Simjngeih Mbanjliengz cungj suenq banh ndaej bonj cunzcez sinyungse moqsak haenx lo. Fan bonj cunzcez, coij saw “210.00” “Sinhnungzbauj” ieqetet yaenq youq baihndaw lumj diuz gimdiuz nei, ndongqliklik、naekdumdum, de sim angqfwngfwng, gag damzmoenmoen naeuz: “Aen seiqdauh neix caen ndei lai ha, aen seiqdauh neix caen ndei lai ha, lwnz daengz doengh boux vunzgeq lajmbanj raeuz ndaej lingx ‘ngaenz ciengxlaux’ lo!”

Doenghbaez, bouxguhnaz lajmbanj daengz geq mbouj miz rengz guhhong le, couh mbouj miz saek gaiq souhaeuj lo, cienzbouh dwg baengh lwg ciengx. Danghnaeuz lwg guh mbouj ndaej gwn, bouxlaux couh vijsij lai lo, ciengzseiz gwn mbouj baenz gwn, daenj mbouj baenz daenj, donq imq donq iek, ndwenngoenz hoj gvaq gaujvaq bae. Vunz ndaw singz ne? Couh ndei lai lo. “Bouxboux ndaej gwn ya, guekgya ok ngaenz ciengx, ngoenz mbouj guh saek yiengh, ndaengndiengq lumj saenzsien.”

Simjngeih fangzhwnzloq cungj ngeix mbouj daengz, lizsij hwngfat daengz ngoenzneix, vunzgeq lajmbanj caemh ndaej ndwenndwen lingx “ngaenz ciengxlaux” lo. “Dangq vunz neix mingh ndei, seiz geq miz yiengj lingx, gwnzmbwn doek aen bingj, dinghnaengh caemh ndaej gwn.”

Simjngeih mwh lij dwg lwgsau youq ranzmeh Mbanjdakdien, dwg dah guhhong ak gyae’gyawj okmingz ndeu, guhhong soqlaiz mbouj rox baeg mbouj rox naiq. De haeuj reih roengz naz coengzlaiz mbouj ienq haemz ienq hoj, guhhong dwgrengz hix mbouj raen mbwq. Dwk fwnz、gvej haz, daj cien、coemh vax, gaiqgaiq guh ndaej. De lij ndaej biek mbanj liz ranz riengz doih bae camgya guh hoep Danzlueg Suijgu, gwnz dieghong namhfaenx goenjloedloed, buhvaq hanh dumz gvaq ngoenz, fajdin、fajfwngz、gwnz mbaq cungj hwnj bop liux, ngoenz cij ndaej gak lingz ngaenz guh boujdiep gwn ngaiz, gizyawz “ngaenzhong” cix dwg aen swnghcanjdui bonjfaenh geiq hawj goengfaen.

Baen naz daengz ranz le, Simjngeih couh haq daeuj Mbanjliengz lo, caiq hix mbouj biek mbanj bae baihrog gvaq, song gvanbaz youq ranz ganq cibgeij moux nazhaeux, cibgeij moux reih oij, bibi ciuq seiz ciuq soq rap goengliengz bae gyau, lij ciengx ndaej sam boux lwg majhung baenz vunz.

Geijlai bi daeuj, Simjngeih ndaw hoz itcig miz diuz hot ndeu gej mbouj ndaej, mwh gaenhgyawj mbouj miz vunz, de ciengzseiz gag ngon fwen eu naeuz:

Dauqdaej vih yienghlawz,

Dauqdaej byawz guh dingh,

Ndawsingz cix gaglingh,

Guhhong lingx ndaej ngaenz.

Hoeng dou vunz lajmbanj,

Ngoenz ok hanh geij gaen,

Guhhong mbouj raen ngaenz,

Geiq goengfaen daeuj “yaeuh”.

Ndaemnaz gyau goengliengz,

Seiq nyied deng dungx iek,

Vunz ndaw singz ndi dieg,

Haeuxbieg gwn mbouj caez.

Ndaw singz caeuq lajmbanj,

Dangq lajdeih gwnzmbwn,

Caezcaez cungj bouxvunz,

Lumj boux gwnz boux laj.

……

Seizneix ndei lo, gwnz fwngz bonj cunzcez neix, ndaej ingjrongh gehgeh gungxgungx ndaw sim. Simjngeih sawqmwh ngeix daengz doenghbaez boux aubiuj de guh baenzciuh lauxsae lajmbanj, mwh de lij lix cij ngamq ndaej lingx bak lingz song bak maenz ngaenz duiyouh. Yienghneix doiqbeij hwnjdaeuj, Simjngeih couh lumj baenz le “naihlaux caijsoq” lajmbanj seizdaih moq lo.

Geij bi neix, lajmbanj hwng guh gij hozdung “lwgmbwk okhaq dauq ranzmeh”, raq rumz neix baez hwnj byawz cungj mbouj youq ndwi, doeklaeng caemh bongj daeuj daengz ranzmeh Simjngeih Mbanjdakdien. Geij boux lwgmbwk caemh daj Dakdien haq okdaeuj haenx guhdaeuz guhciengq couzbanh aen hozdung neix. Gyoengqde mboujgoq dwgrengz, dauqcawq baizlienh:“Dauq ranzmeh, aen ranz raeujrub ndaw sim dahlwg hix raeujrub!” “Mboujguenj haq bae geijlai gyae, ranzmeh ciengxlwenx cungj dwg aen ranz raeuz!” “Ranzmeh, aen sim raeuz seizseiz cungj comz youq gizneix!” Ciuq gyoengqde yawhsuenq, banh aen hozdung neix, moix boux vunz sou haj bak maenz ngaenz guh ginghfei. Simjngeih fwngz luengx haeuj ndaw daehvaq bae, nyaenj dawz geij mbaw ngaenzceij, lumj gaem dawz geij ndaek gyoqfeiz ndatfwd. Ranzmeh baeznduj guh saeh hoengh baenzneix, mbouj camgya? Yienghneix mbouj deng vunz aeu daeuj guh goj gangj daengz dai bae couh gvaiq lo; Camgya? Song ndwen lai ngaenz ciengxlaux couh coemh okbae mbouj miz lo.

