（ciep daih 3691 geiz）

Gou youq ranz guh faenh hong neix, heuhguh “daeb swz”, hix heuh- guh “daeb lij”, dwg yiengh doxgaiq wjgih ndeu, aen luenz, hung lumj naed lwggaet nei, couh dwg baihlaj miz gep swz ndeu, youq baihgwnz dab gep lij he roengzbae, aeu gyauhsuij nep ndei, caiq dawz song diuz sienq saeq lumj geu mumh haenx faen dauq song baih, couh suenq guh baenz aen ndeu. Guh baenz aen he ndaej song faen ngaenz, ngoenz naengh daengz gumq bemj bae cij ndaej samcib daengz hajcib maenz ngaenz, faen ngaenz neix hoj gwn lo.

Haetneix, daengngoenz daj gehranz doiqnaj seq roengzdaeuj, ciuq dwk bakdou gou ronghsagsag bae. Gou gwn ndei ngaizromh, baij daiz yaek guhhong, naihlaux yaengyaeng byaij haeuj ranz gou daeuj, gou miz di doeksaet, gaenh cib bi neix daeuj, naihlaux caengz yamqdin haeuj ranz gou daeuj gvaq, seizneix sawqmwh haeujdaeuj, gou caen miz di mbouj cwxcaih.

Naihlaux ndwn daengz doiqnaj gou, naj riunyi’nyi naeuz:“Dahnuengx, mwngz bang gou di saeh he ndaej lwi?”

Gou naeuz:“Cib boux gyahoh, mbouj yawz boux roqranz, mwngz miz gijmaz yungh daengz gou, ndaej bang gou couh bang.”

Naihlaux naeuz:“Geij bi neix gou caeuq goenggeq mbaet gwn mbaet yungh rom ndaej sam fanh maenz ngaenz, daeglwg gou ngoenz cij rox gwn mbouj rox guhhong, lij seizseiz heuh gou aeu ngaenz bae yungh, gou lau miz saek ngoenz de raen gij ngaenz neix le, dawz bae yungh liux couh baihgya lo, cuengq youq ndaw ranz mbouj onj, dawz bae ngaenzhangz conz hix lau de rox, gou naemj bae naemj dauq, naemj heuh mwngz bang gou dawz di ngaenz neix, seizlawz yaek yungh gou caiq ra mwngz aeu.”

Gou naeuz:“Lwg mwngz baenzlawz yienghneix ha.”

“Ei, gangjdaeuj couh siengsim lo.” Naihlaux danq gaemzheiq raezraez ndeu, raemxda hix yiemq okdaeuj lo.

Lajmbanj, miz aen mbanj ndeu heuh guh Mbanjrunghmboenj, liz haw roek goengleix, seiqbaih cungj dwg byasang, mbouj doeng dienh, cijmiz ga roenbya saejyiengz ndeu doeng haeuj mbanj bae, vunzmbanj haeujok aeu byaijroen, haemhlaep diemj daengyouzhaeu ciuq, gwn raemx aeu mbaq rap. Ndaw mbanj cibngeih ranz vunz, vunzmbanj ranzrongh okbae guhhong, haemhlaep ma ranz ninz, mbouj miz maz souhaeuj, bouxboux gungzngaeungaeu.

Goenglaux caeuq naihlaux couh youq Mbanjrunghmboenj majhung, youq Mbanjrunghmboenj baenzgya. Mae swnj mae, vaj swnj vaj, daih ciep daih gwnhoj gwnheu gvaq saedcaej.

Naihlaux seng miz bouxsai bouxmbwk, lwgmbwk seizneix lij doeg daihhag. Lwgsai doeg sat cuhcungh okdaeuj couh gaen gyoengq lauxbiuj de okbae dajgoeng.

Daegsaed couh dwg lwgsai hung. Lwgsai hung gaenxhong, coengmingz, okbae song bi lai couh youq baihrog aeu ndaej mehyah ndeu, mehyah neix ndang reux noh hau. Mbanjrunghmboenj baez daih’it miz vunz aeu ndaej dahsau baihrog guh baz, daengx mbanj vunz angq lumj gvaq cieng nei, bouxboux cungj naeuz mohcoj lwgsai hung swi oenq heu lo.

