Haetromh seizdoeng, gij ndit lumj sa gim ndonj gvaq luengq mbawfaex, sat roengz diuz loh bwzyouz hagdangz raizngaungau, raeujrubrub. Gij sing doegsaw hagseng goklanglang daj ndaw gyausiz cienz okdaeuj, swnhrwz youh habhoz. Gwnz daizdaengq henjbeg haenx vagut cingq haihoengh, caeuq go gveiqva henz laeuz doxhab doxbouj, ndeiyawj dangqmaz. Aen hagdangz gyaeu lumj suenva neix sawj vunz simmaez, gou nyaenx mbouj ndaej dauqngeix aen hagdangz seiz iq.

Aen hagdangz seiz iq gou dwg dieg gaeuq hagdangz moq neix, youq mbiengj goengloh doiqmienh. De yienznaeuz bingzciengz, hoeng daiq haujlai angqyangz daeuj hawj dou lij iq seiz——Gou daj ndawsim angq swhgeij seiz iq youq hagdangz gaeuq doegsaw, roengz lajmbanj cib geij bi le, seizneix youh diuh haeuj hagdangz moq neix son saw. Sawj gou ceiq miznaj couhdwg: Mboujlwnh dwg hagdangz gaeuq roxnaeuz hagdangz moq neix, gyoengqde cungj dwg hagdangz son Cuengh、Gun song cungj saw—— Neix dwg sim gou ceiq maij!

Geiqndaej seiz iq youq hagdangz gaeuq, baez yamq haeuj bakdou hagdangz, couh ndonj haeuj laj go faexfungvangz bae lo. De maj ndaej sangngaungau, moix daengz seiz hai va, gij va hoengzswgswg bu rim nga faex, mbawfaex deng va cw ndaej loq raen mbouj raen, gyae’gyae muengh gvaqbae, faex haenx couh lumj aen liengj hung va nding ndeu gang youq henz bakdou, seizseiz vih gyoengqvunz dangj rumz fwn, gyaqciq dangqmaz.

Mwhhaenx, aen gyausiz it nienzgaep dou dwg youq ranzvax baihsae. Ngeih nienzgaep doxhwnj cij ndaej haeuj laeuz moq sonhag sam caengz haenx bae hwnjdangz. Gij daiz gyausiz dou dwg daizfaex gaeuq naengh song boux vunz, naekna youh maenhsaed. Gyoengqde senq ngaiz gyoengq daeggo dahcej yungh gonq haenx muz dwk raeuzradrad bae lo. Daiz neix couhdwg dieg gyoengqdou doeg saw、sij cih、vehveh、dwkgeiz……

Rog cueng dwg doenghnaz gvangqlangh ndeu. Moix daengz mwh neix, haeux naed henjgim haenx couh at dwk gohaeux ngauz gyaeuj lo. Youq baihnaj gyausiz miz geij diuz vadaiq, ndaem rim vadaengngoenz、vagut、vahaijdangz caeuq valinzgaeq, gyoengqde caeuq song aen daizva hung baihnaj laeuz sonhag haenx gyaeundei doxboiq. Haetromh, cienfanh raemxraiz luenzlulu lumj naed caw ninz youq gwnz nywj va, youq laj ndit lwenq ok lai saek lai yiengh, migmyanz mbouj dingz. Yinx gyoengq lwgnyez buet bae sijsaeq cim yawj, doxlwnh mbouj dingz. Gyoengq doengzhag youq gwnz cauhcangz guhcaemz dwk lwgceij、“diuq ranz”、vut soujgaen…… Miz gangj miz riu, cwxcaih angqyangz cang rim hagdangz.

“Lauxsae ndei! ” Hagseng dongx gou, dawz gou daj ndaw dauqngeix heuh singj gou. Yawj lwgda gyoengq lwgnyez sawndikndik cang rim maqmuengh haenx, ndawsim gou baez ndat——Gou sim’angq seng youq seizdaih ndei guek raeuz, mboujdan ndaej angqyangz doegsaw, majhung le youh ndaej dang boux laeuxsae vuenyungz ndeu dem. Siengj daengz gij saedceij sinhoj hainduj son saw haenx, gou hix gig gamjaen. Aenvih de sawj gou caeuq hagseng caez majhung, baez yamq baez yamq byaij maenh diuz loh sonsaw neix, dwg bit caizfouq dijbauj gou.

