Coujlangz yihyen raezrangrang lij haemq cauz. Canghyw husw baedauq gak boux gag baenq, mbouj haeujsim seiqlengq. Gij vunz naengh gwnz sahfaz haenx, mizmbangj laepda ciengxsaenz, mizmbangj ngunhcoemcoem yawj coh baihnaj gizgyae, dingzlai vunz cix ngonz soujgih, maez youq ndaw seiqgyaiq swhgeij.

De naengh gwnz sahfaz giz gugged, byaifwngz gaem mbawdan cazbingh, fouq da cim raen cihsaw “aiz”, ciemhciemh cih neix bienqbaenz duz bya geizheih ndeu: Bak hung da iq, gyaeuj hung ndang dinj, ga duzfw, rieng duzfw, youq gwnz ceij saetdiuq, aj bak haep bak, lumjbaenz haeb ndangnoh de nei, de roxnyinh in ha! Gij vah canghyw lij youq goekrwz: “Mwngz cij lw bi seizgan ndeu.” De fwt laep da, caiq ndwj da seiz, cih “aiz” caemrwd ninz youq gizde, cix da caengzroenroen. De fwngz saenz lo, mbouj rox mbouj nyinh momo gaenj lienhhoz gyang hoz, naednengq lienhhoz dwg ngveih vameizgveiq, neix dwg daxboh yaek goenqsai seiz soengq hawj de, daxboh naeuz: Lienhhoz ndaej baujyouh mwngz bingzan daengx ciuh.

“Daxboh, mwngz yaeuh gou……” De gag naeuz.

De 12 bi bide, daxboh bingh dai. Mbouj geij nanz, daxmeh daiq de gaijhaq, bohlaeng nyoegnyamx de, hangz de, aen gyadingz neix hawj de daengx ndang miz sieng, 15 bi bihaenx, de mbouj ndaej mbouj deuz ranz, baenz boux banhgai ndeu, baengh gip gij soudauq nyapnyaj ciengxbak. Banhgai song bi ndawde, coujlangz yihyen dwg giz diegninz ceiq ancienz de, coujlangz gak aen yihyen ndaw singz de cungj ninz gvaq caez, vunzlai mbouj dawz dah gutgungq ninz gwnz sahfaz haenx haeujsim.

De maij va, moix baez lohgvaq bouqva, de cungj daengx din haemq nanz, damsim dwk ngonz gij va gyaeundei haenx. Va miz iengj、miz su、miz yax. Iengj ndaej daihheiq, su ndaej lauxsaed, yax ndaej lingxcingx. De ngonz ndaej maezmwdmwd. Mingzcoh gij va neix de heuh mbouj ok, hix mbouj gamj demqgyawj bae ngonz, cij youq giz seiq haj mij dauqrog ngonz, gag ngonz gag roxyiuj. Cigdaengz ngoenzhaenx, de nengh daehgyapngwz doxgaiq feiqgaeuq he youq najranz bouqva ciengqlienh.

“Dahsau, mwngz……” Meh lauxbanj heuh de.

De vuengmuengz cienq ndang yaek deuz, hoeng youh nyeux gyaeuj dauq lah coh meh lauxbanj, naengbak doenghyed haemq nanz cij oksing:“Meh lauxbanj, mwngz neix aeu bouxhong lwi?”

Meh lauxbanj heuh de haeuj ranz naengh, de bifwngz maedmaed. Aen bouq neix aiqmiz cib lai bingzmij, song baih ciengz miz aengaqva, gwnzdieg baij haujlai bwnzva dem, caenxnyaed ndaw ranz, gyang ranz cijmiz seiq haj bingzmij hoengq. De mbouj nyienh haeujbae, mbouj dwg yiemz ranz gaeb, cixdwg maeh daengz saenfaenh swhgeij.

Meh lauxbauj rox gij simgei de, cix aeu daengq daeuj heuh de naengh, lij hawj de boi raemx he dem. Baeznduj miz vunz yienghneix aeueiq de, de doeksaet yat, caemh gamjdoengh raixcaix, ndawsim roxnyinh raeujrub, cix lwnh gij bungz daengz swhgeij hawj meh lauxbanj nyi. Meh lauxbanj dingq le raemxda rih daeuj, hoeng, dah lwnh neix cix caemdingh dangqmaz, aiqdwg ndwenngoenz lienh de simmaenh lo.