Aen ranz goenglaux dwg ranzhaz, seiqlengq doeng rumz, lwgsai hung daiq mehyah de daeuj daengz ranz haemhhaenx cingq dwg ndwenlab, fwn doek mbouj dingz, lohmbaeq hoj byaij, ranz rengq hoj youq, mehyah lwgsai hung caegcaeg loenq raemxda. Vunzmbanj laihnaeuz de byaij roen ga in, mizboux bae ra ywdoj daeuj cawj raemx hawj de cat ga, mizboux aeu gyaeq cawj dang hawj de gwn boujndang, ndaw ranz luenhhumhum.

Gvaq geij ngoenz, vunzmbanj cij rox mehyah lwgsai hung gaenq mizndang, daihgya cungj haenh lwgsai hung miz geiq, rox doekbyaek cij humx suen.

Mehyah lwgsai hung ninzhwnq couh naengh youq bakdou, lumj vunzngawz nei, dinghdingh muengh dingjbya, mbouj sing mbouj swt, de gag naemj:“Aen dieg baenzneix baenzlawz youq ndaej vunz, de baenzlawz ndaej youq aen dieg baenzneix gvaqciuh?”

Mehyah lwgsai hung yied ngeix yied roxnyinh mbwnlaep, yied ngeix yied roxnyinh gyaeuj in. Bihaenx gvaq cieng, de seng lwgsai iq le couh okbae, caiq hix mbouj dauq.

Mehyah deuz bae le, lwgsai hung bienqbaenz boux vunz wnq, mwngz heuh de gwn de couh gwn, mbouj heuh de gwn de couh youq, mizseiz gag gangjnyoemnyoem, mizseiz gag riunyi’nyi, cam neix dap haenx, yaep ndei seiz yak. De mbouj caeuq vunz gangjvah hix mbouj bae guhhong, naeuz de miz bingh youh mbouj dwg miz bingh, naeuz de mbouj miz bingh, aen ukgyaeuj de hix mbouj daiq cingq.

Mbouj geij nanz, bangfuz cwngcwz roengzdaeuj daengz gak dieg, cwngfuj senj gyoengqvunz Mbanjrunghmboenj ok baihrog daeuj, goenglaux caeuq naihlaux couh faen ndaej aen ranz neix, caeuq gou gek ciengz ndeu, gyoengqde daengx ranz seiq boux daj lajmbanj buen daengz ndawsingz youq, cwngfuj bae ndaw gunghcangj ra hong hawj goenglaux guh, naihlaux youq ranz guenj lwgsai hung caeuq lansai iq, ndaejhoengq couh guh di hongfwngz. Gwn mbouj you daenj mbouj heiq youq hix onj lo.

Naihlaux naeuz:“Ndwen gonq, boux daih’it gyahcangj ranz gou naeuz de gaenq ra ndaej yihyen, mbouj geijnanz couh ndaej daiq lwgsai hung bae yw lo, daengz seizhaenx mbouj miz saek di ngaenz baenzlawz ndaej.”

Gou naeuz:“Dwg ha, dwg ha, mwngz baenzneix saenq gou, gou couh bang mwngz ba.”

Naihlaux fwngz gaem aen daehbaengz ndeu, ndwn daengz doiqnaj gou, baenq gyaeuj yawjyawj seiqhenz, gietdingh mbouj miz vunz raen le, caegcaeg ndenq hawj gou, naenz:“Neix couh dwg sam fanh maenz, mwngz bang gou yo ba.”

Naihlaux gangj liux couh dauq ranz de bae lo. Gou muengh duz ngaeuzlaeng de, roxnyinh naih neix caen hojlienz, ngoenzgonq ienq de gangj lai gangj daih, seizneix dauqfanj muengh de caiq lai gangj geij coenz dem, de dauqfanj lumj guhcaeg nei mbouj gangj lai saek coenz.

