Ngoenzhaenx haetromh, daxmeh dwk dienhvah hawj gou, naeuz:“Gyanghwnz seiq diemj cung ninz ndiu le, roxnyinh faj fwngzgvaz mazmwdmwd, mbouj miz saek di rengz, lij roxnyinh daengx ndang unqnumnum, doengh mbouj ndaej saek di, gangj vah hix gazgwdgwd, lau dwg binghlaux haeuj ndang lo.” Gij sing daxmeh miz di roj, youh miz di saenzdwd.

Dingq daxmeh baenzneix gangj, gou doeksaet yat, hoeng gig vaiq couh caemdingh roengzdaeuj, gou doiq daxmeh naeuz:“Yawj gij yienghneix, cibcingz dwg baenz bingh naek lo, aeu cagaenj bae yihyen, mbouj ndaej nguh.”

Gou caeuq daegnuengx cungj youq diegrog guhhong, aen singz gou youq neix liz ranz loq gyae, daegnuengx hix yaepseiz ganj mbouj ndaej daengz, gou dwk dienhvah hawj beixnuengx ndaw mbanj, naeuz soengq daxmeh bae yihyen gonq, gou duenh he couh daengz mbanjranz. Gangj sat, gou guhmuengz sousib doxgaiq, couh ganj coh mbanjranz.

Daegnuengx youq Sinhcin guhhong, gou lwnh de seizneix daxmeh baenzneix baenzneix. Daegnuengx dingq le, hix gip lumj feizcoemh, maz vah hix mbouj gangj, sikhaek ganj bae coh cehcan, dap ci dauq ranz.

Gyoengq beixnuengx ndaw mbanj hai ci daeuj daengz bakdou ranz, miz boux bang sousib doxgaiq, miz boux fuz daxmeh hwnj ci, mbouj geijlai nanz couh soengq daxmeh daengz veiswnghyen ndaw yangh.

Canghyw raen daxmeh naiqnueknuek gij yiengh neix, naeuz:“Daxheiz bingh naek, dou gizneix yw mbouj ndaej gij bingh naek bingh hung, cij yw ndaej gij bingh iq bingh mbaeu, lumj bingzseiz ganjmau mugsaw rih、gyaeujngunh daraiz、fatsa、dungx in、haexconh doengh gij bingh neix, gij bingh naek bingh hung yw mbouj ndaej, gouqvunz youqgaenj, sou lij dwg soengq bae yienh yihyen yw ba.”

Seizgan couhdwg sengmingh, yaek gouqvunz, couh aeu caeuq seizgan doxdax buet, beixnuengx ndaw mbanj hix mbouj gamj nguh seizgan, ciep dwk youh hai ci doz daxmeh bae yienh yinzminz yihyen.

Lajbyonghngoenz, gou ganj daengz yienh yinzminz yihyen seiz, dangzsauj caeuq geij boux beixnuengx ndaw mbanj gaenq fuz daxmeh bae gizcinjbu guh CT genjcaz, ciep dwk couh banhleix gij soujcuz youq yihyen youq.

Mbouj haeuj yihyen mbouj rox, ndaw yihyen bouxbingh lai dangqmaz, gij ranzbingh ninz rim bouxbingh, haujlai bouxbingh cungj caengz ndaej anbaiz haeuj ranzbingh bae youq, giz diegbyaij ranzbingh hix baij haujlai congzbingh, ninz rim bouxbingh.

Daxmeh hix caengz anbaiz ndaej ranzbingh, deng canghyw anbaiz youq baihrog, naeuz caj miz congzbingh hoengq le caiq buen haeujbae.

Daxmeh ninz youq gwnz congzbingh, laepda saesae, mbouj doengh hix mbouj gangj.

Gou doiq husw naeuz:“Meh gou bingh naek lai, haxbaenh fuz de caengh ndangnaek cungj soengz mbouj onj, youq baihrog boux byaij bae boux byaij dauq, cauzswd youh mbouj fuengbienh, sou caenhvaiq anbaiz ranzbingh hawj de ba.”

“Gaej gip, miz ranzbingh dou rox heuh sou haeujbae, naihsim caj yaep he gonq.” Husw naeuz.

Dahsau husw gangj vah suenq vah, mbouj yaep he, daxmeh couh ndaej anbaiz haeuj ranzbingh bae youq lo.

