Cihgeij dwg daeuj yihyen ganqhoh daxmeh, deng gag cawx aen congz iq ninz, caiq naeuz seizneix dwg mboengq ndat, hix mbouj bwh denzmbang daeuj hoemq ndang.

Byonghhwnz ndiu le deng nit, lau gingdoengh gij bouxbingh ndaw ranzbingh, gou laeglemx raih hwnjdaeuj, yaengyaeng hai aen loengx, ra geu buh genraez he daeuj daenj, caiq sonx gouh mad he hwnj din, yaepyet couh roxnyinh raeujrub lo, gig vaiq couh ninzndaek lo.

Haetlaeng, gwn ngaizromh le, Cejvwnh youh ok ranzbingh bae youzbyaij lo. Yaep he, de umj fan denzmbang he ma, doiq gou naeuz:“Dahnuengx, doengxhaemh nit lai, haxbaenh gou miz di saeh bae ra husw, swnhbienh cam de aeu fan denzmbang neix, hawj mwngz haeujninz hoemq ndang.”

Laxlawz, haemhlwenz gou byonghhwnz deng nit ndiu, raih hwnjdaeuj ra buh genraez ra mad daenj, deng Cejvwnh raen lo, geizneix de bae ra husw aeu fan denzmbang hawj gou ninz, gou gamjdoengh ndaej mbouj rox gangj maz ndei, riu naeuz:“Cejvwnh feiqsim lo.” Seizneix, gou gig yousim danghnaeuz lai gangj saek coenz dem, raemxda couh mbouj dingqnaeuz doek roengzdaeuj……

Mizseiz bouxgvan Cejvwnh nyaengq lai, dwk dienhvah daeuj naeuz mbouj ndaej soengq ngaiz daeuj lo, heuh Cejvwnh bae rog cawx ngaiz gwn gonq. Cejvwnh caeuq Liengz daxheiz hix mbouj guhhek, naeuz gou roengz laeuz bae cawx ngaiz seiz, hix bang gyoengqde gak cawx faenh he.

Gou riunyumnyum han dwk, daihgya mizyienz daeuj neix cij roxnaj, dox gvansim, doxbang doxcoengh, hix dwg wnggai.

Mizseiz, Cejvwnh gutgungq ninz gwnz congzbingh, mbouj siengj gwn, hix mbouj siengj doengh. Raemxyw yaek diuq sat seiz, de couh doiq gou naeuz:“Dahnuengx, yw yaek diuq sat lo, mwngz bang gou nyaenj lingz heuh husw daeuj ba.”

Muengh fajnaj Cejvwnh byombyeng daj lajdenz loh okdaeuj haenx, ndawsim gou nyaenx mbouj ndaej miz di soemj, gag naemj: Vunz daeuj lajmbwn dinjdet geij cib bi, cimz sat soemj diemz haemz manh gij feih neix, mbouj yungzheih law.

Haethaenx, gwn ngaizromh le, Liengz daxheiz naeuz, ngoenzlwenz canghyw doiq de naeuz, ngoenzneix lij aeu bae guh hangh genjcaz he, naeuz seizneix yaek daengz bet diemj cung lo, caeuxdi bae baizdoih, mboujnex vunz lai deng deq nanz, nguh seiz ywbingh.

Liengz daxheiz cingq gumj gyaeuj daenj haiz seiz, sawqmwh song da laepmok, swenj naeuz:“Diuz hwet caeuq diuz ga gou in dai lo, lauheiq byaij mbouj ndaej lo.”

Haetneix, bouxgvan Cejvwnh caeuxcaeux daeuj daengz ranzbingh, raen Liengz daxheiz yienghneix, byaij bae cam naeuz:“Youqgaenj lwi? Lij byaij ndaej lwi?”

Liengz daxheiz naeuz:“Ngoenzlwenz canghyw duenq gou bae genjcaz, seizneix diuz hwet caeuq diuz ga swix sawqmwh in raixcaix, danghnaeuz nguh seizgan mbouj ndaej bae, canghyw couh lingh anbaiz seizgan lo, lau loeng gvaq seiz ywbingh.”

“Mwngz bae ra aen eijloek he, soengq de bae genjcaz ba.” Cejvwnh baenqgyaeuj muengh coh bouxgvan, hai bak naeuz.

Dingq Cejvwnh baenzneix naeuz, bouxgvan Cejvwnh ngaekngaek gyaeuj, yamq hung byaij ok ranzbingh, bae ra eijloek lo.

