第十五期

原文：

若夫日出而林霏开，云归而岩穴暝，晦明变化者，山间之朝暮也。野芳发而幽香，佳木秀而繁阴，风霜高洁，水落而石出者，山间之四时也。朝而往，暮而归，四时之景不同，而乐亦无穷也。

——欧阳修《醉翁亭记》（节选）

译文：

1

Daengngoenz okdaeuj ronghsagsag,

Mokhau ndaw ndoeng rox gak sanq,

Oenq hwnjfoedfoed laepyamyam,

Ndawgamj dauqcawq fuemxfubfub.

Miz laep miz rongh daeuj doxsan,

Banhaet banhaemh saek mbouj doengz,

Neix couh dwg gij yiengh ndawndoeng,

Haet haemh gingjsaek mbouj doengzyiengh.

Gyangndoeng gizgiz hai rim va,

Raqraq feihrang con dungxsaej,

Gwnzgwnz lajlaj maj rim faex,

Ndaej dangj ndit youh ndaej cw raemh.

Seizsou daeuj daengz mbwnheiq ndei,

Daihdeih mwi hau raemxfwn noix,

Gwnzroen rinhau loq lumj roi,

Noix raen seiqgeiq ndawbya neix.

Banhaet okdou banhaemh ma,

Seiqgeiq ndaw bya saek lingh gak,

Gwnzbiengz cien fanh yiengh vaiqlag,

Gak boux gak bae yaengyaeng cimz.

（平果市：余 执/Yiz Ciz）

2

Cajdaengz daengngoenz hwnjdaeuj, mojlox sanq liux, ndaw ndoeng couh ronghsagsag; danghnaeuz fwjmok comz gvaqdaeuj, ndaw lueg couh fuemxfwdfwd; gij gingjsaek rongh roxnaeuz amq, dwg banhaet caeuq banhaemh ndaw bya neix. Va’bya hai ndaej homfwdfwd, ndoengfaex hungsang mwncupcup, mbwn sang seuqsansan, mwisan hausuepsuep, raemx hauq roengzbae, rin moj okdaeuj. Gijneix couh dwg gij gingjsaek seiqgeiq ndaw bya neix. Banhaet haeuj bya, banhaemh dauq ranz. It nienz seiqgeiq gingjsaek mbouj doengz, yinxdaeuz hix mbouj liux mbouj duenh.

（崇左市江州区：谭群瑛/Danz Ginzyingh）

3

Daengngoenz okdaeuj, laepmok ndaw ndoengfaex cix sanq bae. Fwjmok doxcomz gvaqdaeuj, ndawlueg cix bienq laep liux. Gyanghaet cix laep bienq rongh, gyanghaemh cix rongh bienq laep. Mbangjseiz laep mbangjseiz rongh, haethaemh ndaw lueg cix yienghneix lo. Ndokva hai cix heiq hom, gofaex mwn cix raemh. Mbwn’gvengq ronghndei, raemx mboek cix loh rin okdaeuj, seiqgeiq ndaw lueg cix yienghneix lo. Gyanghaet bae mbwnfuemx dauq, gingjsaek seiqgeiq mbouj doxdoengz, goj mizyinx raixcaix.

（云南省广南县：李顺芬/Lij Sunfwnh）

4

Daengngoenz baez swng hwnjdaeuj, guenghndoeng mojlox couh sanq hai seuqsat lo, mwh daengz fwjmok youh doxcomz doxnyup hwnjdaeuj le, ndaw lueg youh bienq fuemxfwdfwd, youz momj bienq rongh, youh daj rongh bienq fuemx, gij doxvuenh bienqvaq neix couhdwg haet haemh ndaw lueg. Youq ndaw ndoeng go va baez hai lo, gij heiq va haenx hom unq maez vunz, go faex maj sang mwnnoengq, youq laj goek go de raemhrwdrwd hix liengzseuseu, mbwn sang heiq sangj, naefiengz hausaksak, raemxrij mboek roengzbae, gij rin ndaw rij couh loh okdaeuj, gijneix couhdwg gingjsaek gyaeundei seiqgeiq ndawlueg. Haetromh bae, daengz haemh fuemx dauqma, seiqgeiq gingjsaek mbouj doxdoengz, gij yinxdaeuz haenx hix dwg mbouj rox liux mbouj rox caenh ha.

（平果市：黄启维/Vangz Gijveiz）

5

Gangj daengz daengngoenz swng hwnjdaeuj, gij mok ndaw ndoeng sanq lo, gij mokfwj caezcaemh haeujdaeuj, ndaw lueg couh yienj ndaej laep lai lo, aen gingjsiengq roxnaeuz laep roxnaeuz rongh, bienqvaq mbouj doxdoengz neix, couh dwg banngoenz caeuq banhaemh ndaw bya. Baihrog gij va mbouj dwg vunz ndaem, gag hwnj haenx hai lo, miz raq heiq hom cingyouh ndeu; doengh gij gofaex ndei de nye lai mbaw mwn, cauxbaenz benq raemhrwdrwd bae, rumz sang mwi hau youh seuq, mbwn sang heiq sangj, raemx mboek doxroengz, rin loh okdaeuj, neix couh dwg seiqgeiq gij gingjsaek ndaw bya. Ngoenznaengz haetromh hwnjbya, daengz aen mbwn fuemx le dauqma, gij gingjsaek cungj mbouj doxdoengz, gij yinxdaeuz de mbouj liux mbouj caenh, hawj vunz maezmwd bae.

（上林县：苏达进/Suh Dazcin）

6

Danghnaeuz daengngoenz okyienh, mok couh deuzsadsad, fwj youq gwnz lueg comzgyonj, gamj cix laepngaungau. Giq amq giq rongh doxbienq neix, couh dwg haemh caeuq haet ndaw lueg ha. Vacwx hailangh, sanqfat heiqhom, faex ndei mbaw maed, lumjbaenz liengjdingz.

Mbwn sang rumz cingx, mwisan hausak. Raemx roengz rin rongh, cix baenz seiqgeiq ndaw lueg ha. Haetromh byaij hwnj bya, banhaemh doih ma ranz, seiqgeiq gingjsaek cungj mbouj doengz, aen yinxdaeuz neix hix mbouj sat mbouj caenh a.

（南宁市西乡塘区：韦肖纯/Veiz Siuhcunz）