Youq henz Dahyougyangh, miz aen dieggvangq hung ndeu heuh guh Gvangjsih Yougyangh Gvangvugiz, neix couhdwg giz dieg guhhong ciuhvunz gou.

Gizneix liz yienhsingz gyae, mbouj nauhyied lumj yienhsingz, hoeng giyez dou miz aen conzdungj ndei ndeu, couhdwg moix daengz gouj nyied gouj, duiyouh dangjcihbu couh cujciz fatdoengh gyoengq vunzlai, yunghsim couzbanh aen ciet neix, hawj bouxgeq ndaw gvangq doxcomz youq giz ndeu, angqyangz gvaq gouj nyied gouj.

Ngoenzhaenx, gyoengq vunzlai caezsim okrengz okcienz guh saeh ndei. Banhaet, gyoengqde mizmbangj ceh haeuxcid guh haeuxnaengj haj saek; mizmbangj gaj gaeq gaj bit; miz- mbangj guh byaek cawj gwn; mizmbangj swiq vanj swiq byaek baij daiz, bouxboux nyaengqngwt, mbouj miz bouxlawz ienq saek coenz.

Gyoengq bouxgeq homh naengh gyang congz guhdoih gangjgoj. Banringz, gij byaek ndatfoedfoed homfwdfwd couh baij hwnj daiz lo, Daihgya cingj bouxgeq roengz congz caemhdoih gwn caeuz, bouxboux dawz cenj laeuj hwnj, mwngz gingq gou ndangcangq bingzan, gou gingq mwngz saehsaeh hab’eiq, vah hohfuk gangj mbouj dingz, bouxboux naj riu lumj va hai.

Gwn caeuz sat le, yietnaiq yaep he, bouxgeq、lwgnyez、bouxcoz couh hainduj hwnj daiz doxlwnz ciengq go diuq foux.

Gyoengq bouxgeq youq lajdaiz yawj dwk lwgda mbouj rox yaep bae, yaepciuq bekfwngz gyuklala, yaepciuq sing riu gokhaha, yaepciuq sing daemq gaen ciengqgo. Saekseiz lij miz bouxcoz hwnj daiz loengh duzlungz loengh duzsae, nauhyied vuenheij lumj gvaqcieng nei.

Boux canghsijfap ndeu youq henz daizheiq baij daiz baij ceij sij saw hawj vunzlai, byaibit de raeuz lumj raemx lae, yaep lumj duzngwz byaij, yaep lumj duzlungz mbin, cihcih ndeiyawj, gyoengq bouxgeq bouxboux maij aeu gij saw de.

Gwn ndei youz ndei, youh miz sijfap soengq, gyoengq bouxgeq gamj- doengh dangqmaz. bouxboux haenh aen gvangq ceiq miz sim, gyaezhoh bouxgeq lumj bohmeh caen nei.

Gyoengqvunz baihrog cungj geizheih, bi 2016 giz dou haujlai aen dieggvangq deng gven, gaenq haujlai bi mbouj miz maz souhaeuj lo, vihmaz aen gvangq dou lij naeksim couz cienz bibi hawj bouxgeq gvaq gouj nyied gouj ne? Gizsaed, neix dwg gij conzdungj ndaw gvangq, hix dwg aenvih vunz ndaw gvangq gyaezhoh bouxgeq. Vih hawj bouxgeq ndaw gvangq gvaq ndei gouj nyied gouj, duiyouh dangjcihbu suhgi Laujcau guhdaeuz gien cienz, lij iu giyez bangxhenz camgya hozdung, giyez lauxbanj bouxboux cungj gamjdoengh, gag gien cienz, lij miz haujlai bouxcoz youq baihrog dajgoeng mbouj ndaej ma ranz haenx, hix foenfoen geiq cienz dauq. Couh yienghneix, mwngz ok ngaenz gou ok rengz, bibi hawj bouxgeq angqyangz gvaq ndei gouj nyied gouj.

“Dahyougyangh raez youh gvangq, mbouj beij cingzngeih dangj raeuz naek. Gingqhoh bouxgeq vunz doxhuz, saedceij baenaj angqvauvau.” Bi daengz gouj nyied gouj, bouxgeq ndaw gvangq cungj angq dwk eu fwen. Aen ciet neix, doiq bouxgeq gizwnq daeuj gangj, mbouj miz maz citgeiz, hoeng doiq bouxgeq ndaw gvangq daeuj gangj, caen dwg daegbied vuenheij, daegbied raeujrub.