19 bi bihaenx, gou daj Gvangjsih Sawcuengh Yozyau bizyez, ndaej faenboiq daengz aen hagdangz diegbya’gyae ndaw yienh haenx bae son saw. Dap banci hix aeu song aen lai cung cij bae daengz. Diuz roen miz buenq ndeu dwg loh mokmoenq. Daengx mbanj diuzgen gig doekgo: Caengz doeng dienh, raemx gwnyungh aeu bae henzdah rap; sam ngoenz baez haw, ngoenz ndwi mbouj miz byaek gai; singhgiz roek siengj ma ranz, banci hix mbouj miz lai bouh, aeu cauh bez gvaq dah bae caj dap gij banci yienh laenzgaenh, youh caiq cienj song baez ci, buenq ngoenz lai cijndaej dauq ranz. Ngamq daj hagdangz ndaw singz okdaeuj, couh aeu daengz gizneix son saw, sim gou doekca hung lai, hainduj caen miz di mbouj gvenq.

Hoeng, gou daj iq couh muengh majhung aeu dang lauxsae, seizneix loqsiengj gaenq saedyienh, mboujguenj baenzlawz yiengh, cungj aeu sikhaek vaiqdangq diuzcingj ndei bonjfaenh, caenh vaiq gvenq cijndaej. Mwh gou gikdoengh dwk byaij hwnj gyangjdaiz, couh engq roengzsim aeu youq gizneix byaij ndei yamqdin gyauyuz daih’it lo.

Seizhaenx, hagdangz anbaiz gou son roek nienzgaep yijvwnz caeuq dang banhcujyin, doengzseiz lij hwnj yinhyoz、meijsuz、suhfaz daengj goq, baenz lauxsae “fanhgimyouz” ndaw bak gyoengq banlaux.

Mwhhaenx gou ngamq ndaej 19 bi, mwhhaenx hagseng lajmbanj doegsaw ceiz, miz geij boux hagseng maj ndaej hung, cij beij gou iq seiq haj bi. Ndigah, ban hagseng neix cungj heuh gou “Cejcinh” .

Gyoengq hagseng miz Bouxgun、Bouxcuengh、 Yauzcuz, ranz gyoengqde dingzlai cungj youq ndawlaeg Sizvandasanh. Gyoengqde hwnjdangz roen gyae, singhgiz it gyanghaet daengz singhgiz haj lajbyonghngoenz geij bak boux hagseng cungj youq hagdangz hag、gwn、ninz. Aenvih roen gyae, gyoengq hagseng ngoenz singhgiz banhaemh gag beq daeh haeuxsan caeuq byaekhamz couh byaij loh daengz hagdangz lo. Ngoenz sam donq cungj yungh aen habhaeux cang haeux cuengq raemx, youh aeu cazcung cang ndei byaekhamz, soengq daengz ranzdajcawj bae naengj cug cij gwn. Dou gyoengq lauxsae danghnaeuz gik gag cawj ngaiz hix baenzneix naengj haeux, caiq gag caux feiz roxnaeuz yungh cauq heiqmeiz ceuj saek aen byaek gya di nohmou couh soengq haeux gwn lo.

Hagdangz hwnjdangz、roengzdangz、haeujninz、hwnqcongz cungj aeu roq cung guh hauh. Gyanghaemh 7 daengz 9 diemj cung baengh gyaeuq aen caizyouzgih fatdienh, hawj hagseng hwnjdangz. Dingz dienh le, hagseng haeujninz, lauxsae danghnaeuz aeu yawjsaw、gaij cozyez, cijndaej gag diemj lab roxnaeuz daenghojyouz gyaban guhhong. Dou dwg lauxsae moq, ndwen cijndaej sam seiq bak maenz cienzgoeng, bau lab song maenz mbouj dingj yungh lai, ndigah cungj haengj yungh daenghojyouz lawh.

