（ciep daih 3690 geiz）

Daegyungj mbouj lau saek di, de gaem maenh gij bauj neix, yungh rengz naeuz:“Ndaek lungzyak mwngz, mwngz laeg naemj aeu gij bauj neix caiq bae haih beksingq lo.” Gangj liux, de aeu aen huznyawh okdaeuj, niemh gij fouzfap, aen huznyawh sikhaek miz raemx byoq okdaeuj, byoq bae coh lungzyak. Duzlungzyak deng raemx byoq, dingj mbouj ndaej laemx youq henz conghgamj, hoeng de lij buekmingh fanjgang. Daegyungj youh dawz naedcaw okdaeuj, vengh hwnj gwnzmbwn bae, naedcaw sikhaek ndongqrikrik, gwnz namh yaepseiz hwnj hoenz laepcupcup, bienqbaenz diuz cag’oen, hung gvaq duzlungzyak, maenhsaedsaed haed haeuj aen ndang duzlungzyak bae. Duzlungzyak cukcak heuh dai heuh lix, Daegyungj swngzgei dawz gaiq dwngxsaenz moeb haeuj gyaeuj duzlungzyak bae, cij raen gaiq dwngxsaenz yap ok feiz henj, duzlungzyak deng feiz byamz dai lo.

Daegyungj dawz sam gienh bauj dauq daengz ndaw mbanj, cix raen miz doiq vunzyoux ndeu aenvih ra mbouj dawz raemx, doeklaeng doxgot dai lo. Daegyungj raen le siengsim dangqmaz, de gietdingh aeu aen huznyawh daj ga Dahraemxhoengz yinx raemx gvaqdaeuj, hawj raemx lae gvaq giz doiq vunzyoux dai neix, gvaqlaeng vunzlai couh heuh neix guh “Cingzyinzvanh.” Daj neix hainduj, Mbanjsanggiuz ciengxlwenx miz raemx lae gvaq doiqnaj mbanj, vunzmbanj couh miz raemx gwn, aeu raemx daeuj ndaem haeux ndaem byaek, ndaem mak ndaem sawz. Daegyungj youh aeu naedcaw bae hawj miuzhaeux baenz vaiq baenz lai, bibi ndaej ndaem song miuz haeux, ranzranz haeux rim cang, gwn mbouj liux mbouj caenh, bouxboux angq ciengx mou ciengx gaeq, ciengx cwz ciengx yiengz. Vunzmbanj ngoenz beij ngoenz gwn ndei, youq onj. Vih hawj vunzmbanj bouxboux ndang cangq, Daegyungj youh yungh gaiq dwngxsaenz bae bang vunzlai yw bingh, hawj vunzlai bouxboux maengh hwnjdaeuj, vunzlai cibfaen gyo’mbaiq Daegyungj, dangq Daegyungj baenz boux vunzbaed.

Gvaqlaeng, Mbanjsanggiuz mbouj dumh mbouj rengx, beksingq youq onj angqyangz, saedceij gvaq ndaej vuenyungz gyaeundei.

Vih geiqniemh sam gienh bauj daiq fukheiq daeuj hawj vunzmbanj neix, vunzmbanj couh heuh goengqbya laeng mbanj heuhguh “Sambaujsanh”, doengzseiz youq gwnzbya laebbaenz aen ranzmiuh ndeu. Moix daengz cieng daengz ciet, vunzlai cungj bae ndaw miuh caeq baed.

“Valeux hai, maklimz hoengz, haeuxnaengj haj saek coux beix- nuengx, Dahraemxhoengz lae fwen riengz hwnj, gou youq Sanggiuz deqcaj mwngz……” Aensaz hai haeuj gyangdah, gyoengq lwgsau Mbanj- sanggiuz youq gwnzsaz ciengq go diuq foux, aen ndang gyoengqde yawj hwnjbae mbaeumbengmbeng, lumj dahsien roengz lajdeih. Gyoengq lwgsau riengz yinhyoz ut hwet bi gumq, ndeiyawj dangqmaz.

Boux hakmbanj Mbanjsanggiuz naeuz, Mbanjsanggiuz doiqnaj dwg Dahraemxhoengz, baihlaeng dwg Sambaujsanh. Dah songhenz faexcuk ciengz heu, seiqgeiq mwn loeg; valeux hoengznding, lumj feiz remj, lumj daengngoenz, daeuj boiq gij raemx gij bya. Aiq dwg dieg de ndei, Mbanjsanggiuz mehmbwk bouxboux saundei gvaigvetgvet, youh aiq dwg ga Dahraemxhoengz neix ciengxlwenx daeuj nyinh aen conghhoz gyoengq mehmbwk, hawj gyoengqde seng daeuj couh rox guhfwen. Haemhhaenx, Veizcungj daegdaengq anbaiz aen yozdui ndeu cienmonz hawj gyoengqdou byaujyenj. Lwgsau Bouxcuengh caeuq lwgsau Yauzcuz Mbanjsanggiuz doxgap hwnjdaiz guhfwen doxdoiq. Gij singfwen gyoengqde lumj raemxmboq laeyetyet, menhmenh lae haeuj ga Dahraemxhoengz bae. Gyoengqde lumj miz fap miz fouz nei, hawj dou maez mbouj roxnyinh gvaqdaeuj.