Ngoenzde meh lauxbanj couh hawj de youq roengzdaeuj, cijdwg youq gyangdangq gaebgeb haenx an aen mbonqdoeb ndeu. Meh lauxbanj cawx buhvaq moq hawj de. Swiq ndang、roi gyaeuj、vuenh buh moq le, yawj ndaw gingq dah saulengj haenx, de daej lo. Dahsau ndaw gingq bwnda goengq, da hung ndongqrik, najrod ndaenggoengq, baenzsau dangqmaz. Aen naj neix ciengzgeiz deng yaemyungq、goujcau cw dwk. Seizneix gyaeundei lumj duzsien, de nyaenx mbouj ndaej heuh meh lauxbanj coenz “meh” ndeu.

Daj ngoenzde hwnj, de lumj duzrwi ra va nei gaenxriri, baedauq gai hung gai iq ndaw singz caeuq gak dieg riuzdoengh gai va. Haj bi gvaqlaeng, de gag hai bouqva, hix baenz meh lauxbanj ndeu. Aiqdwg vunz simndei mbwn hoh roxnaeuz bouxgaenx mbwn ganq, seng’eiq de gig ndei.

30 bi bide, de baenzranz lo, bouxgvan dwg boux gunghswh cizgungh bingzciengz ndeu, hoeng de mbouj yiemzcaz. Songde maedsaed gvaq duenh seizgan vuenyungz ndeu, hoeng ndwenngoenz vuenyungz dinj lai, de ceizceiz caengz mizndang, daeggvan saeknaj yied daeuj yied “laep”, lah de mbouj swnhda, saekseiz lij sawqmwh faknaj dem, hawj de fuengz hix fuengz mbouj ndaej, gwn laeuj doh seiz ciengzseiz dawz de daeuj okheiq. Vihneix, de lai baez heuh lizvwnh, hoeng, daeggvan naeuz “ngauz mwngz daengz geq bae”. Doiq daeggvan daeuj gangj, de dwg yiengh doxgaiq “ce le mbouj baenz yungh, vut le youh sij mbouj ndaej” haenx. De youq ndaw fouznaih gvaq ndwenngoenz……

Simngeix soudauq, de youh yawj diuz coujlangz raezrwd neix da ndeu, caiq mo diuz lienhhoz mbat ndeu. Lai bi daeuj, de miz maz simnyap cungj caeuq lienhhoz naeuz, itcig saenq lienhhoz ndaej baujyouh de hamjgvaq gak aen “gumzgamx”. Hoeng, seizneix gaiq “baujyouh” neix caeuq de doxyaek, baenz aen loenghriu hung ndeu. De gej lienhhoz roengzdaeuj, ce gwnz sahfaz, cix lizbae lo, yamqdin mbouj lawq saek di.

“Dahsau, mwngz daengj gonq.” Daxau ndeu neb daeuj riengz.

“Mwngz dwg heuh gou?” De cam.

“Deng. Doxgaiq mwngz doek le.” Daxau doq gangj doq gingz diuz lienhhoz.

De “o” coenz ndeu.

“Gou dauqdaej ndaej raen mwngz lo.” Daxau naeuz.

De fatmoengj, bi gyaeuj: “Raeuz mbouj doxrox ne.” De daj gyaeuj daengz din yawj daxau baez ndeu: Danaj cingqlili, mbouj sang mbouj daemq, haemq biz, gwnznengz yaem ndoq, najbyak ndongqngaeuz, saeknaj nding’oq, riuhehe hawj vunz cwxcaih.

“Raeuz raen gvaq baez naj ndeu. Raeuz bae gwn boi gahfeih ndeu ba.” Daxau naeuz.

Youq ndaw bouqgahfeih, daxau lwnhyaengyaeng: Cibhaj bi gonq, gunghswh gou baihsaiq, ranz hix ngaiz dawz bae dingjcaiq, gou daj boux lauxbanj ndeu fwt bienqbaenz boux mbouj miz yienghmaz he, lij dawzcaiq lai raeuh dem. Mehyah hozndat daiq daeglwg cib bi lizbae lo. Gou mbouj gvaiq de, gou doiq mbouj gvaq gyoengqde. Gou langh ndaw haw, baenz boux banhgai, baengh gip gij soudauq nyapnyaj ciengxbak. Hainduj gou youq doenghlaeuz caengz guhbaenz cix ce’ndwi he youq, youq baenz buenq bi, riengzlaeng bae canghcangz caengz lajnamh co fungh rug iq ndeu youq. Boux banhgai diegvih daemq, vunzlai mbouj dawz haeujda, caemh lij yawjsiuj dem, raen le fih gyae, gij ronghda linghyiengh vunzlai, gou hix gvenq lo.