Gij hong hagdangz gig laebleb, hoeng mwh yawjraen gyoengq lwgnyez song da cinghseuq、muengh doegsaw haenx, gou youh cingsaenz gvaekgvaek lo. Youq ndaw saedceij bingzciengz sonhag, gou couh youq gyausiz caeuq ranzvax song dieg neix baedauq mbouj dingz.

Geiqndaej miz bi ndeu, gou daiq aen ban haenx miz boux hagseng heuh Dahfung, de dwg boux ndangcanz, mizseiz lij fatbagmou dem. Meh de dai caeux, daxboh de daengx bi cungj youq baihrog dajgoeng, couh noix dauqma lo, dan de caeuq daxbuz doxbaengh gvaq ndwenngoenz. Aenvih de dinfwngz baihgvaz sukreuq genggyaengx, hengzdoengh gig mbouj fuengbienh. Byaij roen fwngzgvaz cungj gaengjgwdgwd gungj youq najaek, ga gvaz hix dwg rengz rag dawz, hoz gengz dwk byaij baenaj. Ndigah, couhcinj roengzdangz, de hix cungj gag youq diegnaengh, cienq ndang muengh coh cauhcangz bae, yawj gyoengq doengzhag guh- angq, caegcaeg hozhaenz. Daegbied dwg dangz dijyuz, de engq coegcamz. Bungz daengz hwnj dangz dijyuz, de raen gyoengq doengzhag ndang- cangq dwkgiuz、diuqcag、doxgyaep guhcaemz, sim de engq hojsouh, cungj mbouj gamj yawj lai——De lau doengzhag heuh de caemh bae guhcaemz, engq lau gyoengqde mbouj heuh…… Couh gag dinghdingh ngaem gyaeuj aeu fwngzswix sij gij cih mbitmbit mbengmbeng haenx gaijmbwq lo.

Gou sim’in de, couh bae ranzsaw hagdangz ra gij saw ndei hawj de yawj, siengj gujli de giengiengz hwnjdaeuj. Mboengqhaenx, baez daengz goq dijyuz caeuq cuengqhag gwn ngaiz le, gou cungj buenx de yawj saw, couh lumj youq ndaw seiznit laeglemx hen duj va yaek hai ndeu nei, naihsim muengh de vaiq di hailangh.

Miz baez ndeu, doeg sat aen goj Cangh Haijdiz, Dahfung dinghdingh ngeixnaemj, ndaw da lai miz haujlai gagsaenq caeuq giendingh. Gvaqlaeng, de engq fwngz mbouj cuengq saw, ciemhciemh haengj caeuq doengzhag gangj riu, hagsib hix menhmenh daezsang lo. Raen de mbouj caiq gag yawjsiuj bonjfaenh, bienq ndaej simvuen、cingsaenz gvaekgvaek, gou vuenheij youh sim- onj——Duj va gyaeundei neix henhoh baenz nanz dauqdaej ndaej haihoengh lo!

Dang lauxsae cungj rox saedceij lumj mbin nei gvaq ndaej gig vaiq. Aenvih dou cungj dwg yungh aen singhgiz guh danhvei daeuj geq dangz soq, 20 lai aen singhgiz couhdwg aen haggeiz, song aen haggeiz couh ndaej bi ndeu lo. Baez yaepda, ngeihcib lai bi couh gvaqbae, gingqyienz daiq ndaej haujlai bae hagseng lo. Gyoengq hagseng daj heuh gou “Cejcinh” bienqbaenz “Luz lauxsae” …… Youq ndaw ndwenngoenz caeuq hagseng doxbuenx haenx, cungj caez majhung, sou ndaej gig lai.

Dwg ha, gyauyuz, dwg doxbungz gyaeundei, dwg guhcingq majhung; engq dwg gij rongh lwenqda, sawj gou gyaep rongh baenaj.