11 nyied 21 hauh, gicej daj aen Hoih Yaenglwnh Bienraiz Okbanj 《Gvangjsih Nenzgen》 roxyiuj, 《Gvangjsih Nenzgen》 daengz seizneix gaenq laebdaeb okbanj 40 gienj, bang fugsaeh gih raeuz ginghci sevei hwngfat gunghawj aen cengjdaemx deihcingz youqgaenj. Dangguh swngjgiz cunghab nenzgen cauhganh haemq caeux Cungguek moq laebbaenz gvaqlaeng, 《Gvangjsih Nenzgen》 soqdajyaenq caeuq soqfathengz youq ndaw daengx guek swngjgiz nenzgen bauj baizmingz youq baihnaj, caemhcaiq lai baez ndaej bingz baenz nenzgen daegdaengj、nenzgen daengjdaeuz.

《Gvangjsih Nenzgen》 bi 1985 gienj nduj okseiq doxdaeuj, gaenq laebdaeb okbanj 40 gienj. 40 bi doxdaeuj, 《Gvangjsih Nenzgen》 doenggvaq 7000 lai fanh cih saw、1 fanh lai mbaw dozbiuj, naeuz gih raeuz cwngci、ginghci、vwnzva、sevei、swnghdai vwnzmingz hwnqguh caeuq hwnqguh aen dangj doenghgij dieg neix hwngfat ginglig、cingzcik ronghsag caeuq gingniemh dijbauj liuxliux, baenz cek saw hongdawz gienzvi caeuq gij camgauj youqgaenj roxyiuj Gvangjsih、yenzgiu Gvangjsih.

Seizneix, 《Gvangjsih Nenzgen》 guhbaenz banjbonj seizneix caeuq gaxgonq doxciep ndaej swnh caeuq daengx lienhdiuz okbanj, ragdoengh daengx gih si yienh cunghab nenzgen caeuq ciennieb nenzgen hwngfat. Daj bi 2018 gih raeuz guhbaenz nenzgen cwgoemq liuxliux le, daengx gih binaengz bienraiz okbanj sam gaep deihfueng cunghab nenzgen 126 loh, linghvaih miz ciennieb nenzgen 50 lai loh. Bi 2016 cauhganh 《Gvangjsih Duzgen》, bi 2023 cauhganh 《Dahyinh Bingzluz Hwnqguh Nenzgen》, caemhseiz bienraiz ceksaw deihcingz、cek nenzgen genjdanh doenghgij saw neix, guhbaenz aen buenz saehnieb nenzgen aeu cunghab nenzgen daiqlingx, bouhmonz nenzgen、hangznieb nenzgen、ciendaez nenzgen doenghgij neix hwngfat liuxliux.(Linz Seznaz)