“Hoihhoengh vwnzyoz Cungguek 2025·haemh ciengj vwnzyoz lwgnyez” mboengqneix youq Huznanz Cangzsah haimuq. Haemhhaenx fat Aen Ciengj Vwnzyoz Lwgnyez Maenhndei Daengx Guek Gaiq Daih Cibngeih, 18 bouh(bien) faenzcieng ndaej aen mingzdaeuz neix. Faenzcieng canghraiz Gvangjsih Vangz Yungjyingh 《Daxdaiq Langzdung》 ndaej ciengjsawcuenh, neix dwg gek 15 bi le canghraiz Gvangjsih youh caiq ndaej aen ciengj hung neix. Gaxgonq, canghraiz Gvangjsih Bwzbingh ndaej Aen Ciengj Vwnzyoz Lwgnyez Maenhndei Daengx Guek Gaiq Daihroek、Gaiq Daihbet gvaq.

Aen Ciengj Vwnzyoz Lwgnyez Maenhndei Daengx Guek dwg Cungguek Cozgyah Hezvei cawjbanh, muzdiz dwg gujli cauhguh vwnzyoz lwgnyez maenhndei, doinyoengx vwnzyoz lwgnyez mwnhoengh hwngfat, caeuq Mauzdun Vwnzyozciengj、Lujsin Vwnzyozciengj、Daengx Guek Siujsoq Minzcuz Vwnzyoz Cauhguh Cinmajciengj caemh baiz baenz seiq aen ciengj hung vwnzyoz daengx guek Cungguek Cozgyah Hezvei cawjbanh, dwg gaiq mingzdaeuz ceiq ak vwnzyoz lwgnyez Cungguek. Gaiq neix 18 bouh（bien）faenzcieng ndaej ciengj ndawde, sawcuenh 7 bouh、sei bouh ndeu、gojlwgnyez 5 bouh、gohvan vwnzyoz 2 bouh、sawdoz lwgnyez 2 bouh、canghraiz bouxcoz faenzcieng dinj ndei bien ndeu.

Faenzcieng Vangz Yungjyingh 《Daxdaiq Langzdung》 dwg lwnh gij yienghsiengq dah lwgnyez ndaw sim fungbix daengz dajhai aen sim ndeu, caeuq gij yienghsiengq daxdaiq ginggvaq hojnanz mbouj gaijbienq sienhsoh. Bingzveij nyinhnaeuz, faenzcieng rox sim lwgnyez lailai, damqra mauhgvaq bonjfaenh, saenq gyaez caeuq saenq ndaej hawj sim doxgyau, youq ndaw vwnzva bonjdieg naekgywg mbeguh gij ciengzgingj seiz lwgnyez.

Geij bi neix daeuj, Swcigih Dangjveij、Cwngfuj yawjnaek vwnzva hwnqguh caeuq vwnzyi saehnieb hwngfat, mboujduenh cauhmoq aen gihci gikleih cauhguh vwnzyi cauhnduj, coihdingh 《Aen Banhfap Gikleih Cozbinj Vwnzyi Vwnzva Maenhndei Gvangjsih》、okdaiz《Aen Banhfap Gikleih Cozbinj Vwnzyoz Cauhnduj Maenhndei Gvangjsih》 doenghgij neix, dajcauh aen binjbaiz vwnzyoz Gveiginh. Canghraiz Gvangjsih laebdaeb aeundaej Mauzdun Vwnzyozciengj、Daengx Guek Siujsoq Minzcuz Vwnzyoz Cauhguh Cinmajciengj、Aen Ciengj Vwnzyoz Lwgnyez Maenhndei Daengx Guek doenghgij ciengj youqgaenj vwnzyozgai neix, gij saehnieb vwnzyoz Gvangjsih hwngfat hoenghhwd、cingzcik lailang.

(Liuz Yi)