Yaep he, miz canghyw haeuj ranzbingh daeuj lo, cam daxmeh gij saehcingz fatbingh gonqlaeng haenx, cam daxmeh gaxgonq baenz maz bingh gvaq. Gyoengq husw dahsau hix nyaengqnyaennyaen hawj daxmeh caek hezyaz, caek ndangraeuj daengjdaengj gij hong neix.

Cigdaengz seizneix aen sim gou cij loq dingh roengzdaeuj, roxnyinh an’onj lai lo, gou haeujsim ndomqyawj aen ranzbingh.

Ranzbingh miz sam aen congzbingh, congz lamz denz hau, gizgiz seuqfwtfwt.

Daxmeh ninz aen congzbingh cungqgyang, bouxbingh baihgvaz singq Liengz, caeuq daxmeh nienzgeij mbouj ca geijlai, gou cwng de guh Liengz daxheiz.

Bouxbingh baihswix singq Vwnh, beij daxmeh oiq di, gou cwng de guh Cejvwnh.

Ndaw ranzbingh cij miz gou buenx caeuq ganqhoh daxmeh. Liengz daxheiz caeuq Cejvwnh bingh mbouj suenq naek, mbouj yungh vunzranz daeuj buenx caeuq ganqhoh.

Liengz daxheiz naeuz de lwednoengz, cauhbaenz ndaw uk sailwed bienq gaeb, gangj vah roxnaeuz gwn ngaiz aen bak gij naengbak gwq saenzdwddwd, gwq duiq doxroengz. Yienghneix cixbah, seizneix mbiengj hwet baihswix caeuq mbiengj caekhaex baihswix, gij diuznyinz lumj deng maz beng nei, haendikdik, in yaek dai, mbouj ndaej mbouj daeuj yihyen yw.

Cejvwnh gangj vah gazgaz gwdgwd, gangj mbouj seuq, de mbouj dwg aeu aen bak gangj vah, dwg aeu conghhoz gangj vah. Cejvwnh naeuz, de gaxgonq ukgyaeuj sailwed deng saek, aen gyaeuj caeuq fajnaj saenzfoegfoeg, vunz gueng hawj gwn, cungj mbouj doiq bak, hix gwn mbouj roengz, baenzbingh ninz congz sam bi, lumj lwgnyez nei, ngaiz dauqcungz hag byaijloh, hag gaem beuzgeng, hag gaem dawh gwn ngaiz……

Gou dingq Cejvwnh baenzneix gangj, ndawsim gig boiqfug de, youh miz di lau, haetneix fuz daxmeh hwnj ci, gaex de bae yihyen caengz laeuz daih’it genjcaz, canghyw naeuz ndaw ukgyaeuj daxmeh diuz sailwed iq he deng saek lo, boux caeuq boux binghcingz mbouj doxdoengz, mbangj boux youq yihyen yw le, gvaqlaeng youh gaenx lienhndang, mbouj nanz couh lumj boux vunz cingqciengz nei, gag ndaej dajleix cihgeij, vunzranz mbouj dwgrengz, hix mbouj sinhoj geijlai. Gou geijlai maqmuengh gij bingh daxmeh vaiqdi yw ndei, gvaqlaeng gag rox ganqhoh cihgeij, gag rox cawj gwn couh mbouj loek lo.

Liengz daxheiz caeuq Cejvwnh gwn ndaej, hix gag ndaej ganqhoh cihgeij, seizbienh byaijdoengh, sawj gou hozhaenz dangqmaz.

Ranz Cejvwnh gyawj yienhsingz, bouxgvan de ngoenzngoenz soengq ngaizbyaek daeuj yihyen hawj de gwn.

Bouxgvan Cejvwnh dwg boux vunz sang ndeu, ndangdaej gig gietsaed. De moix ngoenz soengq ngaiz daeuj daengz yihyen, baez dawz aen habngaiz cuengq gwnz daiz, singdaemq caeuq Cejvwnh gangj saek coenz vah, mizseiz lienz coenz he cungj mbouj gangj, baez rib gij buhvaq uq haemhgonq Cejvwnh rieg haenx, baenqndang couh byaij ok ranzbingh, ma ranz lo.

Liengz daxheiz bakmbaeu, raen bouxgvan Cejvwnh caeuq Cejvwnh mbouj caez dox gangjvah geijlai, couh riu naeuz:“Bouxgvan mwngz vah baenz noix, mbouj sing mbouj yiengj, langh dwg gou, mbouj rox geijlai mbwq ha, nyaenx mbouj ndaej baenzneix caemrwgrwg.”