Ngoenzhaenx, gou maeuq henz roen gwn manzdaeuz, mwngz gwih danci ginggvaq, daengz dangqnaj gou, fwt daengx ci, cix mbouj roengz ci, song din daemh gwnznamh, daj lamzva gyaeujci yut nyup vadaengngoenz ndeu hawj gou. Gou doeksaet yat, mbouj gamj ciep, mwngz naeuz：“Soengq hawj mwngz.” Gou gazgwd iet fwngz bae ciep, diuz lienhhozgim gyanghoz mwngz ronghrikrik ingj haeuj da gou daeuj, de caeuq aen naj gyaeundei、aenhoz hauoiq mwngz gig doxboiq, hawj gou baez yawj couh mbouj lumz. Mwngz dawz va oet haeuj fwngz gou daeuj le, ga’gvaz baez cengj, danci bongh bae lo, baez doxraen neix ngamq song faencung. Yawj aen ngaeuzlaeng mwngz, yawj nyup va gyangfwngz, gou gamjdoengh dangqmaz……

Ngoenzde gou baez daih’it banngoenz ma ranz yietnaiq. Haeuj dou swnhfwngz ce nyupva youq gwnz congz， nyupva baenzneix oem baenzneix lengj, aencongz cix baenzneix heiz, mbouj ndaej hawj de uq nyupva. Gou dawz aencongz uet seuq, ra ndaej aen bingz siuliu ndeu cang di raemx daeuj coq nyupva, bingzva angj da bw. Yawj seiqhenz, ndaw rug luenhnyabnyab, neix boiq mbouj ndaej nyup va lengj neix. Gou sousib、baetseuq ndaw rug, seuqsak lo. Caiq yawj swhgeij, yaem raez mumh co, buhvaq heiznwd, yienghneix mbouj boiq guh bouxcawj ngveiq va gyaeu neix, gou aeu sousib swhgeij. Raed yaem, daeq mumh, vuenh doiq buh seuq ndeu, baenzneix cangndang gvaq le, gij yienghsiengq lauxbanj mwhgonq youh dauq lo.

Ngoenz daihngeih, gou bae gyahcwng gunghswh ra hong, saehcingz daegbied swnh, gou laihnaeuz dwg nyup vadaengngoenz bang gou.

Loeg bi gvaq le, gou gag hai aen gyahcwng gunghswh ndeu, caemh youh baenzranz baez moq. Seizneix sojmiz gyahcwng gunghswh ndaw singz haenx cienzbouh youz gou guenj. Mboujgvaq seizneix nienzgeij laux lo, gyau hawj lwg bae dajleix.

Gij sojmiz ngoenzneix, dwg mwngz hawj, gou itcig muengh ndaej raen mwngz baez moq, yienznaeuz gou lumz yienghsiengq mwngz lo, hoeng diuz lienhhoz neix gou gvaq da mbouj lumz.

“Seizneix gou haemz diuz lienhhoz neix.” De nyaenx mbouj ndaej dawz gij bungz daengz ndwenngoenz caeuq danyawjbingh lwnh daxau nyi.

Daxau dingq le gaem fwngz de naeuz: “Lwg ha, sim coh daengngoenz, maz gumzgamx cungj hamj ndaej gvaqbae.”

De ngaekngaek gyaeuj, cix mbouj miz maz biujcingz, mbouj rox dwg lujraj gij gujli daxau roxnaeuz dwg roengzsim deuqnyex minghyinh.

Dauq daengz ranz, de dawz danyawjbingh baij youq dangqnaj daeggvan. Bouxsai ciengzgeiz moeb de haenx mbat dog doemqlak lo, daej naeuz:“Gou mbouj dwg vunz…… Raeuz yw bingh!”

De dinghcaem naeuz: “Lizvwnh ba！Gou siengj bouxdog caemcaem byaij gvaq bi doeksat neix.”

“Yw bingh ndei gonq.”

“Gouz mwngz lo, hawj aen simmuengh doeksat gou guh sat ba!”

Daeggvan dauqdaej ei de lo.

Song ngoenz gvaqlaeng, daxau ra daengz bouqva, soengq diuz lienhhoz vadaengngoenz ndeu caeuq mbawcihbyau 30 fanh hawj de, naeuz:“Itdingh aeu boiqhab canghyw ywbingh, danghnaeuz ngaenz mbouj gaeuq, gaej caeuq daxau guhhek nw.”

De souciep lienhhoz, doiqdauq cihbyau.

Bi ndeu gvaqbae, de lij ndeindi’ndi. Haj bi gvaqlaeng, de bungz raen bouxsai caensim ndiep de insik de ndeu, caemh seng dah lwg gyaeundei dwggyaez ndeu. Cib bi gvaqbae, de vanzlij yied gvaq yied ndei, ndwenngoenz ronghsagsag, de naeuz, gou itcig youq gwnz roen neb aen daengngoenz haenx.