Gou ganqhoh daxmeh, hix mbouj ndaej bang maz, caeuq Cejvwnh caez fuz Liengz daxheiz hwnj gwnz eijloek bae, da muengh bouxgvan Cejvwnh gaex Liengz daxheiz yied bae yied gyae, yied bae yied gyae, cig muengh gyoengqde gvaq gungx bae mbouj raen ngaeuz……

Canghyw ngoenznaengz hawj Liengz daxheiz diuqcim youh gwn ywnaed. Gvaq song ngoenz, diuz hwet caeuq diuz gaswix Liengz daxheiz mbouj in baenzlai lo, aen bak de gangj vah roxnaeuz gwn ngaiz hix mbouj saenzdwd lo, de najhai raixcaix, youh lumj gaxgonq nei gyaez gangj gyaez riu. Seizneix, daxmeh gou hix doengh ndaej di, byaij ndaej di lo. Canghyw doiq dou naeuz, goj ndaej ok yen lo, ma ranz aeu lai lienh di cij byaij ndaej onj, doengzseiz, hix heuh Cejvwnh caeuq Liengz daxheiz itheij ok yen.

Canghyw heuh ok yen, cwngmingz bouxbingh binghcingz ciemh mbaeu, ndangdaej hix ciemh bienq ndei, dou hix mbouj caiq euq, caiq naeuz song mbiengj ranzbingh giz diegbyaij baenzlai vunzbingh cingq caj anbaiz buen haeuj ranzbingh daeuj, guh vunz aeu simsienh, mbouj ndaej caenh vih cihgeij naemj, mbouj naemj vunzwnq, ok yen couh ok yen ba.

Ok yen ngoenzhaenx, bouxgvan Cejvwnh hix daeuj ciep Cejvwnh, nyaengqnyaennyaen rib doxgaiq cang haeuj daeh.

Cib ngoenz seizgan, dwg baenzneix dinjdetdet, daihgya youq ndaw yihyen caez gwn caez youq, seizneix couh yaek doxbiek bae, gak boux gag ma ranz cihgeij, ndawsim miz baenzdungx vah yaek gangj, cix mbouj rox gangj maz, baedauq cungj hoedheux gij binghcingz, roxnaeuz gak boux ywbingh deng geijlai ngaenz.

Liengz daxheiz naeuz:“Gou bibi gyau ngaenz yihbauj, ndaej bausiuh dingzlai.”

“Ranz dou hix bouxboux gyau ngaenz yihbauj, meh gou baezneix dwg baeznduj haeuj yihyen, hix mbouj bae geijlai cienz.” Gou naeuz.

“Daj gou bi 2012 baenzbingh le, ndaw mbanj couh hawj ranz gou sinhcingj dihbauj, gwndaenj mbouj you, couhdwg bingzseiz gyaeujngunh daraiz, nanz mbouj nanz daeuj yihyen ywbingh, deng ngaenz mbouj lai, gij cwngcwz guekgya leih raeuz lwgminz lai.” Cejvwnh riu naeuz.

“Cij dwg……cij dwg, daj gou baenzbingh cib lai bi daeuj, bouxgvan gou sinhoj lai lo, daegbied gou ngamqnduj baenzbingh sam bi gaxgonq, de moix ngoenz ganqhoh gou couh lumj ganq lwgnding nei, sinhoj dangqmaz.” Cejvwnh gangj sat, lwgda loq hoengz, baenq gyaeuj muengh ok rog cueng bae,

Cejvwnh lumjbaenz youh ma daengz gij ndwenngoenz gaxgonq haenx……

Bi 2012 mboengqndat, ngoenz he, Cejvwnh cingq youq ndaw gyanghongh gueng gaeq. Sawqmwh roxnyinh gyaeujngunh daraiz, daengx ndang unqnumnum, hix gangj mbouj ok vah, song ga baez domx, couh boemzhoemj laemx youq gwnznamh lo.

Haetneix, bouxgvan Cejvwnh senqsi okbae guh hongreih, mbouj rox seizlawz cijndaej dauq. Cejvwnh sim naemj: Seizneix laemx roengz namh, mbouj miz vunz raen, hix mbouj miz vunz rox, baezneix dai dingh lo……

Couh youq seizneix, bouxgvan Cejvwnh dauq ranz lo, baez hai faj dou gyanghongh, raen mehyah boemzhoemj ninz youq gwnznamh, ning mbouj ndaej, gangj mbouj ndaej, cij nyoq song aen lwgda muengh coh cihgeij.

