Bihaenx haemhndaep, Lij Gen youq ranz nyaengq dajcawj, Siujyen caegcaeg gwih danci okbae lo, de cawj byaek ngaiz ndei liux, mbouj raen dahlwg youq ndaw rug, dwk geij baez denva hawj dahlwg, hix mbouj miz vunz ciep.

Cawj haeux byaek baenz le, de hix mbouj miz simcingz gwn saek gaemz, de siengj dahlwg bae gizlawz ne? Banringzgvaq, Lij Gen ciep daengz aen denva ndeu, dwg boux vunzsai najseng ndeu dwk daeuj, heuh de vaiq di bae yihyen ndaw si, de baenzlawz hix siengj mbouj daengz, dahlwg swhgeij oksaeh lo.

Bouxsai cungnienz ndeu yiengq de byaij gvaqdaeuj, gaem fwngz Lij Gen, saenzdwddwd naeuz:“Dahcej doiq mbouj hwnj, doiq mbouj hwnj.” Gangj liux couh youq gwnz namh saxbaiq mbouj dingz, aen gyaeuj caeuq dibanj bungq dwk yiengj “boengboeng”. Lij Gen mazmwnh dangq yawj mbouj raen. De sim’in dwk laep da, ndaw sim miz cungj cungdoengh ndeu, siengj baenzlawz sik ndaek bouxsai dangqnaj neix baenz meng soiq bae.

Yaep ndeu, bouxsai cungnienz neix deng gyauhgingj gaemh bae lo. De heuh Liuz Singh, haetromh youq ranz bohda gwn haujlai laeuj, de laihnaeuz haemhndaep mbouj miz gyauhgingj, couh hai ci bae ranz caeuq vunz ndaw ranz doxcomz. Doeklaeng, youq giz vangok ci de daemj laemx Siujyen. Gyaeuj Siujyen、gwnz ndang lae lwed. Seizneix de cij rox ok daihsaeh lo!

Lij Gen moengzloengz mangxlangx daeuj daengz naj congzbingh, fwngz lumhlumh dahlwg. Siujyen gaenq mbouj doengh saek di, De lumj saihoz yaek goenq dwk hemq naeuz:“Siujyen! Siujyen!” De baihnaj laepcupcup, aen gyaeuj ndaem laemx youq naj congzbingh……

Haet cieng coit, Lij Gen ndiu lo, de ninz youq gwnz congz, lwgda cimyawj dingjranz, coenz vah ndeu hix mbouj gangj, de lumj seihaiz nei, saeknaj caemrwgrwg! De mbouj mingzbeg dahsau swhgeij gig roxsoq neix, vihmaz haemhndaep gag naengh danci okbae? Vih gijmaz? De siengj mbouj doeng.

Dahlwg deng cuengq youq ndaw “ranzbouxdai” yihyen, gyoengq caencik bang de bae banh saehlaeng.

De gaenq roengz congz mbouj ndaej lo, haujlai caencik baengzyoux daeuj yawj de, daj Lij Gen doengh gij lwgda byouqgyoeng haenx, daihgya roxyiuj sim de deng mbon gyoeng lo.

Ndwencieng ndawde dauqcawq dwg gij heiq cieng, gwnz gai hung hainduj nauh daeng’va, byaij caencik baengzyoux, hai aek gvangq gwn, Lij Gen youq ndaw yihyen baez yw couhdwg ndwen lai.

De cungj yawjraen gij ngaeuz Siujyen youq dangqnaj bibuengq, mizseiz youq baihnaj aengingq roi byoemgyaeuj raez ndaemndatndat de, mizseiz youq laj daengdaiz sij saw.

“Daxmeh, mwngz raen gou sau lwi? ” Siujyen roi gyaeuj liux cungj cienq ndang gvaqdaeuj cam de, de cungj dwg huk dwk naeuz:“Sau…… Sau…… Bouxlawz cungj beij mbouj ndaej lwg gou. ”

Lij Gen rox gij vah bonjfaenh gig mbouj miz saenzheiq, de ndatheiq swhgeij mbouj doeg saw, mboujne aeu gangj geij coenz vah ndei daeuj haenh dahlwg, hawj dahsau daekeiq baez ndeu couh ndei lai lo!

Yaepda seizcin daeuj daengz le, raeujrubrub lo, va hix hai, Lij Gen ok yihyen, dauq daengz ndaw ranz, cungj mbouj miz saek di vuenheij.

Miz ngoenz ndeu, boux gyauhgingj daeuj daengz ndaw ranz de, soengq daeuj geu buh hoengz oiq ndeu. Lwnh de naeuz:“Ngoenzhaenx dou bae giz ci doxdaemj, dahlwg mwngz dawz geu buh neix gaem ndaet youq ndaw rungj, seizhaenx de lij singjsak, heuh gou itdingh gyau geu buh neix hawj mwngz.”

Lij Gen song fwngz gaem dawz geu buh, de menhmenh siengj daengz, ndwenlab caeuq Siujyen bae youz hawciengz, de sawq gvaq geu buh neix, Siujyen hix heuh de cawx geu buh neix.

De sij mbouj ndaej cawx, doeklaeng duet geu buh neix roengzdaeuj, boux mehmbwk gai buhvaq itcig naeuz de daenj geu buh neix hab ndang youh ndeiyawj.

“Daxmeh, gou siengj cangndang mwngz ndaej hab seizhwng, mwngz maj ndaej baenzlai gyaeundei! Couhdwg mbouj gyaez cangndang swhgeij, mbouj rox baenzlawz daenj buh cij gyaeu.”

Ndaw uk Lij Gen hoplangh gij vah Siujyen. “ Daxmeh, gou roxnyinh mwngz daenj saek hoengzoiq ndei- yawj, dak ok gwnz naj mwngz miz rongh.” Siujyen ngeix gvaq gyaeuj, yawj naj de riu dwk naeuz.

“Meh gou ha!” Lij Gen daih hemq sing ndeu, “dahlwg ha, dwg daxmeh haih dai mwngz ha!” De hainduj yungh fwngz haenq moeb aen gyaeuj caeuq najaek bonjfaenh.

（2 sat）