Bae gyawz doek mbouj ndaej.