Raemx Sanggiuz ndei, mboujdanh dwg gij raemx de lae doengh、saw seuq、unqswnh, lij aenvih dwg aeu gij raemx neix daeuj siulaeuj, laeuj engq hom, engq get, engq miz feihdauh, de dawzbak、 nyinhhoz hawj vunz gwn fiz mbouj singj. Haemhhaenx, gyoengq baengzyoux Dava caeuq Bwzswz doxcomz caemhdoih, ndingq laeuj Sanggiuz, yaepseiz, daengx aen ranz laeuj homfwdfwd, gij heiqlaeuj mbin hwnj gwnzmbwn, mbin gvaq gwnz Dahraemxhoengz. Gou baez gwn amq ndeu, gij feihdauh sikhaek youq byailinx sanq okdaeuj, get daengz ndaw dungx, raeuj daengz ndawsim.

Laemxseiz dwg moix boux vunz okrog guhhong, cungj deng raemx Sanggiuz swiq gvaq, aiqnaeuz gyoengqvunz de youq baihrog, hoeng ndawsim cungj rox gamjaen, doiq ranzmbanj ndiep ndaej gig laeg, seizsei cungj siengj bauqdap ranzmbanj.

“Dahraemxhoengz lae bae haij, fwjgyaepbya ingj raemxlangh, niemh gij aencingz cungj mbouj lumz. Sanggiuz dwg ranzmbanj gou, Sambaujsanh ronghndwen hwnj, ciuq youq Cingzyinzvanh, mbanj laj goek goreiz, meiz(miz) bohmeh gou youq, gyangfwngz gaem huz laeuj, yawj va- haeux biu hom, ngiengx gyaeuj yawj fwj mbin, sim gou ngeix bohmeh……”

Soujgo《Sanggiuz, Dwg Ranz- mbanj Gou》laeglemx youq henz rwz gou ciengq hwnjdaeuj, gij senzliz gyaeundei, gij sing go rwenzrwd, yaepciuq doengh daengz aen sim gou, hawj gij raemx ndawsim gou fubfab mbouj dingz. Aenvih gou hix dwg boux vunz youzlangh youq baihrog ndeu, faenh siengjniemh ranzmbanj neix, mboujguenj gek geijlai gyae, cungj mbouj ndaej mad bae.

Sam nyied, va cop va hai, dujduj gyaeundei, mbungqmbaj daeuj gwnz va diuqfoux. Gyanghaet, nditndat menhmenh ciuq youq gwnz Dahraemxhoengz, raemx fubfab baebae dauqdauq, lumj fukveh henjgim rox lae rox doengh nei, ndongqrikrik. Gwnz haenzdah, ranz baenz baiz baenz baiz caezcingj sohrwdrwd, gyanghaet youq ndaw raemxmok loq raen loq mbouj, lumj youq ndaw fangzhwnz nei. Mizseiz cienz daeuj geij sing ma raeuq gaeq haen, hawj aen mbanj caemrwgrwg neix daiqdaeuj haujlai senggei, hawj vunz roxnyinh saedceij yied daeuj yied ndei. Riengz gij roen iq ndaw mbanj menhmenh byaij bae, yawjraen benqbenq haeuxnaz cungjdwg heuneuneu, nyodgva youh heu youh oiq, youq ndaw rumz bi bae bi dauq, lumjnaeuz gangj gij goj vunzmbanj neix gaenx guhhong ndaej fungsou. Goengqbya Sambaujsanh, lumj boux vunzloet nei, caemrwgrwg dawz gij dieg neix, guhcingq gij bienqvaq Mbanjsanggiuz. Goengqbya Sambauj- sanh ginggvaq ndwenngoenz ciuh geq, hoeng de ciengxlwenx mbouj laemx.

Youq gizneix, gou lumz mbouj ndaej gij cingzngeih aen mbanj neix. Gyoengqvunz ndaw mbanj, mbouj- guenj bouxsai bouxmbwk, mboujguenj bouxlaux bouxiq, gwnznaj cungj miz riu, riu lumj rumzcin raeujrubrub. Dou haeuj ranz ndeu bae, bouxcawj sikhaek dawz daengq dawz caz dawz mak okdaeuj hawj dou gwn, angqcoux dou daeuj. Aen ciengzgingj neix hawj dou gikdoengh dwk raemxda conh. Miz yahgeq ndeu, ndaej betcib lai bi, de song fwngz saenzdedded ndenq caz hawj dou, dou raen aen lwgda de, roxnyinh de doiq giz dieg neix gyaezlienh, roxnyinh de aenvih ranzmbanj swhgeij miznaj. Caeuq de gangjgoj, dou rox bouxmbauq ndaw mbanj caenhguenj okrog guhhong, hoeng ndawsim gyoengqde cungj gvaqniemh aen ranzmbanj neix. Moix daengz cieng daengz ciet, gyoengqde geijlai gyae cungj dauq Sanggiuz, caeuq bohmeh beixnuengx ndaw ranz doxcomz gwn haeux. Faenh cingzngeih ranzmbanj neix, lumj geu mae nei, maenhmaenh cug boux youzlangh baihrog caeuq vunzcaen gwnz ranz doxcoh, mboujlwnh bae geijlai gyae, bengq cungj bengq mbouj goenq.

Daengz ngoenzlaeng, dou liz Sanggiuz dauqma lo, bouxboux cungj sij mbouj ndaej, caen dwg lumj coenz fwen naeuz:

Mbouj byag le yaek byag,

Byag bae ndiep lailai,

Donq daengz caeuz daengz ngaiz,

Hai soujgih cix mungh(ngaez).

（2 sat）