12 nyied 12 hauh, “yendonz cienzswnj·feihyiz vuenhmoq” gij yienghsaeh 2025 Gvangjsih feihyiz haeuj yendonz langhbaij youq Nanz- ningz guh. 20 aen conzbinj daengx gih gak si laeb gih, gaen diuz megloh “souj bonjcaen—hawj eiqmoq—yungz ndwenngoenz” guh langhbaij.

Baez yienghsaeh neix dwg Swcigih Dangjveij Senhconzbu、Swcigih Vwnzlenz、Swcigih Vwnzva Caeuq Lijyouz Dingh caez banh. Muzdiz dwg doenggvaq yendonz langhbaij, doinyoengx feihyiz ndaej cauhguh cienjvaq caeuq cauhmoq hwngfat, daegbied dwg coihaeuj feihyiz daibyaujsing hanghmoeg yaek mied、yaek aeu baujhoh de hwnj daiz bae yienj. Feihyiz daibyaujsing hanghmoeg caeuqfaenh langhbaij baugvat vwnzyoz ndawbiengz、cienzdoengj yinhyoz、cienzdoengj diuqfoux、cienzdoengj heiq、gizyi、cienzdoengj dijyuz youzyi caeuq bajheiq daengj 6 loih, nangqdaengz guekgya、swcigih、si、yienh daengj 4 aen caengzgaep.

Aen yienghsaeh neix youq bineix 7 nyied hainduj, ciuyinx ndaw gih rog gih haujlai aen vwnzyi yendonz miz rengz cienzswnj feihyiz de gaenx bauqmingz caeuqfaenh. Ginggvaq geizgonq bauqmingz、dapbuek bingzsaemj caeuq cingzcik goengbouh doenghgij yamq neix le, mbiengj cawjbanh youq 11 nyied heuhcomz lauxhangz hangznieb、canghheiq doiq mizgven vwnzyi yendonz guh “it bang it” capdieg son, son guhlawz gyalaeg laeb’eiq cozbinj、muzlienh yienh’ok yisuz、daezswng binjcaet diegnyaeqsaeq doenghgij neix, bangrengz vwnzyi yendonz cungbyoengq gizgaeb cauhguh, lai hawj conzbinj miz suijbingz.

Ngoenzhaenx langhbaij faen- baenz “feihyiz vuenhmoq”“yinh gaeuq cienz moq”“cingsaenz lauxcangh doxbungz”“cienzswnj coglaeng” daengj seiq aen biencieng. Langhbaij diemjrongh lailang：Boux doigawj soqcih AI “cwngzyi”, baengh yiengh “gangj gojgaeq+baeyouz lumj caen” doigawj Gvangjsih feihyiz; lauxhangz yozcej bienq “boux guhcingq vuenhmoq”, diemjbingz gij heiq caeuqfaenh langhbaij; gij heiq langhbaij bienbaiz miz bouhloh, yienjok yiengh moqsak.

(Vuz Yaujyij)