（ciep daih 3690 geiz）

Ndaw ranz lwg lai lan lai, saedceij gvaq ndaej gig haedndaet, hoeng daxbuz cungj miz fuengfap hawj dou roxnyinh“fouqcuk”. Gou bae cunghconh doegsaw, moix bi yaek bae hagdangz seiz, de cungj guhcaeg heuh gou haeuj rugninz bae, mbe hai fwngz cocat de, conh geij mbaw ngaenz daeb ndaej cingjcingj caezcaez okdaeuj, oet hawj gou：“Yo ndei, bae hagdangz aeu rox mbaet gwn mbaet yungh.” Geij mbaw ngaenz neix mbouj rox yo youq ndaw daeh de geijlai nanz, seiqhenz cungj muz dwk yungzyebyeb lo, lij loq daiq miz di raeujrubrub. Gou mbouj siengj aeu, de couh hozndat naeuz:“Nding ha, mwngz dwg lanmbwk daih gou, daxbuz doz ngaenz couh dwg hawj mwngz yungh la, yo ndei bo!”Gvaqlaeng gou cij rox, gijneix dwg daxbuz hwnzngoenz daemjrok mbaet roengzdaeuj cienmonz diem caj gou, caet boux lwg, bouxboux lwglan cungj ndaej daxbuz yienghneix “caegcaeg biensim”.

Daxbuz baenzciuh mbouj caengz ok dou bae gyae gvaq, cix dawz saedceij gungzhoj neix gvaq baenz sei. Ndaw suenbyaek gij lwggva、duhseiq cungj dwg de caenfwngz ndaem, gaeugva raih hwnj bangx suen heurwdrwd, daengz seizcou venj rim lwggva luenzlulu, de couh genj aen ceiq hung roengzdaeuj, guh cuk namzgva、bingj namzgva, heiq hom biu daengx mbanj. De ciengzciengz gangj:“Swhgeij gag ndaem, gwn caengj van.”Mwhhaenx gou mbouj rox, seizneix cij roxyiuj, gij heiqhom de, yo rim gij maqmuengh daxbuz——Dajdingh ndwenngoenz caiq hoj, de lij dwk ndaem ceh maqmuengh roengz namh, youq ndaw gojgaeq de hai va baenz mak.

Daxbuz riu seiz, gaeu da nyup baenz dujva, gokbak miz di yaengx hwnj, loh ok baiz heujgyaj cingjcaez de okdaeuj. Ndaw mbanj miz vunz naeuz de “mingh hoj”, ganq ndaej caet boux lwg saedceij hoj lai, de vadvad fwngz:“Hoj maz? Yawj sou bouxboux majhung baenz ranz, seizneix youh miz gyoengq lan dem, baenz seiq daih doengz dangz lo, ndaw sim gou van lumj diengzrwi.” Gaxgonq de cungj siengj hawj gij doxgaiq ndei hawj bouxwnq: Miz baengz moq guh buhvaq hawj lwg hawj lan; daemjrok guh gaen’gyaeuj bae haw gai, cawx gyu dauqma ranz; de swhgeij mbaet gwn mbaet yungh, daenj geubuh gwnzndang fong bae fong dauq, raen dou gwn ndaej van seiz, cix dwg riunyumnyum, lumjnaeuz de hix ndaej gwn nei.

Seizneix aen daemjrok daxbuz gaenq youq gungx saedceij de caemrwg, gwnzde goemq rim namhfaenx; gyaeuj mbanj goleux geq hix didnyez lo. Moix baez baema ranz, byaij youq gwnz haenznaz, dingq daengz sing lingz duzvaiz daj gyae cienz daeuj, roxnaeuz heiq hom cuk namzgva, doiqnaj cungj yienh’ok aen ngaeuz ndang sang eu ndeu——De maeuq youq gwnz haenznaz, ndaw fwngz dawz diuz bien fad vaiz, gyoengq lwgnyez lumj duzroeg lwg cici caca homh youq henzndang de, gojgaeq gangj daengz buenq, sawqmwh ngiengx gyaeuj hwnjdaeuj, yawjyawj aen daengngoenz din mbwn yaek doek roengz bya haenx.

Daxbuz a, gou lij caegcaeg laemxsim: Caj gou baenz ranz baenz gya le, gou yaek aeu ndeindei hauqgingq mwngz, aenvih gou dwg lan mbwk daih mwngz. Hoeng mwngz caj mbouj daengz ngoenz neix, “faex yaek caem rumz mbouj dingz, lwg yaek ciengx boh mbouj youq.” Neix hawj gou louz ienqhoij lai lo. Mwngz lizgyae dou ndaej cib bi lo, cix roxnyinh mwngz coengzlaiz mbouj caengz bae gyae, gojgaeq mwngz、fwngz raeujrub mwngz、aen daeh caegcaeg cang ngaenzlingz mwngz, caeux couh sanq haeuj ndaw mingh gou. Couh lumj mwngz gangj, vunz ndei rox bienq baenz ndaundeiq, hoeng gou rox, mwngz engq lumj gofaex hung rag raez ndeu, iet mbaw nye bae gyae, bang gyoengq lwgnyez lanz rumz dangj fwn. Nyienh mwngz youq gwnzmbwn vanzlij riunyumnyum, laebdaeb gangj aen gojgaeq gangj mbouj sat mwngz——Gou haeujsim yo aen geiq neix hwnjdaeuj, lumj gaxgonq mwngz yo ngaenzlingz nei, yo youq giz saedceij ceiq laeg de, hawj de ciengxlwenx raeujrub, ciengxlwenx fatrongh.

（2 sat）