Yaemhywx geij baez le, Simjngeih lij dwg bae camgya lo. Hozdung banh hoenghhwd ngoenzhaenx, doengh boux lwgmbwk daj Mbanjdakdien haq okbae haenx dauqma caezcup, mbouj lauq saek boux. Simjngeih caeuq Dahcinh daj iq guhdoih majhung haenx naengh doxcaeuq gwn ngaiz. “Doxbiek nyaenx lai bi, rox miz geijlai vah, mwngz dwen lwg aeu yah, gou gangj lwg haq gwiz.”

Simjngeih gangj daengz lwg de bawx de okrog bae dajhong ce song boux lan hawj de dawz, gyangznaek naeuz: “Didi ngaenz ciengxlaux neix, lienz cawx di saejdaeuz hawj lan cungj mbouj gaeuq, hoj guh lo!”

Dahcinh bihaenx gauj ndaej bae dang ganbu, gwn “haeux goenggya” baenz byonghciuh, gij nyapnyuk de cix dwg gij saeh dahlwg de. Daihhag bizyez geij bi lo, cungj mbouj ngeix bae guhyoux, caenh naeuz gezvwnh cawx ranz ciengx lwg diuzrap naek lailai, mbouj nyienh haq. Dahcinh ngauz gyaeuj laglag, naiqnuek naeuz:“Gou naeuz de, danghnaeuz de nyienh gezvwnh, gou moix ndwen daj gij ngaenz duiyouhginh gou boujdiep sam cien maenz hawj de, de cungj mbouj guhsing. Uk in lo!”

Simjngeih sim baez anj: Sam cien maenz? Duiyouh lo lij ndaej boujdiep hawj dahlwg sam cien maenz ngaenz? De gag ngeix le yaep he, sing saeq cam naeuz:“Yienghneix…… Cejcinh, ndwen duiyouhginh mwngz…… Ndaej geijlai ha?”

“Mbouj miz geijlai, ngamq roek cien lingz maenz.” Dahcinh mboujeiqseiq naeuz.

Roek cien lingz!

Aen soq neix lumj ndaek cuiz baenz cien gaen, haenq dub daengz aen simdaeuz Simjngeih, dek oklwed, saek youq conghhoz deihdwtdwt, yaek gangj gijmaz cungj mbouj ndaej oksing.

Banhaemh, hozdung gak hangh liuzcwngz guh sat lo, bauqrengh yiengj bili bala, hoenzsiu gyuemluemz, aen ciengzmienh hoenghhubhub haenx lumj raemxhaij doiq nei, gak boux gag baema ranzgvan lo. Najda Simjngeih yienghyiengh bienq ndaej myozmywdmywd, aiq dwg vih hoenzsiu cw da, aiq dwg de nienzgeij caen geq damok lo, yawj gyoengq vunzmbanj mbouj raen cingcuj, yawj gyoengq cejnuengx mbouj raen cingcuj, couh lienz Dahcinh youq doiqnaj neix caemh yawj mbouj cingcuj. Gij ngaenz duiyouhginh Dahcinh ngoenz ndeu ndigonq dingj ndaej de baenz ndwen. Laxlawz ndaw singz caeuq lajmbanj itcig dwg cengca hung raixcaix, coengzlaiz mbouj caengz miz maz bienqvaq, cix dwg aenvih seizgan nanz le deng faenx baex yawj mbouj raen, seizneix aen soq neix saetdiuq okdaeuj yienghsiengq baij dangqnaj, sawj vunz doeksaet yat bae.

Simjngeih gag byaij dauqma Mbanjliengz. Gwnz roen, daengngoenz ciuq, aen ngaeuz gudog de deng rag bae raezri, lumj fagcim yaek nyib aen mbwn mong haenx caeuq benq dieg gvangqlangh neix lienz hwnjdaeuj, hoeng cix ciengxlwenx guh mbouj daengz.

De menhmenh daj ndaw daehvaq mbon ok mbaw ngaenz ndeu, mbaw neix dwg daiq daeuj camgya hozdung lw haenx, lij miz di raeuj. Raq rumz ndeu ci gvaqdaeuj, mbaw ngaenz gwnz fwngz mbin doek daengz gwnznamh, baenq geij hop le couh gaz youq geh nyapnyaj henz roen, lumj aen ruznding iq mbouj miz fagcauh cauh mbouj bae nei.

Simjngeih hwet gaengjgwet goemz roengzbae gip mbaw ngaenz, vaiqvi dwk dauq daehvaq. De ngiengx gyaeuj hwnjdaeuj, yawj coh gizgyae, de lumj yawjraen le gij daeng ronghmyigmyig ndaw singz. Gij daeng ndaw singz haenx geijlai ndei ha, cungj ciuq mbouj ndaej daengz benq dieg lajmbanj gyae- gyanggyang neix.