Bouxgvan Cejvwnh sikhaek dwk dienhvah heuh vunz daeuj, soengq Cejvwnh bae yihyen.

Canghyw lwnh bouxgvan Cejvwnh:“Yah mwngz lwednoengz baenz uk saek, bouxwnq cij saek saek giz, de saek song sam giz, binghcingz gig haenq, lau vut mingh bw.”

“Canghyw, sou caenhrengz bae yw, gou couhsuenq gai ranzvax bae hix aeu yw ndei de.” Bouxgvan Cejvwnh naeuz canghyw.

Cejvwnh ninz gwnz congzbingh, seiz singj seiz muenh, bouxgvan moix ngoenz hawj de ruenj ndang, beuj haex beuj nyouh. Cejvwnh gwn mbouj ndaej, conghndaeng de cap miz diuz guenj ndeu, bouxgvan Cejvwnh moix ngoenz aeu aen cimdoengz daj gij souhraemx haeuj diuz guenj haenx bae, yienghneix cijndaej ciengx diuz mingh Cejvwnh. Nyaengq sat gijneix le, bouxgvan Cejvwnh youh cagaenj ma ranz yawj dahlwg, seizde dahlwg caengz hung geijlai, lij aeu bohmeh ganqhoh. Bouxgvan Cejvwnh muenx bi cungj dwg yienghneix, youq yihyen caeuq aen ranz doxbae doxdauq. Mbouj rox dwg yousim lai roxnaeuz naetnaiq gvaqbouh, gwnz gyaeuj de mbouj rox seizlawz hix ciemhciemh conh ok gij byoemhau daeuj.

Daj Cejvwnh baenzbingh le, ndaw mbanj couh bang de sinhcingj dihbauj, ndwenngoenz ndei gvaq di lo, hoeng gij bingh Cejvwnh lij caengz raen ndei geijlai. Cejvwnh youq bouxgvan naihsim ganqhoh lajde, gvaq sam bi le, doeklaeng gwn ndaej hix byaij ndaej lo, cij dwg diuzlinx bienq gyaengj lo, aen bak gangj mbouj baenz vah, gij sing daj conghhoz fat okdaeuj, lumj bouxngoemx nei gangj gazgwd.

Bouxgvan Cejvwnh raen mehyah yienghneix, gig sim’in, de bonjlaiz couh baknaek, danghnaeuz bingzseiz mbouj miz maz saeh, de gig noix caeuq Cejvwnh gangj vah.

Ndwenngoenz bongh baenaj, dahlwg Cejvwnh hix ciemhciemh majhung, doeg daihhag le, youh gauj ndaej yenzgiuswngh, gij loh baihnaj raen ronghsagsag.

Gangj daengz dahlwg, Cejvwnh song da fwt rongh hwnjdaeuj, naj riu lumj dujva nei.

Rox daengz Cejvwnh seizneix ndei gvaq lo, dou cungj vih de sim’angq, cungj goenghoh de.

“Mbouj gangj baenzlai lo, baezneix biek le, mbouj caiq raennaj, muengh raeuz bouxboux cungj ndei, cungj ndei gvaq.” Cejvwnh riu naeuz.

“Gangj ndaej deng, seizneix、daengzcog, raeuz bouxboux cungj ndei.” Bouxgvan Cejvwnh hix riu naeuz.

“Dwg ha, seizneix gij cwngcwz guekgya baenzneix ndei, miz yihbauj, haeuj yihyen ywbingh mbouj deng cienz lai, raeuz ceng aeu lai gyaeu di.” Liengz daxheiz riunyumnyum naeuz.

Gangj sat, Liengz daxheiz youh baenq gyaeuj coh Cejvwnh song gvanbaz, naeuz:“Gaxgonq gou raen sou song gvanbaz mbouj gyaez gangj vah geijlai, cungj riu sou baknoix caemrwgrwg, gizsaed sou beij gij vunz bakdiemz bakraeuz caenh gangj ndwi mbouj nyienh guh haenx, mbouj rox ndei geijlai lo, yawj vunz mbouj ndaej dan yawj baihrog, aeu yawj gij hengzdoengh de, gaxgonq dwg gou gvaiqloeng sou lo.”

Gou myaeg muengh gvaqbae, seizneix, gou raen ndawda Liengz daxheiz miz raemxda ronghrikrik, yapmyagmyag.（2 sat）