Gou ngoenzngoenz naengh youq ndaw ranz guh hongfwngz, sibgvenq banringz aeu ninz yaep ndeu. Ngoenz ndeu, gou ninzringz ngamq hwnqdaeuj haidou, lwgsai iq gaem aen civanzgi ndeu daeuj daengz bak dou gou naeuz:“Mwngz yawj, daxmeh gou dauq lo, dwg de cawx aen civanzgi neix hawj gou.” Lwgsai iq rim naj angqyangz.

Gou coh bakdou naihlaux cim da ndeu, mehmbwk gwnz daenj buhgek, laj daenj vaqniuzcaij ndeu coh gou ngaek gyaeuj. Yawj siengq couh rox mbouj dwg vunz bonjdieg, gou naeuz:“Seizlawz dauq daengz.”

“Ngamq daengz ranz yaep he.” Mehmbwk doq gangj doq byaij haeuj ranz gou daeuj.

“Vut lwg ce gvan geij bi mbouj goq, mwngz caen cuengq ndaej roengz o.” Gou naeuz.

“Geij bi neix gou mbouj dwg mbouj gyaez lwg、 mbouj siengj gvan, ranz vunz neix daiq gungz lo, diegmbanj gyoengqde daiq gungz lo. Gou heuh daeggvan guhdoih okbae dajgoeng, de cungj naemj youq bonjdieg ra monzloh, gwnzbya dwg rin, ndawreih dwg nya, bonjdieg miz gijmaz monzloh? Gou mbouj okbae mbouj ndaej.” Mehmbwk naeuz.

“Baezneix dauq le, mbouj okbae loba.” Gou cam.

“Dingq gangj youq neix hix miz hong guh, langh miz hong guh gou couh mbouj okbae lo.” Mehmbwk naeuz.

“Miz a, geij bi gonq gou hix youq baihrog guhhong, seizneix dauq ranz miz hong guh cij mbouj okbae.” Gou naeuz.

“Gungcangjdangj caen ak, geij bi seizgan gvaqbae couh hawj bouxrungh bienq ndei, hawj bouxgungz bienq fouq, gou mbouj okbae lo, hix youq bonjdieg ra di hong he guh, roengzsim ciengx lwg ganq gya, caiq okbae, ranz vunz neix couh sanq liux lo.” Mehmbwk riu naeuz.

Banhaemh, goenglaux gaj duz bit ndeu caeuq duz gaeq ndeu, mehmbwk caeuq lwgsai hung swiq byaek cawj haeux, naihlaux buen daiz buen daengq, daengx ranz nyaengqdikdik. Haemhhaenx, gyoengqde guh song daiz byaek, gyoengq beixnuengx gyahoh cungj gvaqdaeuj gangjgoj, naihlaux heuh gou gvaqbae caeuq gyoengqde guhdoih gwn caeuz.

Ndaw ranz naihlaux gwn noh yetlaeuj, nauhyied humhum. Boux daih’it gyahcangj ranz naihlaux hix daeuj daengz lo, lwgsai hung ndenq laeuj youh ndenq ien, naeuz:“Docih bouxdaeuz bangcoh, hawj dou duet hoj duet gungz, hawj dou bouxrungh miz ranz youq.”

Lwgsai hung cingqciengz dwk hawj boux daih’it gyahcangj miz di doeksaet, de naeuz:“Gou haemhneix daeuj, it dwg daeuj goenghoh baz mwngz dauq lo, ngeih dwg daeuj dunghcih mwngz, dou gaenq ra ndei yihyen, ngoenzcog mwngz ndaej bae yw bingh lo. ”

Lwgsai hung riunyi’nyi naeuz:“Mbouj yungh bae lo, bingh gou haemhneix ndei gvaq.”

Mehmbwk hix ndwn hwnj, coh boux daih’it gyahcangj gingqlaeuj, naeuz:“Docih bouxdaeuz miz sim, baezneix hwnj, gij bingh daeggvan gou gou gag yw lo.”

Gou gag naemj: Muengh mehmbwk gangj daengz guh daengz, lwgsai hung roxgwn roxsuenq. Muengh ranz vunz neix yied ngoenz yied ndei.

（2 sat）