“Gvenq lo, dou gaenq baenzneix gvaq geij cib bi lo.” Cejvwnh gazgwdgwd naeuz.

Cejvwnh gangj vah daj conghhoz ok sing, gazgwd youh sing roj, danghnaeuz mbouj haeujsim dingq, caen dingq mbouj ok de gangj maz.

“Danghnaeuz gou seizcoz bungz raen cungj bouxsai neix, baenqndang couh deuz lo, caen fug mwngz baenzlawz caeuq de gvaqciuh.” Liengz daxheiz naeuz.

“Bouxgvan gou bonjlaiz couh baknoix, daj gou bingh le, hongranz hongrog cungj baengh de guh, lij aeu goq gou caeuq dahlwg dem, moix ngoenz nyaengq daengz gyanghwnz cijndaej ninz. Daegbied gou ngamq baenzbingh sam bi ndawde, baenzbi ninz congz, gwn mbouj ndaej, ning hix mbouj ndaej, de ngoenzngoenz moix donq naihsim gueng gou gwn, ndaej hoengq saekseiz hix mbouj yietnaiq, gaex ci daiq gou bae youzbyaij lienhndang, doeklaeng gou caen caiq rox yamq rox byaij roen lo.”Cejvwnh naeuz.

“Gou bingzciengz gyaez gangj gyaez riu gvenq lo, bouxgvan gou caemh gyaez gangjriu, fanjcingq gou mbouj nyienh caeuq boux baknoix caemrwg caez youq.” Liengz daxheiz damzbyoebbyoeb naeuz.

Gou nyaengqnyaennyaen ganqhoh daxmeh, mbouj ndaej hoengq caeuq Cejvwnh caeuq Liengz daxheiz gyoengqde gangjgoj baenzlai, dingqdingq couh ndaej.

Roxnaeuz Cejvwnh roxnyinh cihgeij gangj vah gazgwd, vunz dingq mbouj rox geijlai, gvaqlaeng, de gig noix caeuq dou gangj vah lo, danghnaeuz mbouj miz maz saeh, de baenzngoenz cungj mbouj gangj saek coenz.

Cejvwnh gwn imq le, cungj gyaez youq ranzbingh baihrog byaij yaep he, caiq dauq binghcongz ninz yietnaiq. Roxnaeuz Cejvwnh ciengzciengz daeuj yihyen yw bingh, roxnaj haujlai vunz, seiz mbouj seiz dingqnyi de caeuq vunzwnq doxdongx, roxnaeuz gangjgoj saekseiz.

Haet he, gwn ngaizromh gvaq le, Cejvwnh youh ok ranzbingh bae youzbyaij lo. Yaep he, de riuj cik daiz he ma lo, doiq gou caeuq daxmeh naeuz:“Cik daiz neix hawj sou gwn ngaiz.”

Ciep dwk, Cejvwnh youh bae riuj song cik daiz ma, cik he hawj Liengz daxheiz, cik he ce cihgeij yungh. Cejvwnh naeuz:“Mbiengjhaenx ngoenzneix miz geij boux vunzbingh dauqbae, gij daiz neix mbouj yungh lo, gou dawz ma hawj raeuz baij habngaiz gwn ngaiz.”

Vah naeuz sam cik daizgwn neix, gizsaed dwg sam cik benjraez guh baenz, doengh gij bouxbingh doengh mbouj ndaej haenx, gwn ngaiz seiz, dawz gaiq benjraez neix gaq gvaq song mbiengj gwnz congzbingh bae, cuengq habngaiz youq gwnzde, onjdangq dangqmaz.

Gou caeuq Liengz daxheiz lienzsing docih Cejvwnh, doiq gou daeuj gangj, miz cik daiz neix gwn ngaiz, daxmeh ndang unq doengh mbouj ndaej, fuengbienh lai lo.

Mboengqneix ndat lai, ndaw ranzbingh daengx ngoenz hai gunghdiuz, roxnyinh liengz- swdswd, gig sangj. Doengxhaemh ngamq haeuj- ninz mbouj miz maz, byonghhwnz fwt ndiu dauq, roxnyinh ndaw ranzbingh nityauyau, gou daengx ndang hwnj naenggaeq saenzdwddwd.（1）